Lucas 21
21
Viudapa ofrendanmanta
(Mr 12.41-44)
1Jesusmi qawachkarqa, ofrenda churanankuman apukunapa ofrenda churasqankuta. 2Rikurqataqmi wakcha viudapa iskay qollqechakuna churasqantapas. 3Chaymi nirqa:
Cheqaptapunim nikichik, kay wakcha viudam llapallan apukunamantapas mastaqa churarun. 4Paykunaqa puchuqllankumantam ofrendankutaqa churarqaku, kay viudam ichaqa wakcha kayninpi vida pasananpaq kaqta lliwta churaykun, nispa.
Templo tuñichisqa kananmanta
(Mt 24.1-2. Mr 13.1-2)
5Kuyayllapaq rumikunawan hinaspa Diosman qosqa sumaq adornokunawan ruwasqa templomanta qawaspa wakiqninku rimaptinkum Jesusñataq nirqa:
6Hamunqam punchaw, kay qawasqaykichikmantaqa manam chulla rumillapas perqasqaqa qepanqachu, lliwmi tuñichisqa kanqa, nispa.
Tukupay punchawkunapi imakunam pasakunanmanta
(Mt 24.3-28. Mr 13.3-23)
7Chaymi Jesusta tapurqaku:
Yachachikuq ¿haykapitaq kay nisqaykikunaqa pasakunqa? ¿Ima señaltaq kanqa manaraq chaykuna pasakuchkaptinqa? nispanku.
8Jesusñataqmi nirqa:
Pipas pantachisunaykichikmantayá allinta cuidakuychik. Achkaqmi sutiypi hamunqaku: “Ñoqam kani Cristo, ñam tiempoqa chayaramunña”, nispanku. Ichaqa amam paykunataqa kasunkichikchu. 9Guerrakunamanta hinaspa chaqwakunamanta uyarispaykichikqa amam manchakunkichikchu. Chaykunam puntataqa pasakunqa, ichaqa manam kay tiempopa tukupayninraqchu.
10Huk nacionmi huklaw nacionwan peleanqa, chaynallataqmi huk munaychakuypas huk munaychakuywan peleanqa. 11Tukuy hinastinpim hatun terremotokuna, muchuykuna hinaspa onqoykuna kanqa. Cielopipas manchakuypaq hatun señalkunam kanqa.
12Ichaqa manaraq chaykuna pasakuchkaptinmi, presochasqa hinaspa qatikachasqa kankichik. Sinagogakunaman hinaspa carcelkunaman apasqam kankichik. Ñoqaraykum reykunapa hinaspa gobernadorkunapa qayllanman apasqa kankichik. 13Chaykunaqa pasasunkichik ñoqamanta willakunaykichikpaqmi. 14Amayá puntataqa yuyaymanaychikchu imaynam rimarikuytaqa. 15#Lc 12.11-12.Ñoqam qosqaykichik yachaywan rimaytaqa, chaynapim mayqan enemigoykichikpas mana kutipakuyta atisunkichikchu. 16Qamkunaqa tayta-mamaykichikpa, wawqekichikkunapa, aylluykichikkunapa hinaspa amistadnikichikkunapa traicionasqanmi kankichik. Wakiqnikichiktam wañuchisunkichik. 17Ñoqaraykum llapallan runakuna cheqnisunkichik. 18Chaywanpas manam umaykichikpi chulla chukchallaykichikpas chinkanqachu. 19Pipas allinta takyaqmi salvakunqa.
20Jerusalenpa muyuriqninpi tropakunata qawaspaqa, chay llaqtapa purmachisqa kanan tiempo chayaramusqantañayá yachaychik. 21Chaynaqa, Judeapi kaqkunayá orqokunaman ayqeychik, Jerusalén llaqtapi kaqkunapas chay llaqtamantayá lloqsiychik. Chakrapi kaqkunapas amañayá llaqtamanqa kutiykuychikñachu. 22#Os 9.7.Chay punchawkunaqa Qellqapa nisqankuna cumplikunanpaqmi Diospa castiganan punchawkuna kanqa. 23¡Chay punchawkunapi wiksayuq otaq ñuñuq wawayuq warmikuna imaynaraq kanqaku! Kay allpapim hatun ñakariy kakunqa, kay llaqtapas castigasqam kanqa. 24Wakinmi espadawan wañuchisqa kanqaku, wakinñataqmi huklaw nacionkunaman preso apasqa kanqaku. Jerusalén llaqtapas Diosta mana reqsiqkunapa sarupasqanmi kanqa, chaynaqa kanqa Diosta mana reqsiqkunapa munaychakunan tiempo tukunankamam.
Jesucristopa kutimunanmanta
(Mt 24.29-35, 42-44. Mr 13.24-37)
25 #
Is 13.10; Ez 32.7; Jl 2.31; Ap 6.12-13. Señalkunam kanqa intipi, killapi hinaspa chaskakunapi. Kay pachapi runakunapas, lamar qochapa hinaspa olakunapa qapariyninwanmi pantaypi hina kaspanku mancharisqallaña kanqaku. 26Kay pachata imam pasananmanta yuyaymanaspankum runakunapas wañunayanqaku; cielopi atiyniyuqkunapas katkatatanqakum. 27#Dn 7.13; Ap 1.7.Chaymantam runapa Churinta hatun atiyninwan hinaspa kanchariyninwan puyupi hamuchkaqta rikuykunqaku. 28Kaykuna pasakuyta qallaykuptinqa kallpanchakuspayá umaykichikta hoqariychik, librasqa kanaykichikmi hichpaykamuchkanña.
29Huk rikchanachiytapas nirqataqmi:
Higos sachatawan wakin sachakunata qawariychik. 30Llaqenkuna ikllimuqta qawaspaykichikqa poqoy tiempo hichpamusqantañam yachankichik. 31Chaynaqa, tukuy kaykuna pasakusqanta qawaspaykichikmi yachankichik Diospa munaychakuyninqa hichpamusqantaña.
32Cheqaptapunim nikichik, tukuy kaykunaqa cumplikunqa manaraqpas kay miraykuna tukuchkaptinmi. 33Hanaq pachawan kay pachapas tukunqam, palabraykunam ichaqa wiñaypaq takyanqa.
34Allintayá cuidakuychik, amayá viciokunawan, machakuykunawan hinaspa kay pachapi imamantapas afanakuykunawan sonqoykichikta rumiyarachiychikchu, yanqañataq chay punchawqa qonqayta chayaramusunkichikman. 35Toqlla hinam kay pachapi llapallan runakunata qonqayllamanta hapiramunqa. 36Rikchapalla kaspayá tukuy tiempopi mañakuychik, tukuy kaykuna hamuqmanta lluptinaykichikpaq, chaynapi runapa Churinpa qayllanman yaykunaykichikpaq.
37 #
Lc 19.47. Jesusmi templopi sapa punchaw yachachiq, tutañataqmi Olivos moqoman riq chaypi kamunanpaq. 38Llapa runakunañataqmi sapa tutapayta temploman riqku Jesuspa yachachisqanta uyarinankupaq.
Currently Selected:
Lucas 21: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012