Luka 23

Powoni Yesu Pilaatɩ tɛ

(Mat 27.1-2,11-14; Mrk 15.1-5; Yoh 18.28-38)

1Pʋwayɩ lɛ, pakʋyɩ patɩŋa nɛ pakpaɣ Yesu nɛ powoni-i Room wiyaʋ Pilaatɩ tɛ. 2Patana-ɩ lɛ, papazɩ ɛ-tɔm kʋʋ Pilaatɩ cɔlɔ se: «Đɩkpa abalʋ ɛnɛ, ɛɖʋzʋʋ ɖɛ-ɛyáa nɛ eheyiɣ-wɛ se pataahɛyɩ Room wiyaʋ sɔsɔ lambuu. Halɩ ɛtɔm se ɛnʋ lɛ wiyaʋ sɔsɔ Weyi Ɛsɔ Lɩzaa Yɔ.» 3Peeɖe Pilaatɩ pɔzɩ-ɩ se: «Ña lɛ Yuda ñɩma wiyaʋ sɔsɔ naa we?» Yesu cosi-i se: «Ñɔyɔɔdʋʋnɩ ḿbʋ́.» 4Ɛlɛ́, Pilaatɩ heyi Cɔjɔnaa sɔsaa nɛ ɛyáa samaɣ ŋgá kɛwɛ peeɖe yɔ se: «Maanaɣ ɛzaɣ́tʋ ndʋ́ abalʋ ɛnɛ ɛlaba nɛ pʋwɛɛ se mankʋ ɛ-tɔm yɔ.» 5Ɛyɔɔdɩ ḿbʋ́ lɛ, pɔ-nɔsɩ tɛzɩ kpaʋ ɖoŋ se: «Ɛnʋ wɩlɩɣnɩ ɛyáa se palɩɩ awiya wayɩ. Ɛpazɩnɩ Galilee egeetiye taa nɛ ɛtɩŋnɩ Yudee ñɩnɖɛ tɩŋa taa nɛ ɛkɔɔ ɛtalɩ cɩnɛ lɛɛlɛɛyɔ.»

6Pɔyɔɔdɩ ḿbʋ́ lɛ, Pilaatɩ pɔzɩ-wɛ se: «Abalʋ ɛnʋ ɛkɛ Galilee tʋ naa we?» 7Ɛlɛ́, peheyi-i se ɛ-tɛ lɛ peeɖe. Pʋ-yɔɔ ɛtɔm se powoni-i Eroodi cɔlɔ, mbʋ́ pʋyɔɔ yɔ, ɛnʋ cɔŋaɣnɩnɩ egeetiye ńɖɩ́ ɖɩ-yɔɔ. Ŋgʋ́, ɛɛwɛ Yeruusalɛm alɩwaatʋ ńdʋ́ tɩ-taa.

Powoni Yesu Eroodi Antipasɩ tɛ

8Patanɩ Yesu lɛ, Eroodi na-ɩ nɛ ɛ-laŋɩyɛ hʋlʋmɩ. Mbʋ́ pʋyɔɔ yɔ, ɛɛnɩ ɛ-tɔm nɛ ɛñɩnɩɣ ɖooo lɔŋ se ɛna-ɩ nɛ ɛla hama lakasɩ nasɩyɩ nɛ ɛna. 9Peeɖe ɛpɔzɩ-ɩ tɔm sakɩyɛ, ɛlɛ́, etocosi-i natʋyʋ. 10Cɔjɔnaa sɔsaa nɛ paɣtʋ wɩlɩyaa paawɛ peeɖe ɖɔɖɔ nɛ paba tɛzɩ ɛ-yɔɔ kʋyʋʋ kaŋ kaŋ. 11Ɛlɛ́, Eroodi nɛ ɛ-sɔɔjanaa powoŋ Yesu nɛ pɛpɛŋ-ɩ tɛtɛ nɛ posuu-i ñɩɣlɩ́m toko. Ḿbʋ́ palabɩ-ɩ nɛ papɩsɩnɩ-ɩ Pilaatɩ cɔlɔ. 12Kɩyakʋ ŋ́gʋ́ Eroodi nɛ Pilaatɩ peceɣa. Piyele pataanaɣ ɖama nɛ ɛsɩyɛ.

