Maatiyee 12

Ɛyʋ pɩyalʋ kɩlɩ kɩyakʋ kɩhɛzʋʋ

(Mrk 2.23-28; Luk 6.1-5)

1Alɩwaatʋ ńdʋ́ tɩ-taa Yesu nɛ ɛ-tɔmkpɛlɩkɩyaa pɔɖɔŋaɣ hayɩm nabʋyʋ taa kɩyakʋ kɩhɛzʋʋ nakʋyʋ wiye. Paahayɩ tɔɔnaɣ nakɛyɛ pɩ-taa nɛ ɛ-tɔmkpɛlɩkɩyaa pɛlɩɣ nɛ nʋmɔʋ nɛ ponuutuu nɛ pasalɩɣ, mbʋ́ pʋyɔɔ yɔ, ñɔɔsɩ wɩɣaɣ-wɛ. Tɔɔnaɣ ŋ́gá, kɛwɛ ɛzɩ amala yɔ. 2Palakaɣ ḿbʋ́ lɛ, Farɩsɩ ñɩma nabɛyɛ na-wɛ nɛ powolo peheyi Yesu se: «Cɔnɩ ŋna ñɔ-tɔmkpɛlɩkɩyaa lakʋʋ mbʋ́ paɖʋ Mooyiizi paɣtʋ taa se pataala kɩyakʋ kɩhɛzʋʋ wiye yɔ.» 3Peeɖe ɛpɔzɩ-wɛ se: «Yee ḿbʋ́ ɩtakalɩ mbʋ́ Daaviidi kalabɩ alɩwaatʋ ndʋ́ ñɔɔsɩ wɩɣaɣ ɛ nɛ mbá paawɛ ɛ-cɔlɔ yɔ pʋ-tɔm naa we? 4Ɛsʋ Ɛsɔ ɖɩɣa taa nɛ ɛkpaɣ tindine hɔɔlasɩ nzɩ́ paaha Ɛsɔ yɔ nɛ ɛ nɛ ɛyáa ḿbá pɔtɔɔ. Ŋgʋ́, pɩtaamʋnɩ se pa-taa nɔɔyʋ ɛtɔɔ-sɩ. Ɛlɛ́, cɔjɔnaa ɖeke pɩɩmʋnaa se pɔtɔɔ. 5Yaa ɩtakalɩ Mooyiizi paɣtʋ takayɩsɩ taa se: cɔjɔnaa lakɩ tʋmɩyɛ Ɛsɔ ɖɩɣa taa halɩ pɩkpɛndɩnɩ kɩyakʋ kɩhɛzʋʋ wiye yaa we? Ɛlɛ́, payʋsaa yaa we? 6Ɖɔɖɔ lɛ, meheyiɣ-mɩ se weyi ɛwɛ cɩnɛ yɔ, ɛkɩlɩ Ɛsɔ ɖɩɣa. 7Yee ɩɩsɩm tɔm ndʋ́ pama Ɛsɔtɔm Takayaɣ taa se:

‹Ma Ɛsɔ mɔntɔsɔɔlɩ mɩ-kɩlaŋ.

Ɛlɛ́, me-liu wɛɛ se ɛyáa ɛna ɖama pʋtɔdɩyɛ› yɔ

tɩ-tɔbʋʋ yɔ, ɩtaakʋ mbá pɛtɛwɛɛkɩ nabʋyʋ yɔ pɔ-tɔm. 8Mbʋ́ pʋyɔɔ yɔ, Ɛyʋ Pɩyalʋ ma mansɩm mbʋ́ pʋwɛɛ se pala kɩyakʋ kɩhɛzʋʋ wiye yɔ.»

Yesu wazɩ abalʋ weyi pɩcamɩ e-nesi

(Mrk 3.1-6; Luk 6.6-11)

9Yesu tɛm yɔɔdʋʋ lɛ, ɛkʋyɩ peeɖe nɛ ewolo ɛsʋʋ pɛ-Ɛsɔ ɖɩsɛyɛ taa. 10Abalʋ nɔɔyʋ kɛwɛ peeɖe, e-nesi camaa. Mbá pɛwɛ peeɖe yɔ, pacaɣaɣ se pehiɣ kawanaɣ nakɛyɛ nɛ pakʋyɩ ɛ-yɔɔ. Pʋ-yɔɔ pɔpɔzɩ-ɩ se: «Pɩha nʋmɔʋ se pala nɛ kʋdɔndʋ nɔɔyʋ yɔɔ cɛ kɩyakʋ kɩhɛzʋʋ wiye yaa pataala?»

