Maarkɩ 7
7
Caánaʋ́ sɔnzɩ tɔm
(Mat 15.1-9)
1Pʋwayɩ lɛ, Farɩsɩ ñɩma nɛ Yuda ñɩma paɣtʋ wɩlɩyaa nabɛyɛ palɩɩnɩ Yeruusalɛm nɛ powolo pekpeɣli Yesu cɔlɔ. 2Peeɖe pana ɛ-tɔmkpɛlɩkɩyaa lɛlaa tɔkaɣ tɔɔnaɣ nɛ patasaŋ pe-nesi ɛzɩ paɖʋʋ pɔ-sɔnzɩ taa se pala yɔ. 3Ŋgʋ́, Farɩsɩ ñɩma nɛ Yuda ñɩma lɛlaa tɩŋa pɔɖɔkɩ pɔ-cɔzɔnaa sɔnzɩ. Sɔnzɩ ńzɩ́ sɩpɔzʋʋ se pasaŋ camɩyɛ nɛ pʋcɔ pɔtɔɔ. 4Yee palɩnɩ kɩyakʋ nɛ pɔtɔsɔ lɩm yɔ, paatɔkɩ. Pañalɩɣ caɖasɩ nɛ ɖeɣsi nɛ ñɩɣtʋ wondu nɛ palakɩ lakasɩ lɛɛsɩ sakɩyɛ ɛzɩ caánaʋ́ taa ñɩma yɔ.
5Farɩsɩ ñɩma nɛ Yuda ñɩma paɣtʋ wɩlɩyaa ḿbá pɔpɔzɩ Yesu se: «Pɩlabɩ ɛzɩma ñɔ-tɔmkpɛlɩkɩyaa yele ɖɔ-cɔzɔnaa sɔnzɩ? Se we nɛ paasaŋɩɣ pʋcɔ pɔtɔkɩ?» 6Yesu cosi-wɛ se: «Tɛɛ nɛ pʋ-yɔɔ ñɩma mɩ! Mɩ lɛ mbá Ɛsɔ yɔɔdɩ pɔ-tɔm nɛ Ezaayii susi-tʋ camɩyɛ nɛ ɛma ɛ-takayaɣ taa yɔ. Ńdʋ́ lɛ se:
‹Ɛyáa panɛ pasaŋ-m nɛ nɔɔ yem.
Pa-laŋa taa lɛ, pɔtɔsɔɔlɩ-m paa ñɩɩɩ.
7Pasaŋ-m nɛ palaɣ-m kɩlaŋ,
ɛlɛ́ pɩfɛyɩ-m kɛzɛɣa nakɛyɛ.
Mbʋ́ pʋyɔɔ yɔ, paɣtʋ ndʋ́ pawɩlɩɣnɩ abalɩtʋ yɔ,
tɩkɛ ɛyáa paɣtʋ nɛ papɩsɩ-tʋ ɛzɩ ma-ñɩndʋ yɔ nɛ pawɩlɩɣ.› »
8Peeɖe Yesu heyi-wɛ se: «Iyebi Ɛsɔ paɣtʋ nɛ ɩnɩɣnɩ ndʋ́ ɛyáa maɣmaɣ ɖʋwa yɔ.»
9Ɛlɛ́, ɛtasɩ-wɛ heyuu se: «Ɩñaɣ pana nɛ iyele Ɛsɔ paɣtʋ kɩbandʋ nɛ ɩpazɩnɩ mɩ-maɣmaɣ mɩ-ñɩndʋ wɩlʋʋ. 10Đɔ-cɔzɔ Mooyiizi weyi Ɛsɔ cɛlɩ-ɩ paɣtʋ yɔ, ɛyɔɔdaa se: ‹Pʋwɛɛ se ɛyʋ ɛña ɛ-caa nɛ e-ɖoo.› Ɛyɔɔdaa ɖɔɖɔ se: ‹Yee nɔɔyʋ ɛyɔɔdɩ ɛ-caa yaa e-ɖoo tɔm ɛzaɣ́tʋ yɔ, pʋwɛɛ se pakʋ-ɩ.› 11Ɛlɛ́, mɩ miheyiɣ ɛyáa se: ‹ŋpɩzɩɣ ŋheyi ña-caa yaa ño-ɖoo se: maasɔɔlaa se maha-ŋ nabʋyʋ nɛ pɩsɩna-ŋ. Kɛlɛ maapɩzɩɣ, mbʋ́ pʋyɔɔ yɔ, pɩkɛ Kɔrbaŋ#7.11 Kɔrbaŋ: Yuda ñɩma tɔm natʋyʋ.: pʋ-tɔbʋʋ se mbʋ́ pahaɣ Ɛsɔ yɔ. 12Yee iheyi ɛyʋ ḿbʋ́ yɔ, ɩɩtasɩɣ-ɩ haʋ nʋmɔʋ se ɛsɩnɩ ɛ-caa nɛ e-ɖoo. 13Ḿbʋ́ ɩkpakɩɣ mɩ-cɔzɔnaa sɔnzɩ nzɩ́ ɩɖɛzɩɣ ɖama yɔ nɛ ɩwɛɛkɩɣnɩ Ɛsɔtɔm. Ɩlakɩ lakasɩ lɛɛsɩ ndɩ ndɩ ḿbʋ́ ɖɔɖɔ.»
