Maarkɩ 12

Tɩŋ weyi popuu i-pee sʋlʋm yɔ, ɩ-hayɩm taa tʋmlaɖaa kañadɩnaa nabɛyɛ tɔm

(Mat 21.33-46; Luk 20.9-19)

1Pʋwayɩ lɛ, Yesu pazɩ-wɛ tuuu eduuye se: «Abalʋ nɔɔyʋ wɛnɩ ḿbʋ́ nɛ ɛsɔ tɩŋ weyi popuu i-pee sʋlʋm yɔ. Pʋwayɩ lɛ, ɛma koloŋa nɛ ɛcɔzɩ nɛ ɛla ɖenɖe ɛpɩzɩɣ ɛñazɩ a-lɩm yɔ. Ɛma ɖɔɖɔ tilimiye nɖɩ́ ɖɩ-yɔɔ pasɩŋɩɣ nɛ pefeŋiɣ yɔ. Ɛtɛma lɛ, ɛkpaɣ ɛyáa se pɔcɔŋnɩ-ɩ tɩŋ ɩnʋ ɩ-yɔɔ nɛ ɛɖɛɛ nʋmɔʋ.

2«Pɩkɛdaa lɛ, tɩŋ ɩnʋ i-pee koyuu talɩ. Peeɖe ɛkʋsɩ e-tiyiyu nɔɔyʋ se ewolo ɛ-tʋmlaɖaa ḿbá pɔ-cɔlɔ nɛ ɛmʋ e-ɖeɖe nɛ ewona. 3Tiyiyu ɛnʋ ɛtalaa lɛ, pakpa-ɩ pamabɩ-ɩ nɛ pɔɖɔɔnɩ-ɩ nɛ ɛpɩsɩ ndaakpasɩ. 4Pʋwayɩ lɛ, hayɩm tʋ ɛnʋ ɛtasɩ tiyiyu lɛlʋ kʋsʋʋ nɛ etiyi-i. Ɛ́lɛ́ talaa lɛ, pama ɛ-ñʋʋ nɛ patʋʋ-ɩ. 5Hayɩm tʋ ɛnʋ, ɛtasɩ tozo tʋ tiyuu. Ɛ́lɛ́ talaa lɛ, pakpa-ɩ nɛ pakʋ. Pʋwayɩ lɛ, ɛtasɩ ɛyáa sakɩyɛ tiyuu nɛ pama lɛlaa nɛ pakʋ lɛlaa pasɩ. 6Hayɩm tʋ ɛnʋ, ɛ-pɩyalʋ kʋsɔɔlʋ ɖeke koŋ pɩɩkazɩ ɛ-cɔlɔ. Ɛɛnaɣ se ɛla ɛzɩma lɛ, ɛtɛzɩ-ɩ tiyuu pɔ-cɔlɔ nɛ ɛhʋʋ ɛ-taa se: ‹Paa pɩɩla ɛzɩma, pañaŋ-ɩ.› 7Tʋmlaɖaa ḿbá pana-ɩ ḿbʋ́ lɛ, pɔyɔɔdɩnɩ ɖama se: ‹Ɩnaɣ weyi ɛkɔŋ yɔ, ɛnʋ kaɣnɩ tɩɣyʋʋ ɛ-caa ñɩm. Ɛkɔma lɛ, ɖɩkʋ-ɩ nɛ ɖɩtɩɣyɩ-pʋ!› 8Ɛtalaa lɛ, pakpa-ɩ pakʋ nɛ pɔlɔnɩ hayɩm ḿbʋ́ pʋ-wayɩ.»

9Yesu tɛm tuuu eduuye ńɖɩ́ lɛ, ɛpɔzɩ-wɛ se: «Hayɩm tʋ ɛnʋ, ɛbɛ ɛlakɩ ɛ-tʋmlaɖaa ḿbá? Ɛkɔŋ ɛkʋ-wɛ nɛ ɛcaa ɛyáa kɩfama nɛ ɛlɛɣzɩ po-lone taa.» 10Peeɖe ɛpɔzɩ-wɛ se: «Ɩtakalɩ tɔm ndʋ́ pama Ɛsɔtɔm Takayaɣ taa yɔ yaa we? Ńdʋ́ lɛ se:

‹Pɩyɛ nɖɩ́ kuduyiŋ mayaa kpaɣaɣ pɔlɔ yɔ,

ńɖɩ́ pɩsɩnɩ ɖɩkɩlɩ wazaɣ nɛ pɩkɩlɩ atɩŋa payɩ lɛɛlɛɛyɔ.

11Kɩpaɣlʋ labɩna ḿbʋ́.

Asaaa, pɩkɛ tʋmɩyɛ kɩbanɖɛ kpem!› »

12Yuda ñɩma sɔsaa nɩ tɔm ńdʋ́ lɛ, pañɩnɩɣ nʋmɔʋ ŋgʋ́ paatɩŋ nɛ pakpa Yesu yɔ. Mbʋ́ pʋyɔɔ yɔ, pasɩm ḿbʋ́ se ḿbá etuuni eduuye ńɖɩ́. Ɛyáa samaɣ yɔɔ lɛ, paanaɣ se pala ɛzɩma. Ɛlɛ́, peyebi-i nɛ pɛɖɛɛ.

Pʋwɛɛ se pɛhɛyɩ wiyaʋ sɔsɔ lambuu yaa we?

(Mat 22.15-22; Luk 20.20-26)

13Pʋwayɩ lɛ, petiyi Farɩsɩ ñɩma nɛ Eroodi hɔɔlʋʋ taa ñɩma nabɛyɛ se powolo pañɩ Yesu nɔɔ cɔlɔ tɔm nɛ pʋtɔma yɔ, ɛyɔɔdɩ natʋyʋ nɛ pakpa-ɩ. 14Patalaa lɛ, peheyi-i se: «Wɩlɩyʋ! Đɩnawa se ŋyɔɔdʋʋ toovenim, sɔɔndʋ ɛɛkpaɣ-ŋ nɛ nɔɔyʋ. Mbʋ́ pʋyɔɔ yɔ, ŋtakpaɣ ɛyáa wɛtʋ nɛ ŋlabɩnɩ tʋmɩyɛ. Ŋwɩlɩɣ ɛyáa mbʋ́ Ɛsɔ liu wɛɛ se pala yɔ pu-toovenim. Đa-paɣtʋ haɣ waɖɛ se pɛhɛyɩ Room wiyaʋ sɔsɔ lambuu yaa pataahɛyɩ-ɩ? Đa yɔ, pʋwɛɛ se ɖɩhɛyɩ-ɩ yaa ɖɩtaahɛyɩ-ɩ? Cosi-ɖʋ nɛ ɖɩnɩɩ.» 15Yesu ñɛtɛm pa-pɩ-tɛɛ nɛ pʋ-yɔɔ lɩmaɣza naʋ ḿbʋ́. Pʋ-yɔɔ ɛpɔzɩ-wɛ se: «Pɩlabɩ ɛzɩma nɛ ɩñɩkɩ mɔ-nɔɔ cɔlɔ tɔm? Ɩkɔnɩ liidiye pɔɔyaɣ nakɛyɛ nɛ mana.» 16Pɔkɔnɩ-kɛ lɛ, ɛpɔzɩ-wɛ se: «A-ñʋʋ nɛ a-hɩɖɛ pɛwɛ kɔ-yɔɔ cɩnɛ?» Pocosi-i se: «Room wiyaʋ sɔsɔ.» 17Peeɖe Yesu heyi-wɛ se: «Ɩcɛlɩ Room wiyaʋ sɔsɔ mbʋ́ pɩkɛ ɛ-ñɩm yɔ nɛ piyele ɩcɛlɩ Ɛsɔ mbʋ́ pɩkɛ ɛ́lɛ́ ñɩm yɔ.» Eheyi-wɛ ḿbʋ́ lɛ, pɩlabɩ-wɛ piti pɩŋŋ.

Sɩɖaa kaɣ fem naa we?