11Yesu cosi-wɛ se: «Yee mɩ-taa nɔɔyʋ ɛwɛnɩ heu kʋɖʋm koŋ nɛ heu ɛnʋ ɛtɔlɩ pɔʋ nakʋyʋ taa kɩyakʋ kɩhɛzʋʋ wiye, pʋdʋ eewoki ɛlɩzɩ-ɩ yaa we?» 12Ŋgʋ́, ɛyʋ ñakɩlɩ heu wazaɣ tam sakɩyɛ. Pʋ-yɔɔ lɛ, pɩha nʋmɔʋ se pala ɛyʋ camɩyɛ lakasɩ kɩyakʋ kɩhɛzʋʋ wiye. 13Ɛlɛ́, Yesu heyi abalʋ ɛnʋ se: «Losi ñe-nesi!» Peeɖe ɛ́lɛ́ losi-sɩ nɛ sɩ-yɔɔ cɛ nɛ sɩwɛɛ ɛzɩ lɛɛsɩ yɔ. 14Pɩlabɩ ḿbʋ́ lɛ, Farɩsɩ ñɩma lɩɩ se pala lɩmaɣza nɛ pana ɛzɩma mbʋ́ paala nɛ pakʋ Yesu yɔ.

Yesu kɛ tʋmlaɖʋ weyi Ɛsɔ lɩzɩ-ɩ yɔ

15Pɩkɛdaa lɛ, Yesu nɩɩ se pacaɣ pakʋ-ɩ. Pʋ-yɔɔ ɛkʋyɩ peeɖe nɛ etuzi ɛ-tɩ nɛ ɛyáa sakɩyɛ tɩŋ ɛ-wayɩ nɛ ɛla nɛ kʋdɔndɩnaa tɩŋa yɔɔ cɛ. 16Ɛlɛ́, ɛka pa-ñʋŋ taa se pataaheyi nɔɔyʋ mbʋ́ ɛlaba yɔ nɛ 17pɩla ɛzɩ Ɛsɔ yɔɔdʋʋ nɛ náyʋ Ezaayii ma ɛ-takayaɣ taa yɔ. Ɛmawa se:

18«Ɩna man-tʋmlaɖʋ kʋsɔɔlʋ. Ɛnʋ malɩzaa.

Maahʋʋ ɛ-yɔɔ kaʋ.

Mɔnkɔŋ-ɩ haʋ men-Fezuu Kiɖeɖeu nɛ

esusi ajɛya lɛɛna taa ɛyáa ɛzɩma mbʋ́ mɔnkɔŋ-wɛ labʋ mbʋ́ pʋtʋʋzaa yɔ.

19Ɛ nɛ nɔɔyʋ paahɔŋnɩ ɖama tɔm, eeholuu ɖɔɖɔ.

Paanɩɣ ɛ-taŋ habɛɛ yɔɔ.

20Ɛɛtɛzɩɣ pɛlʋʋ ñɩyʋʋ ŋgʋ́ kɩpɛlaa nɛ kɩcaɣ yɔ.

Ɛɛtɛzɩɣ ɖezuu kanɖʋ#12.20 Ñɩyʋʋ nɛ kanɖʋ: cɩnɛ lɛ, ɛyaa mba pɩnɩ-wɛ yɔ, mba pamaɣzɩnaa. ŋgʋ́ kʋɖɔŋ ɖem yɔ.

Ḿbʋ́ ɛwɛɣ labʋ yɔɔ nɛ pʋkɔɔ pɩsɩɩnɩ alɩwaatʋ ndʋ́ mbʋ́ pʋtʋʋzaa yɔ pɩwabɩ pɩtɩŋa

21nɛ ajɛya kpeekpe taa ɛyáa taa-ɩ liu yɔ.»