Pakʋ Yesu tɔm nɛ pʋwɛɛ se pakʋʋ-ɩ

(Mat 27.15-26; Mrk 15.6-15; Yoh 18.39--19.16)

13Papɩsɩnɩ Yesu Pilaatɩ tɛ lɛ, ɛ́lɛ́ kpeɣli cɔjɔnaa sɔsaa nɛ awiya nɛ ɛyáa samaɣ 14nɛ eheyi-wɛ se: «Ɩkɔnɩ abalʋ ɛnɛ mɔn-cɔlɔ nɛ iheyi-m se ɛɖʋzʋʋ ɛyáa. Ŋgʋ́, mɔnpɔzɩ-ɩ tɔm mɩ-ɛsɩndaa lɛ, mantana mbʋ́ ɩtɔŋ se ɛwɛɛkaa yɔ pɩ-taa nabʋyʋ kpem. 15Eroodi ɖɔɖɔ ñatana mbʋ́ ɛwɛɛkaa yɔ. Pʋ-yɔɔ ɛtɔm se papɩsɩnɩ-ɩ mɔn-cɔlɔ cɩnɛ. Toovenim lɛ, abalʋ ɛnɛ, ɛtala mbʋ́ pʋpɔzʋʋ se pakʋ-ɩ yɔ. 16Pʋ-yɔɔ lɛ, meyeki-i. Ɛlɛ́, pʋwɛɛ se polu-i agbazɛɛ nɛ pʋcɔ ɛɖɛɛ.» [ 17Ŋgʋ́, paa Paska Kazandʋ ndʋ́ lɛ, pɩɩkɛnɩ Pilaatɩ kɩcɛyʋʋ se ɛlɩzɩ salaka tʋ weyi ɛyáa samaɣ sɔɔlaa yɔ.] 18Pʋ-yɔɔ patɩŋa pamabɩ kubusi se: «Kʋ abalʋ ɛnɛ! Lɩzɩ-ɖʋ Baraabaasɩ!» 19Ŋgʋ́, paaɖʋ ɛ́lɛ́ salaka se ɛhɔyɩ ñaɖʋʋ nakʋyʋ tɛtʋ taa nɛ ɛtɛ ɛkʋ ɛyʋ nɔɔyʋ.

20Pilaatɩ caɣaɣ se eyele Yesu lɛ, ɛtasɩ ɛyáa samaɣ heyuu se: «Mantana mbʋ́ abalʋ ɛnɛ ɛwɛɛkaa kpem yɔ.» 21Ɛlɛ́, patɩŋa pama kubusi se: «Kam-ɩ kaamaŋkaɣ yɔɔ! Kam-ɩ kaamaŋkaɣ yɔɔ!» 22Pilaatɩ tasɩ-wɛ pɔzʋʋ tozo ɖeɖe se: «Ɛlɛ́, ɛbɛ kpem ɛwɛɛkaa? Mantana mbʋ́ ɛwɛɛkaa nɛ pʋpɔzʋʋ se pakʋ-ɩ yɔ. Pʋ-yɔɔ lɛ, meyeki-i. Ɛlɛ́, pʋwɛɛ se polu-i agbazɛɛ nɛ pʋcɔ ɛɖɛɛ.» 23Peeɖe pɛtɛzaɣ kubusi mabʋ ɖoŋ se: «Kam-ɩ kaamaŋkaɣ yɔɔ!» Po-kobusi ɖɛ Pilaatɩ lɛ, 24ɛɖʋ se ɛlakɩ-wɛ mbʋ́ pɔpɔzɩ-ɩ yɔ. 25Pʋ-yɔɔ ɛlɩzɩ weyi pɔsɔɔlaa se ɛlɩzɩ yɔ nɛ piyele ɛcɛlɩ-wɛ Yesu se palabɩ-ɩ mbʋ́ pɔsɔɔlaa yɔ. Ŋgʋ́, weyi ɛlɩzɩ-ɩ ḿbʋ́ yɔ, paaɖʋ-ɩ salaka se ɛhɔyɩ ñaɖʋʋ nakʋyʋ nɛ ɛtɛ ɛkʋ ɛyʋ nɔɔyʋ.

Powokini Yesu se pakʋ-ɩ

(Mat 27.32-44; Mrk 15.21-32; Yoh 19.17-27)

26Powokaɣnɩ Yesu kam lɛ, pakatɩ Siirɛɛnɩ abalʋ nɔɔyʋ, payaɣ-ɩ se Siimɔɔ. Ɛlɩnɩ tɛyɛ. Peeɖe pakpa-ɩ nɛ ɖoŋ nɛ pasʋʋ-ɩ kaamaŋkaɣ se ɛtɩŋnɩ-kɛ Yesu wayɩ.