(Mat 22.23-33; Luk 20.27-40)

18Pɩkɛdaa lɛ, Saduki ŋgbɛyɛ taa ñɩma wolo Yesu cɔlɔ. Ḿbá tɔŋnɩ se sɩɖaa eefeŋ. Powoba lɛ, peheyi-i se: 19«Wɩlɩyʋ, ɖɔ-cɔzɔ Mooyiizi ɖʋ ɛ-paɣtʋ taa se: ‹Yee ɛyʋ ɛwɛnɩ ɖalʋ nɛ ɛ-ɖalʋ ɛnʋ ɛsɩ nɛ eyele ɛ-halʋ nɛ ɛfɛyɩnɩ-ɩ pɩɣa yɔ, pʋwɛɛ se pʋdʋ ɛhɔ lelu ɛnʋ nɛ ehiɣni-i pɩɣa ɛ-ɖalʋ lone taa.› 20Tɔɔ! Abalʋ nɔɔyʋ nɛ e-newaa pɛwɛnɩ ḿbʋ́, pɛwɛ lʋbɛ. Abalʋ ɛnʋ, ɛkpaɣ halʋ. Pɩlabɩ pɩnzɩ cabɩ lɛ, ɛsɩ, ɛfɛyɩnɩ pɩɣa. 21Peeɖe e-neu hɔm lelu ɛnʋ se ehiɣ pɩɣa e-lone taa. Pɩtalabɩdɩ pʋyʋ lɛ, ɛ́lɛ́ caŋ ɛsɩ ɖɔɖɔ, halʋ ɛnʋ ɛfɛyɩnɩ-ɩ pɩɣa. Ɛ́lɛ́ wayɩ lɛ, tozo tʋ ñɔhɔm-ɩ nɛ ɛ́lɛ́ sɩ ɖɔɖɔ. Halʋ ɛnʋ ɛfɛyɩnɩ-ɩ pɩɣa. 22Pɩla ḿbʋ́ nɛ pɔkɔɔ pasɩ pa-lʋbɛ. Ɛfɛyɩnɩ pa-taa nɔɔyʋ nɛ pɩɣa. Pʋwayɩ lɛ, halʋ ɛnʋ ɛsɩ ɖɔɖɔ. 23Lɛɛlɛɛyɔ, ɖɩpɔzʋʋ-ŋ se: sɩɖaa fem wiye lɛ, pa-taa weyi ɛtɩnɩ halʋ ɛnʋ? Ŋgʋ́ patɩŋa pakpaɣ-ɩ!»

24Peeɖe Yesu cosi-wɛ se: «Ɩcɛtɩɣ mɩ-tɩ yem, mbʋ́ pʋyɔɔ yɔ, ɩtanɩɩ Ɛsɔtɔm tɔbʋʋ, ɩtasɩ ɖɔɖɔ e-ɖoŋ. 25Meheyiɣ-mɩ se alɩwaatʋ ndʋ́ sɩɖaa feŋ yɔ, halɩkpaɣyɛ ɛɛtasɩɣ wɛʋ. Halaa nɛ abalaa pɛwɛɣ ɛzɩ Ɛsɔ tiyiyaa wɛʋ ɛsɔdaa yɔ. 26Pɩlabɩ ɛzɩma nɛ ɩtɔŋ se sɩɖaa eefeŋ? Ɩtakalɩ Mooyiizi takayaɣ taa ɖenɖe pama hɔɖaɣ mʋwaɣ miŋ yɔ pʋ-tɔm naa we? Ɛsɔ heyi-i nɛ ɛma peeɖe se: ‹Ma lɛ Abraham nɛ Izaakɩ nɛ Yakɔɔbʋ pɛ-Ɛsɔ.› 27Pʋ-yɔɔ lɛ, Ɛsɔ tɛkɛ sɩɖaa Ɛsɔ, ɛlɛ́, wezuu tɩnaa ñɩnʋ ɛkɛnaa. Ɩcɛtɩɣ mɩ-tɩ yem kpem.»

Ɛsɔ paɣtʋ tɩŋa taa lɛ, pɩɩndʋ kɩlaa lee?