Yesu ɖɔɔnɩɣ aleewaa

(Mrk 3.22-30; Luk 11.14-23)

22Pʋwayɩ lɛ, powoni abalʋ nɔɔyʋ Yesu cɔlɔ se ɛla nɛ ɛ-yɔɔ cɛ. Abalʋ ɛnʋ, ekem aleewaa nɛ pɔyɔkɩ ɛ-ɛsɛ nɛ papɩsɩ-ɩ kaayɔɔdaɣ. Ɛlɛ́, Yesu la nɛ ɛ-yɔɔ cɛ nɛ ɛnaɣ nɛ ɛyɔɔdʋʋ. 23Peeɖe pɩɖɩɣzɩ ɛyáa samaɣ tɩŋa nɛ pɔtɔŋ se: «Yaa ɛnʋ lɛ wiyaʋ sɔsɔ Daaviidi Sayɩ?» 24Farɩsɩ ñɩma nɩ ḿbʋ́ lɛ, pɔyɔɔdɩ se: «Abalʋ ɛnɛ, aleewaa caa Belzeebuuli hanɩ-ɩ ɖoŋ nɛ ɛɖɔɔnʋʋnɩ aleewaa.»

25Yesu na pa-lɩmaɣza ḿbʋ́ nɛ eheyi-wɛ se: «Yee kewiyaɣ nakɛyɛ ɛwɛɛ nɛ ka-taa ɛyáa eyouni ɖama yɔ, kaalaɣzɩɣ yɔkʋʋ. Đɔɖɔ lɛ, yee tɛtʋ natʋyʋ yaa hɔʋ nakʋyʋ taa ɛyáa eyouni ɖama yɔ, pamɩzɩɣ ɖama. 26Ḿbʋ́ ɖɔɖɔ yee Satanɩ ɛɖɔɔnʋʋ aleewaa yɔ, pʋbʋ ɛlakɩ you nɛ ɛ-maɣmaɣ ɛ-tɩ. E-kewiyaɣ ɛɛpɩzɩɣ katasɩ wɛʋ ɖɔɖɔ. 27Yee ma mɔnɖɔɔnʋʋ aleewaa nɛ Belzeebuuli ɖoŋ lɛ, anɩ ñaha mi-piya ɖoŋ nɛ sɩɖɔɔnʋʋnɩ-wɛ yɔ? Mi-piya ńzɩ́, sɩ-maɣmaɣ sɩkɔŋna wɩlʋʋ se mɩ-tɔm sɩba. 28Toovenim lɛ, Fezuu Kiɖeɖeu ɖoŋ mɔnɖɔɔnʋʋnɩ aleewaa. Ḿbʋ́ wɩlɩɣna se Ɛsɔ Kewiyaɣ tɛm talʋʋ mɩ-hɛkʋ taa.

29«Nɔɔyʋ ɛɛpɩzɩɣ ewolo ɖoŋ tʋ nɔɔyʋ tɛ nɛ ɛmɩlɩ ɛ-ñɩm alɩwaatʋ ndʋ́ ɛtakpa-ɩ nɛ ɛhɔkɩ-ɩ yɔ. Ɛlɛ́, yee ɛkpa-ɩ nɛ ɛhɔkɩ-ɩ yɔ, ɛpɩzɩɣ ɛmɩlɩ ɛ-ɖɩɣa taa ñɩm tɩŋa payɩ.

30«Weyi ɛɛtɩnɩɣ mɔ-yɔɔ yɔ, ɛkʋyʋʋ mɔ-yɔɔ. Weyi ɛ́lɛ́ ɛɛsɩŋnɩ-m ɛyáa kpeɣluu yɔ, ɛmɩzɩɣ-wɛ. 31Pʋ-yɔɔ mankaɖɩɣ-mɩ se paa ɛyáa ɛlabɩ kɩwɛɛkɩm mbʋ́ yaa pɛwɛɛkɩ Ɛsɔ hɩɖɛ ɛzɩma yɔ, Ɛsɔ pɩzɩɣ ekpeɣ-wɛ. Ɛlɛ́, yee ɛyʋ ɛwɛɛkɩ Fezuu Kiɖeɖeu hɩɖɛ yɔ, Ɛsɔ eekpeɣiɣ-i kaʋ. 32Weyi ɛyɔɔdʋʋ Ɛyʋ Pɩyalʋ ma tɔm ɛzaɣ́tʋ yɔ, Ɛsɔ kpeɣiɣ-i. Ɛlɛ́, weyi ɛyɔɔdʋʋ Fezuu Kiɖeɖeu tɔm ɛzaɣ́tʋ yɔ, Ɛsɔ eekpeɣiɣ pʋdʋ sɔnɔ nɛ cee.»

