Luka 16

Tʋmlaɖʋ lɛɣtʋ tʋ tɔm

1Yesu tasɩ ɛ-tɔmkpɛlɩkɩyaa tuuu eduuye se: «Ñɩm tʋ nɔɔyʋ kɛwɛnɩ tʋmlaɖʋ nɛ ɛcɔŋnɩ-ɩ ɛ-ñɩm yɔɔ. Nakʋyʋ wiye lɛ, powolo peheyi-i se: ‹Ña-tʋmlaɖʋ wɛɛkɩɣ ña-ñɩm.› 2Pʋ-yɔɔ ɛya-ɩ nɛ eheyi-i se: ‹Ña! Manɩɣ pɔyɔɔdʋʋ ñɔ-tɔm se we? Kɛdɩ-m ɛzɩma mbʋ́ ña-tʋmɩyɛ ɖɔŋ yɔ. Ŋŋtasɩɣ kɛʋ man-tʋmlaɖʋ!› 3Peeɖe tʋmlaɖʋ ɛnʋ ɛhʋ ɛ-taa se: ‹Nɔɔnɔɔ man-caa lɩzɩɣ-m tʋmɩyɛ taa, malakɩ ɛzɩma lee? Mɛnfɛyɩ ɖoŋ se maahayɩ. Ŋgʋ́, sʋlʋmʋʋ ñɛwɛ-m fɛyɛ. 4Tɔɔ! Mansɩm mbʋ́ malakɩ nɛ yee pɔɖɔɔnɩ-m lɛ, ɛyáa kamʋ-m pɛ-tɛ yɔ.› 5Peeɖe etiyaa nɛ payaa ɛ-caa ɛnʋ ɛ-kɩndɩyaa kʋɖʋm kʋɖʋm. Pɔkɔma lɛ, ɛpɔzɩ kajalaɣ tʋ se: ‹Ɛzɩma ŋwɛnɩ man-caa kɩmɩyɛ?› 6Ɛ́lɛ́ se: ‹Num kɩpam ŋgbaŋ mɩnʋʋ mɛwɛnɩ-ɩ kɩmɩyɛ.› Peeɖe tʋmlaɖʋ ɛnʋ eheyi-i se: ‹Ŋŋnaɣ ña-kɩmɩyɛ takayaɣ! Caɣ lɔŋ nɛ ŋma se ŋgbaŋ nɩɩnʋwa.› 7Ɛkʋyɩ ɛ-yɔɔ lɛ, ɛmaa lɛlʋ yɔɔ se: ‹Nɛ ña-yɔ, ɛzɩma ña-ñɩnɖɛ kɛnaa?› Ɛ́lɛ́ cosi-i se: ‹Mɩla kutokiŋ mɩnʋʋ.› Peeɖe eheyi-i se: ‹Ŋŋnaɣ ña-kɩmɩyɛ takayaɣ! Ma se kutokiŋ nɩɩnʋwa nɛ niidozo.› 8Pʋwayɩ lɛ, tʋmlaɖʋ ɛzaɣ́ʋ ɛnʋ ɛ-caa yɩɣyɩ-ɩ. Mbʋ́ pʋyɔɔ yɔ, ɛwɛnɩ lɛɣtʋ. Kedeŋa kanɛ kɔ-yɔɔ ñɩma wɛnɩ lɛɣtʋ pa-lakasɩ taa nɛ pɩkɩlɩ ñalɩmɩyɛ taa ñɩma.

Nɔɔyʋ ɛɛpɩzɩɣ ɛsɔɔlɩ Ɛsɔ nɛ ɛtɛ ɛwɛnɩ liidiye laɣzaɣ

9Ma meheyiɣ-mɩ se: ɩkpaɣ kedeŋa yɔɔ cɩnɛ ñɩm mbʋ́ ɩwɛna yɔ nɛ ɩñɩnɩnɩ ɛgbaɣdɩnaa nɛ yee pʋkɔma pɩtɛɖɩɣ-mɩ lɛ, Ɛsɔ kamʋ-mɩ ɛ-ɖɩɣa ŋgá kaayɔkʋʋ kaʋ yɔ ka-taa. 10Weyi ɛlakɩ mbʋ́ pʋpɔzʋʋ yɔ cikpem taa yɔ, ɛlakɩ ɖɔɖɔ mbʋ́ pʋpɔzʋʋ yɔ sