Marcos 5

Demoniokunapa ñakarichisqan runamanta

(Mt 8.28-34. Lc 8.26-39)

1Qochata chimparuspankum #5.1 Gadarapa huknin sutinmi karqa Gerasa hinaspa Gergesa.Gadara lawman chayarurqaku. 2Barcamanta Jesús uraykamuptillanmi mana allin espiritukunapa huntasqan runa panteonmanta lloqsiramuspan Jesusman asuykamurqa. 3Chay runaqa panteonpim yachaq, paytaqa cadenakunawanpas manam chaqnayta atiqkuchu. 4Achka kutipim cadenawan watarqaku, ichaqa chayllam tipiparuq, manam pipas sujetayta atiqchu. 5Tutapas punchawpas panteonkunapi hinaspa orqokunapim qaparkachaspan rumikunawan takakustin purikuq. 6Jesusta karullamantaraq rikuruspanmi kallpaspan ñawpaqninpi qonqorakuykurqa. 7Hinaspam hatunmanta qaparispan nirqa: Tukuy imapa hawanpi munaychakuq Diospa Churin Jesús ¿imatataq ñoqawan munanki? Diosraykum mañakuyki ama ñakarichiwanaykipaq, nispa. 8Chaynataqa nirqa: ¡Mana allin espíritu kay runamanta lloqsiy! nispa Jesuspa nisqanraykum.

9Hinaptinmi Jesús tapurqa:

¿Imataq sutiki? nispa.

Chaymi payñataq nirqa:

Legionmi, ñoqaykuqa achkallañam kaniku, nispan.

10Jesustam llumpayta ruegakurqa: Amayá llumpay karumanqa qarqoruwaykuchu, nispan.

11Orqopa hichpanpim achka-achka kuchikuna mikuchkarqaku. 12Chaymi Jesusta ruegakuspa demoniokuna kaynata nirqaku:

Wak kuchikunaman yaykurunaykupaqyá kachaykuwayku, nispanku.

13Chaymi Jesús allinmi niptin mana allin espiritukunaqa runamanta lloqsiruspanku kuchikunaman ustururqaku, hinaptinmi waqtanta kallpaspanku qochaman pawaykuspa heqeparurqaku. Chay kuchikunaqa yaqa iskay waranqam karqaku.

14Kuchi michiqkunañataqmi ayqespanku llaqtapi chaynataq chakrakunapipas willakachakururqaku, chaymi llapa runakuna imam pasakusqanta qawanankupaq kallparqaku. 15Jesuspa kasqanman chayaruspankum demoniokunapa huntasqan runataqa allin pachasqata hinaspa yuyayninman kutisqataña tiyachkaqta tariykurqaku; chaymi llumpayta mancharikururqaku. 16Demoniopa huntasqan runatawan kuchikunata imam pasarusqanta rikuqkunañataqmi llapa runakunaman willarurqaku. 17Chaymi llapa runakuna Jesusta ruegarqaku llaqtankumanta pasakunanpaq.

18Barcaman Jesús qespichkaptinmi demoniokunapa huntasqanmanta sanoyaq runa ruegakurqa:

Qanwan riytam munani, nispa.

19Jesusñataqmi mana munaspan nirqa:

Wasikiman rispayki aylluykikunaman willakamuy, Diospa qanwan imam ruwasqanmantawan imaynam llakipayasusqaykimanta, nispa.

20Chay runam pasaspan Jesuspa sanoyarachisqanmanta Decápolis lawpi kaq chunkantin llaqtakunapi willakuyta qallaykurqa, hinaptinmi llapa runakuna uyarispanku admirakurqaku.