27Ɛyáa samaɣ tɩŋaɣ ɛ-wayɩ pɩtɩɩfɛyɩ. Halaa mbá paawɛ ka-taa yɔ, pakʋwaɣ pa-tɩ nɛ wiluu nɛ patɩmɩɣ ɛ-yɔɔ. 28Peeɖe Yesu kisini halaa ḿbá pɔ-yɔɔ nɛ eheyi-wɛ se: «Yeruusalɛm halaa mɩ! Ɩtaawi-m, ɛlɛ́, iwii mɩ nɛ mi-piya. 29Mbʋ́ pʋyɔɔ yɔ, alɩwaatʋ natʋyʋ kɔŋ nɛ ɛyáa tɔ se: ‹Kaalʋlɩsɩ nɛ mbá pɔtɔɖɔkɩ kaʋ yaa piya tamʋzɩ-wɛ kaʋ yɔ, pehiɣ pa-tɩ!› 30Alɩwaatʋ ńdʋ́ ɖɔɖɔ ɛyáa tendiɣ pʋŋ nɛ piyisi se: ‹Ɩkpɛzɩ ihuuzi ɖɔ-yɔɔ nɛ ɖɩsɩ.› 31Meheyiɣ-mɩ se yee palabɩ weyi ma mɛwɛ ɛzɩ tɩʋ lɛŋ ñɩŋgʋ yɔ ɛzʋnɔ lɛ, ɛzɩma paala mbá mɩ ɩwɛ ɛzɩ tɩŋ kɩwɩŋ yɔ?»

32Paakpɛndɩnɩ ɛyáa azaɣ́a naalɛ nabɛyɛ se pakʋ pa nɛ Yesu.

Sɔɔjanaa kam Yesu kaamaŋkaɣ yɔɔ

33Patalɩ ɖenɖe payaɣ se Ñʋmbɔɔyaɣ yɔ lɛ, sɔɔjanaa ka Yesu kaamaŋkaɣ yɔɔ. Pakam ɖɔɖɔ ɛyáa azaɣ́a ḿbá peeɖe. Lɛlʋ ɛ-nɩwaŋ yɔɔ nɛ lɛlʋ ɛ-nɩmɩyɛ yɔɔ. 34Ɛlɛ́, Yesu tɔ se: «Caa! Kpeɣ-wɛ pa-kɩwɛɛkɩm, patasɩ mbʋ́ palakɩ yɔ.» Alɩwaatʋ ńdʋ́ lɛ, paɖʋwaɣ miika se patayɩ ɖama e-wondu. 35Ɛyáa samaɣ kasɩŋ peeɖe nɛ kɔcɔŋna nɛ Yuda ñɩma ñʋndɩnaa ñowoŋuu-i nɛ pɔtɔŋ se: «Yee toovenim se ɛkɛ Krɩstʋ Weyi Ɛsɔ Lɩzaa Yɔ yɔ, ɛya ɛ-maɣmaɣ ɛ-ñʋʋ ɛzɩ ɛyabʋ lɛlaa ñɩŋgʋ yɔ!» 36‏-37Sɔɔjanaa ñaawoŋ-i ɖɔɖɔ nɛ powoni-i sʋlʋm kɩñɩŋɩm nabʋyʋ se ɛñɔɔ nɛ pɔtɔŋ-ɩ se: «Yee ŋkɛ Yuda ñɩma wiyaʋ sɔsɔ yɔ, ya ña-maɣmaɣ ña-ñʋʋ!» 38Đɔɖɔ lɛ, paama tɔm nɛ paka ɛ-kaamaŋkaɣ ñʋʋ yɔɔ se: «Ɛnɛ lɛ Yuda ñɩma wiyaʋ sɔsɔ.»

39Ɛyáa azaɣ́a mbá pakam ɛ nɛ wɛ yɔ, pa-taa lɛlʋ tʋʋ-ɩ se: «Pɩcaɣ ña lɛ Krɩstʋ? Ŋŋyakɩ ña-maɣmaɣ ña-ñʋʋ se ŋkpɛndɩnɩ-ɖʋ yɔ?» 40Ɛlɛ́, lɛlʋ ñakalɩ-ɩ se: «Ŋgʋ́, paɖʋ-ŋ kʋñɔŋ ɛzɩ ɛnʋ yɔ, ŋŋñaŋ Ɛsɔ?» 41Đa yɔ, pʋmʋnaa se paɖʋ-ɖʋ-kʋ ḿbʋ́ ɖa-lakasɩ kɩdɛkɛdɩsɩ yɔɔ. Ŋgʋ́ ɛnʋ yɔ, ɛtala kɩwɛɛkɩm nabʋyʋ. 42Peeɖe eheyi Yesu se: «Yesu! Ŋkɔm ñe-kewiyaɣ tɔɔʋ lɛ, ŋtɔzɩ mɔ-yɔɔ.» 43Ɛ́lɛ́ ñocosi-i se: «Toovenim lɛ, meheyiɣ-ŋ se sɔnɔ ɖeke lɛ, ma nɛ ŋ ɖiwoki Ɛsɔ cɔlɔ e-koboyaɣ taa.»