(Mat 22.34-40; Luk 10.25-28)

28Yuda ñɩma paɣtʋ wɩlɩyʋ nɔɔyʋ nɩ ɛzɩma mbʋ́ Saduki ñɩma pɔzaɣ Yesu tɔm nɛ ecosuu-wɛ ɖeu yɔ lɛ, ewolo ɛpɔzɩ-ɩ se: «Ɛsɔ paɣtʋ tɩŋa taa lɛ, ndʋ́ tɩkɩlaa?» 29Peeɖe Yesu cosi-i se: «Paɣtʋ ndʋ́ tɩkɩlaa yɔ, ńdʋ́ yɔ: ‹Izrɛɛlɩ ñɩma mɩ, ɩtɩlɩ se ɖa-Kɩpaɣlʋ Ɛsɔ ɖeke koŋ kɛnɩnɩ Kɩpaɣlʋ. 30Sɔɔlɩ ña-Kɩpaɣlʋ Ɛsɔ nɛ ña-laŋɩyɛ tɩŋa nɛ ñe-liu tɩŋa nɛ ña-lɩmaɣza tɩŋa nɛ ño-ɖoŋ tɩŋa payɩ ñe-wezuu caɣʋ taa.› 31Tɩ-wayɩ ñɩndʋ lɛ se: ‹Sɔɔlɩ ña-taabalʋ ɛzɩ ŋsɔɔlʋʋ ña-maɣmaɣ ña-tɩ yɔ.› Natʋyʋ fɛyɩ ɖɔɖɔ nɛ tɩkɩlɩ tɩ-naalɛ.»

32Peeɖe paɣtʋ wɩlɩyʋ ɛnʋ eheyi Yesu se: «Wɩlɩyʋ! Ŋcosi ɖeu pɩtɩɩfɛyɩ. Đenɖe ŋyɔɔdaa se ɖa-Kɩpaɣlʋ Ɛsɔ ɖeke koŋ kɛnɩnɩ Kɩpaɣlʋ yɔ, pɩkɛ toovenim. Nɔɔyʋ fɛyɩ nɛ pɩtasɩnɩ-ɩ. 33Pʋ-yɔɔ lɛ, pʋwɛɛ se ɛyʋ ɛsɔɔlɩ Ɛsɔ nɛ ɛ-laŋɩyɛ tɩŋa nɛ ɛ-lɩmaɣza tɩŋa nɛ e-ciyam tɩŋa nɛ e-ɖoŋ tɩŋa payɩ e-wezuu caɣʋ taa nɛ ɛsɔɔlɩ ɛ-taabalʋ ɛzɩ ɛsɔɔlʋʋ ɛ-tɩ yɔ. Pʋwɛ ɖeu nɛ pɩkɩlɩ pahaɣʋ Ɛsɔ kpɩnɛ nɛ paɖʋʋ miŋ taa yɔ nɛ kʋjɔŋ ndɩ ndɩ weyi palakɩ-ɩ ɖɔɖɔ yɔ.» 34Yesu nawa se ecosi-i camɩyɛ lɛ, eheyi-i se: «Ŋñɔɔzɩ ña-tɩ camɩyɛ, pɩkazɩ pazɩ, ŋsʋʋ Ɛsɔ Kewiyaɣ taa.»

Pʋwayɩ lɛ, nɔɔyʋ tatasɩ katʋʋ se ɛpɔzɩ Yesu natʋyʋ.

Weyi Ɛsɔ Lɩzaa yɔ ɛkɛ Daaviidi ñʋʋdʋ

(Mat 22.41-46; Luk 20.41-44)

35Pʋwayɩ lɛ, Yesu pazɩ ɛyáa heyuu Ɛsɔtɔm Ɛsɔ ɖɩɣa taa nɛ ɛpɔzɩ-wɛ se: «Pɩlabɩ ɛzɩma nɛ paɣtʋ wɩlɩyaa tɔŋ se Weyi Ɛsɔ Lɩzaa Yɔ ɛkɛ Daaviidi sayɩ? 36Ŋgʋ́, Fezuu Kiɖeɖeu yeba nɛ Daaviidi yɔɔdɩ ɛ-tɩ tɩŋa se:

‹Kɩpaɣlʋ Ɛsɔ heyi man-Kɩpaɣlʋ se:

caɣ mɔn-cɔlɔ lone kɩbanɖɛ taa nɛ

pʋkɔɔ pɩsɩɩnɩ alɩwaatʋ ndʋ́ moluzi ño-koyindinaa ñɛ-tɛɛ kpem yɔ.›

37Daaviidi maɣmaɣ ñayaɣ Weyi Ɛsɔ Lɩzaa Yɔ se Kɩpaɣlʋ. Ɛzɩma ɛtasɩɣ kɛʋ Daaviidi ɛnʋ ɛ-sayɩ ɖɔɖɔ yɔ?»