Jairopa churin kawsarisqanmantawan onqoq warmipa sanoyasqanmanta

(Mt 9.18-26. Lc 8.40-56)

21Barcapi kutiramuspan qochapa patanpiña Jesús kachkaptinmi llapa runakuna huñunakaramurqaku, chayraykum patallanpi qeparurqa. 22Chayllamanmi sinagogapi kamachikuq Jairo hamuruspan Jesuspa ñawpaqninpi qonqorakuykurqa. 23Hinaspanmi Jesusta ruegakuspan nirqa:

Warmi churiymi wañuruchkanña, ama hina kaspa wasiyta hakuchik, makikita churaykamuptikiqa sanoyaspam kawsanqa, nispan.

24Jairowan Jesús pasaptinmi achkallaña runakuna ñitinakustin qatirqaku. 25Paykunapa chawpinpim, yaqa chunka iskayniyuq wataña yawarpakuywan onqoq warmi kachkarqa. 26Achka medicokunawanmi hampichikurqa, ichaqa manam sanoyayta atirqachu, tukuy kapuqnintapas yanqapaqmi gastarqa, aswanmi punchawkunapa pasasqanman hina peorchakurqa. 27Kay warmim Jesusmanta uyariruspan, runakunapa chawpinta rispan Jesuspa capanpa patanta qepanmanta llapchaykurqa, 28paymi nirqa:

Pachallantapas llapchaykuspayqa sanoyarusaqmi, nispan. 29Llapchaykuptillanmi yawarpakuynin taniramurqa, hinaptinmi chay onqoymanta cuerpon sanoña kasqanta musyakururqa. 30Jesusñataqmi atiynin lloqsirusqanta musyakuruspan muyuriqninpi runakunata tapurqa:

¿Pitaq pachayta llapchaykamun? nispa.

31Discipulonkunañataqmi nirqaku:

Qawachkankitaq kaynaña runakuna ñitimususqaykitaqa. Chaychu ninki: “¿Pitaq llapchaykamuwan” nispayki?

32Jesusmi ichaqa muyuriqninta qawarirqa llapchaykuqninta reqsinanpaq. 33Chay warmiñataqmi sanoyarusqanta musyakuruspan manchakuymanta katkatatastin qonqorakuykuspan imam kaqta willakurqa. 34Hinaptinmi chay warmita Jesús nirqa:

Churilláy, iñiynikiman hinam sanoyarunki, kunanqa hawkañayá pasakuy, onqoynikimantaqa sanoyarunkiñam, nispa.

35Chaynata Jesús nichkaptinmi Jairopa wasinmanta hamuruspanku payman kaynata willarqaku:

Churikiqa wañukunñam ¿imapaqñataq yachachikuqta pusanki? nispanku.

36Jesusñataqmi chay nisqankuta mana uyariqpas tukuspan Jairota nirqa:

Ama manchakuychu, iñiy hinalla, nispa.

37Hinaspam runakuna qatinanta mana munarqachu, aswanqa Pedrotawan Jacobota hinaspa Jacobopa wawqen Juanllatam pusarikurqa. 38Jairopa wasinman chayaruspanmi llapa runakunata qaparispa waqachkaqta tariykurqa. 39Yaykuruspanmi paykunata nirqa:

¿Imanasqataq qaparillawanña waqachkankichik? Warmaqa manam wañusqachu kachkan aswanqa puñuchkanmi, nispa.

40Runakunañataqmi Jesusmanta burlakurqaku. Hinaptinmi Jesusqa llapa runakunata hawaman qarqoramuspan, warmapa taytanta, mamanta hinaspa riqmasin discipulonkunata pusarikuspan warmapa kasqanman yaykurqa. 41Hinaspanmi warmata makinmanta hapiykuspan nirqa:

¡Talita cumi! nispan. Chayqa: “Warma, qamtam niki, hatariy”, ninanmi.

42Hinaptinmi chay warma chaylla hatariruspan puriyta qallaykurqa. Payqa chunka iskayniyuq watanpiñam karqa. Llapa runakunañataqmi llumpayta admirakurqaku. 43Jesusmi ichaqa paykunata kamachirqa ama pimanpas willakunankupaq, kamachirqataqmi warmaman mikuchinankupaqpas.

Currently Selected:

Marcos 5: RCHQ2

Highlight

Copy