Tɩʋ nɛ ki-pee pɔ-tɔm

(Luk 6.43-45)

33Yesu tasɩ-wɛ heyuu se: «Yee tɩʋ ɛkɛ kɩbaŋgʋ yɔ, kʋlʋlʋʋ pee kɩbana. Yee kɩkɛ ɛzaɣ́ʋ yɔ, kʋlʋlʋʋ pee azaɣ́a: pasɩŋ paa tɩʋ ŋgʋ́ nɛ ki-pee. 34Đʋmaa mɩ! Ɩtɛm kɛʋ ɛyáa azaɣ́a lɛ, ɛzɩma ɩpɩzɩɣ ɩyɔɔdɩ tɔm kɩbandʋ yɔ? Mbʋ́ pʋyɔɔ yɔ, tɔm ndʋ́ tɩhaɣ ɛyʋ taa yɔ, ńdʋ́ lɩɣnɩ ɛ-nɔɔ taa. 35Ɛyʋ kɩbanʋ yɔɔdʋʋ tɔm kɩbandʋ ndʋ́ tɩhaɣ ɛ-taa yɔ. Piyele ɛzaɣ́ʋ ñɔyɔɔdʋʋ tɔm ɛzaɣ́tʋ ndʋ́ tɩhaɣ ɛ́lɛ́ taa yɔ. 36Mankaɖɩɣ-mɩ se kɩyakʋ ŋgʋ́ Ɛsɔ hʋʋnɩ ɛyáa yɔ, ɛyáa kɔŋ heyuu Ɛsɔ nɛ pa-maɣmaɣ pɔ-nɔsɩ mbʋ́ piyeba nɛ pɔyɔɔdɩ tɔm ndʋ́ tɩfɛyɩ wazaɣ yɔ. 37Mbʋ́ pʋyɔɔ yɔ, ñɔ-tɔm Ɛsɔ cɔŋna nɛ eɖezi-ŋ yaa ɛkʋ-tʋ.»

Yesu cosi mbá pɔpɔzʋʋ-ɩ se ɛla hama lakasɩ yɔ

(Mrk 8.11-12; Luk 11.29-32)

38Yesu tɛm yɔɔdʋʋ lɛ, paɣtʋ wɩlɩyaa taa nabɛyɛ nɛ Farɩsɩ ñɩma nabɛyɛ pɔpɔzɩ-ɩ se: «Wɩlɩyʋ! Đe-liu wɛɛ se ŋla ɛsɔdaa hama lakasɩ nasɩyɩ nɛ ɖɩna.»

39Peeɖe ecosi-wɛ se: «Lɛɛlɛɛyɔ ɛyáa kɛ azaɣ́a, paanɩɣnɩ Ɛsɔ. Pañɩnɩɣ se pala ɛsɔdaa hama lakasɩ nasɩyɩ nɛ pana. Ɛlɛ́, paakaɣ yʋsaɣ nakɛyɛ naʋ nɛ pɩtasɩnɩ náyʋ Yoonaasɩ ñɩŋga. 40Mbʋ́ pʋyɔɔ yɔ, ɛzɩma mbʋ́ Yoonaasɩ caɣ kɩyakɩŋ naadozo wɩsɩ nɛ ɖoó kpakpayaɣ sɔsɔɔ taa yɔ, ḿbʋ́ ɖɔɖɔ Ɛyʋ Pɩyalʋ kɔŋ caɣʋ tɛtɛɛ kɩyakɩŋ naadozo wɩsɩ nɛ ɖoó. 41Kɩyakʋ ŋgʋ́ Ɛsɔ hʋʋnɩ ɛyáa tɔm yɔ, Niniivi ñɩma kʋyʋʋ lɛɛlɛɛyɔ ɛyáa ḿbá pɔ-yɔɔ nɛ pakʋ pɔ-tɔm. Mbʋ́ pʋyɔɔ yɔ, Niniivi ñɩma lɛɣzɩ wɛtʋ alɩwaatʋ ndʋ́ panɩ Yoonaasɩ susi Ɛsɔtɔm yɔ. Ŋgʋ́, nɔɔyʋ ñɛwɛ cɩnɛ, ɛ́lɛ́ kɩlɩ Yoonaasɩ! 42Kɩyakʋ ŋ́gʋ́ lɛ, abiɖe nɖɩ́ ɖɩɩcɔnɩ Seba ɛjaɖɛ yɔɔ ɖooo lɔŋ yɔ, ɖɩkʋyʋʋ ɖɔɖɔ lɛɛlɛɛyɔ ɛyáa ḿbá pɔ-yɔɔ nɛ ɖɩkʋ pɔ-tɔm. Mbʋ́ pʋyɔɔ yɔ, ɖɩɩlɩnɩ ɖooo poliŋ nɛ ɖɩkɔɔ ɖɩnɩɩ lɔŋsɩnɖɛ tɔm ndʋ́ Salomɔɔ kɔyɔɔdaɣ yɔ. Ŋgʋ́, nɔɔyʋ ñɛwɛ cɩnɛ, ɛ́lɛ́ kɩlɩ Salomɔɔ!»