Ɩtaala ɛzɩ paɣtʋ wɩlɩyaa lakʋʋ yɔ

(Mat 23.1-36; Luk 20.45-47)

Ɛyáa samaɣ welesaɣ Yesu tɔm nɛ pɩkɛdɩɣnɩ-wɛ. 38Eheyaɣ-wɛ se: «Ɩɖɔkɩ mɩ-tɩ nɛ paɣtʋ wɩlɩyaa. Mbʋ́ pʋyɔɔ yɔ, pɔsɔɔlɩ tokonaa sɔsaa suu nɛ pɔcɔʋ. Pɔsɔɔlaa ɖɔɖɔ se pɛsɛɣ-wɛ nɛ ñamtʋ ɛyáa ɖikpeɣliye taa. 39Pañɩnɩɣ ɖɩjaɣyɛ sɔsɔɖɛ Ɛsɔ ɖɩsɛyɛ ndɩ ndɩ nɛ kazandʋ pa-taa. 40Ḿbá ɖɔɖɔ hɔɔzʋʋnɩ lelaa nesi taa mbʋ́ pɩtɩŋa payɩ pɛwɛna yɔ. Pɛsɛɣ Ɛsɔ nɛ pɩɖaɣlɩɣ se pɩwɩlɩ se ḿbá lɛ ɛyáa kɩbama. Meheyiɣ-mɩ se kɩyakʋ ŋgʋ́ Ɛsɔ kɔŋ se ɛhʋʋnɩ ɛyáa yɔ, ɛɖʋʋ-wɛ kʋñɔŋ ŋgʋ́ kɩfɛyɩ ɖaɣʋ yɔ.»

Lelu kʋñɔndʋ nɔɔyʋ tɔm

(Luk 21.1-4)

41Yesu tɛm yɔɔdʋʋ lɛ, ewolo ɛcaɣ Ɛsɔ ɖɩɣa taa haɖɛ aɖakaɣ ɛsɩndaa nɛ ɛcɔŋnɩ ɛyáa mbá powoki paɖʋʋ liidiye ka-taa yɔ. Ñɩm tɩnaa sakɩyɛ wokaɣnɩ liidiye sakɩyɛ nɛ paɖʋʋ. 42Pɩkɛdaa lɛ, lelu kʋñɔndʋ nɔɔyʋ ñowoni liidiye pɔɔyɩsɩ cikpesi naalɛ nɛ ɛɖʋ. Sɩlɩɣ ɛzɩ faɖam naalɛ yɔ. 43Peeɖe Yesu ya ɛ-tɔmkpɛlɩkɩyaa nɛ eheyi-wɛ se: «Toovenim lɛ, meheyiɣ-mɩ se lelu kʋñɔndʋ ɛnɛ, ɛhawa nɛ pɩkɩlɩ lɛlaa tɩŋa. 44Mbʋ́ pʋyɔɔ yɔ, ñɩm tɩnaa kpaɣ pe-liidiye wena aawazɩɣ-wɛ yɔ nɛ pɔkɔnɩ paɖʋ. Piyele halʋ kʋñɔndʋ ɛnɛ yɔ, ɛ́lɛ́ kpaɣ mbʋ́ ɛwɛna yɔ pɩtɩŋa payɩ nɛ ɛkɔnɩ ɛɖʋ. Pɩtakazɩ-ɩ pʋyʋ se ɛɛya tɔɔnaɣ maɣmaɣ.»

Currently Selected:

Maarkɩ 12: KABI

Highlight

Copy