Yesu sɩm tɔm

(Mat 27.45-56; Mrk 15.33-41; Yoh 19.28-30)

44‏-45Pʋkɔma ɛzɩ wɩsɩ siɣu yɔ lɛ, puhuuzi wɩsɩ yɔɔ nɛ cɩkpɛndʋʋ yu ɛjaɖɛ kpeekpe kpemm nɛ pʋkɔɔ pɩsɩɩnɩ ɖanaɣ ñɩɣtʋ naadozo. Peeɖe pɩsaʋ sɔsɔʋ ŋgʋ́ paakaɣ Ɛsɔ ɖɩɣa taa yɔ, kɩfaɣ kɩ-hɛkʋ taa kpu. 46Ɛlɛ́, Yesu ma kubuka ɖoŋ se: «Caa! Manɖʋzɩ man-kalɩzaɣ ñe-nesi taa.» Ɛtɛm yɔɔdʋʋ ḿbʋ́ lɛ, etisi fezuu nɛ ɛhɛɛ. 47Peeɖe Room sɔɔja sɔsɔ na mbʋ́ pɩtɩŋa pɩlaba yɔ nɛ ɛsa Ɛsɔ nɛ ɛtɔ se: «Ɛnɛ, ɛɛkɛ ɛyʋ kʋtʋʋzʋ toovenim!» 48Ɛyáa samaɣ ŋgá katɩŋa kaawobi se kana ɛzɩma mbʋ́ pakaŋ Yesu yɔ, kana ḿbʋ́ lɛ, katɩmɩɣ kpem yɔɔ. 49Ɛlɛ́, Yesu ɛgbaɣdɩnaa tɩŋa nɛ halaa mbá patɩŋ-ɩ nɛ ɖooo Galilee yɔ, paba ñaasɩŋ poliŋ nɛ pɔcɔŋnɩ mbʋ́ pɩlakaɣ yɔ.

Yozɛɛfʋ pim Yesu

(Mat 27.57-61; Mrk 15.42-47; Yoh 19.38-42)

50‏-51Alɩwaatʋ ńdʋ́ tɩ-taa lɛ, Yuda ñɩma tɔm hʋyaa sɔsaa taa nɔɔyʋ kɛwɛ peeɖe, payaɣ-ɩ se Yozɛɛfʋ. Ɛ-tɛ lɛ Ariimatee, Yudee egeetiye taa. Ɛ-lɩmaɣza kɛwɛ ndɩ nɛ tɔm hʋyaa lɛlaa. Mbʋ́ pʋyɔɔ yɔ, ɛtaatisiɣ se pakʋ Yesu. Ɛɛkɛ ɛyʋ kʋtʋʋzʋ siŋŋ nɛ ɛwɛɛ Ɛsɔ Kewiyaɣ ɖaŋʋʋ yɔɔ. 52Ɛnʋ wobina ɛna Pilaatɩ nɛ etendi-i se yee etisiɣ yɔ, ɛcɛlɩ-ɩ Yesu nɛ ewoni epi. 53Ɛ́lɛ́ ha-ɩ nɔɔ lɛ, ewolo etisi-i kaamaŋkaɣ yɔɔ nɛ ɛhɔkɩ-ɩ pɩsaʋ kʋhʋlʋmʋʋ nakʋyʋ taa nɛ ewoni-i epi pɩlaʋ ŋgʋ́ pɛcɛsɩ ɛwaɣ taa nɛ petepimdi nɔɔyʋ kɩ-taa yɔ kɩ-taa. 54Pɩɩkɛ kemeɣa nakɛyɛ wiye, kifeŋaɣ kɩyakʋ kɩhɛzʋʋ.

55Halaa mbá paatɩŋ Yesu nɛ ɖooo Galilee yɔ, patɩŋ Yozɛɛfʋ nɛ powolo pana pɩlaʋ nɛ ɛzɩma mbʋ́ pɛhɛzɩ Yesu yɔ. 56Pana ḿbʋ́ lɛ, papɩsɩ se pañɩnɩ num ndɩ ndɩ nɛ tɩlaaɖɩnaa nɛ powoni pataa-ɩ. Ɛlɛ́, paahɛzɩ kɩyakʋ kɩhɛzʋʋ wiye ɛzɩ paɖʋʋ paɣtʋ taa yɔ nɛ pʋcɔ powolo.

Currently Selected:

Luka 23: KABI

Highlight

Copy