Eleeu pɩsʋʋ tɔm

(Luk 11.24-26)

43Yesu yɔɔdaa ɖɔɖɔ se: «Alɩwaatʋ ndʋ́ eleeu seɣ ɛyʋ wayɩ yɔ, eleeu ɛnʋ ɛwɛɣ ɛcɔʋ lakʋ taa se ɛñɩnɩ ɖɩhɛzɩyɛ. Eehikiɣ lɛ, 44ɛtɔŋ se: ‹Mɛntɛzɩɣ pɩsʋʋ ɖɩɣa ŋgá ka-taa maawɛɛ yɔ.› Ɛpɩsɩɣ ka-taa lɛ, ɛmaɣnɩ pahazaa nɛ pɔñɔɔzɩ camɩyɛ. 45Peeɖe ewoki ɛ́yáa ɛ-taabalaa lɛlaa mbá pakɩlɩ-ɩ kañatʋ yɔ lʋbɛ nɛ ɛ nɛ wɛ papɩsɩ pacaɣ ɖɩɣa ŋ́gá ka-taa. Ḿbʋ́ yekina nɛ ɛyʋ ɛnʋ ɛ-wɛtʋ kɩbɩndʋ pɩsɩ tɩkɩlɩ wee wee lɛɛlɛɛyɔ ñɩndʋ. Ḿbʋ́ ɖɔɖɔ pʋkɔŋ tɛmnaʋ lɛɛlɛɛyɔ ɛyáa azaɣ́a.»

Yesu cejewiye maɣmaɣ taa ɛyáa tɔm

(Mrk 3.31-35; Luk 8.19-21)

46Yesu yɔɔdaɣnɩ ɛyáa samaɣ ḿbʋ́ lɛ, e-ɖoo nɛ e-newaa powolo pasɩŋ awayɩ nɛ pañɩnɩɣ se pɔyɔɔdɩnɩ-ɩ. 47Peeɖe nɔɔyʋ heyi-i se: «Ño-ɖoo nɛ ñe-newaa pɛwɛ awayɩ nɛ pañɩnɩɣ se pɔyɔɔdɩnɩ-ŋ.» 48Ɛlɛ́, Yesu pɩsɩnɩ weyi eheyi-i yɔ se: «Toovenim taa lɛ, anɩ lɛ mon-ɖoo nɛ mbá lɛ me-newaa?» 49Peeɖe ɛwɩlɩ ɛ-tɔmkpɛlɩkɩyaa nesi nɛ ɛtɔ se: «Na! Mon-ɖoo nɛ me-newaa pɛwɛnɩ cɩnɛ. 50Mbʋ́ pʋyɔɔ yɔ, weyi ɛlakɩ mbʋ́ man-Caa weyi ɛwɛ ɛsɔdaa yɔ e-liu wɛɛ yɔ, ɛnʋ lɛ me-neu yaa mon-ɖoo.»

Currently Selected:

Maatiyee 12: KABI

Highlight

Copy