Mbʋ́ pipisiɣ#7.14 Pipisiɣ: Yuda ñɩma paɣtʋ taa lɛ, tɔɔnasɩ nasɩyɩ wɛɛ, ye ɛyʋ ɛtɔɔ-sɩ yɔ sipisiɣ-i Ɛsɔ ɛsɩndaa. ɛyʋ yɔ
(Mat 15.10-20)
14Pʋwayɩ lɛ, Yesu tasɩ ɛyáa samaɣ kpeɣluu nɛ eheyi-kɛ se: «Mɩtɩŋa payɩ iwelesi nɛ ɩnɩɩ mɔn-tɔm camɩyɛ. 15Nabʋyʋ fɛyɩ se pitiki ɛyʋ taa nɛ pipisi-i Ɛsɔ ɛsɩndaa. Ɛlɛ́, mbʋ́ pɩlɩɣnɩ ɛ-taa yɔ, ḿbʋ́ pisiɣni-i. [ 16Weyi ɛwɛnɩ nɩŋgbaaŋ lɛ, ɛnɩɩ.]»
17Yesu nɛ ɛ-tɔmkpɛlɩkɩyaa pakʋyɩ ɛyáa samaɣ taa nɛ pekpe lɛ, pɔpɔzɩ-ɩ se ɛlɩzɩ-wɛ eduuye ńɖɩ́ ɖɩ-tɔbʋʋ. 18Peeɖe ɛpɔzɩ-wɛ se: «Pɩkpɛndɩnɩ-mɩ ɖɔɖɔ nɛ ɩtapɩzɩ ɩnɩɩ tɔm ndʋ́ mɔyɔɔdʋʋ yɔ tɩ-tɔbʋʋ naa we? Ɩtanɩɩ se pʋyʋ fɛyɩ se ɛyʋ tɔkɩ-pʋ nɛ pipisi-i yaa we? 19Mbʋ́ ɛyʋ tɔkɩ yɔ, pitiki e-lotu taa nɛ pʋcɔɔ kʋlɔmɩŋ taa nɛ puwolo pɩlɩɩnɩ ɛ-tɔbʋʋ. Ɛlɛ́, pɩɩsʋʋ ɛ-lɩmaɣza taa.» Yesu yɔɔdʋʋ ḿbʋ́ yɔ, pɩwɩlɩɣ se tɔɔnasɩ tɩŋa mʋnaa se pɔtɔɔ-sɩ.
20Ɛtasɩ-wɛ heyuu se: «Tɔm ndʋ́ tɩlɩɣnɩ ɛyʋ taa yɔ, ńdʋ́ pisiɣni-i.» 21Mbʋ́ pʋyɔɔ yɔ, ɛyʋ taa lɩmaɣza kɩdɛkɛdɛɛ lɩɣna se ɛla acɛyɛ nɛ ɛmɩlɩ nɛ ɛkʋ ɛyáa 22nɛ ɛkpaɣ lɛlaa halaa nɛ ɛɖʋ ɛsɩyɛ lɛlaa ñɩm yɔɔ nɛ ɛla kañatʋ nɛ ɛcɛtɩ ɛyáa nɛ ɛla yem yem nɛ ɛwɛɛ ɛsɩsɛmɩyɛ nɛ ɛcɛtɩnɩ lɛlaa taa nɛ ɛkpazɩ ɛ-tɩ nɛ ɛla kɩmɛlɛndʋ. 23Ɛzaɣ́tʋ tʋnɛ tɩtɩŋa payɩ tɩlɩɣnɩnɩ ɛyʋ taa nɛ tipisiɣ-i.
Halʋ weyi ɛtɛkɛ Yuda tʋ nɛ ɛwɛnɩ lidaʋ Yesu yɔɔ yɔ
(Mat 15.21-28)
24Pʋwayɩ lɛ, Yesu wolo ɛjaɖɛ nɖɩ́ ɖɩñɔtɩnɩ Tiiri yɔ ɖɩ-taa nɛ ɛsʋʋ ɖɩɣa nakɛyɛ taa. Ɛlɛ́, ɛtaasɔɔlɩ se nɔɔyʋ ɛna se ɛwɛ peeɖe. Kitefe kutoyu lɛ, ɛyáa tɩŋa tɛm naʋ. 25-26Halʋ ɛgɔm weyi ɛlɩnɩ Siirii egeetiye taa nɛ ɛkɛ Fenisii tʋ yɔ, ɛnɩ ḿbʋ́ lɛ, ɛtɩwobu eluŋ Yesu tɛɛ nɛ eheyi-i se: «Mɛwɛnɩ pɩɣa peliɣa nakɛyɛ, eleeu nɔɔyʋ wɛ ka-wayɩ. Mentendiɣ-ŋ se ŋɖɔɔnɩ-ɩ.» 27Peeɖe Yesu tuuu halʋ ɛnʋ eduuye se: «Pɩtamʋnɩ se pakpaɣ piya tɔɔnaɣ nɛ pɛpɛɖɩ hasɩ. Ɛlɛ́, pʋwɛɛ se piya ɛtɔɔ sɩhaɣ nɛ pʋcɔ.» 28Halʋ ɛnʋ ecosi-i se: «Kɩpaɣlʋ! Yee piya ɛtɔkɩ nɛ pʋtɔlʋʋ tataa, hasɩ ɛɛtɔzʋʋ yaa we?» 29Peeɖe Yesu heyi-i se: «Ño-cosuu pʋnɛ pɩwɩlɩɣ pɩŋŋ se ŋwɛnɩ lidaʋ mɔ-yɔɔ: wolo. Eleeu ɛnʋ ese ña-pɩɣa peliɣa ŋ́gá ka-wayɩ.» 30Ekpema lɛ, ɛmaɣnɩ ɛ-pɩɣa ŋ́gá kɛhɛnɩ ñalʋʋ yɔɔ. Eleeu tɛm ka-wayɩ seu.
Yesu laba nɛ ndam kaayɔɔdaɣ nakɛyɛ yɔɔ cɛ
31Pʋwayɩ lɛ, Yesu kʋyɩ Tiiri egeetiye taa nɛ ɛtɩŋnɩ Sidɔɔ ñɩnɖɛ taa nɛ ewolo ɛsʋʋ Tɛtʋ Hiu ñɩnɖɛ taa se ewoki Galilee teŋgu nɔɔ. 32Peeɖe powoni ndam kaayɔɔdaɣ nakɛyɛ nɛ pewiini-i se ɛtɩnɩ nesi kɔ-yɔɔ nɛ kɔ-yɔɔ cɛ. 33Peeɖe ɛkpaɣ-kɛ nɛ ɛkɛzɩ kɩjaʋ nɛ ɛlɛkɩ e-niwee ka-nɩŋgbaaŋ taa nɛ ɛla ndaatʋ nɛ ɛtaa ka-nzʋlʋmɩyɛ yɔɔ. 34Ɛtɛma lɛ, ɛkpazɩ ɛ-ɛsɛ ɛsɔdaa nɛ emuzi nɛ ɛtɔ se: «Efata#7.34 Efata: Yuda ñɩma tɔm natʋyʋ..» Pʋ-tɔbʋʋ se: «Tʋlɩ.» 35Kpaagbaa ḿbʋ́ lɛ, ndam kaayɔɔdaɣ ŋ́gá, ka-nɩŋgbaaŋ taa tʋlɩ nɛ ka-nzʋlʋmɩyɛ yɛɖɩ nɛ kapazɩ yɔɔdʋʋ camɩyɛ. 36Ɛlɛ́, Yesu paɣ́ patɩŋa se pataaheyi-tʋ nɔɔyʋ, ɛlɛ́ pamanɩ ɛ-tɔm yɔɔ nɛ posusi-tʋ siŋŋ. 37Ḿbʋ́ labɩnɩ ɛyáa piti pɩŋŋ nɛ pɔtɔŋ se: «Mbʋ́ ɛlakɩ yɔ, pɩtɩŋa pʋwɛ ɖeu. Ɛlakɩ nɛ ndamaa nɩɣ nɛ kaayɔɔdasɩ yɔɔdʋʋ.»
Currently Selected:
Maarkɩ 7: KABI
Highlight
Share
Copy
Want to have your highlights saved across all your devices? Sign up or sign in
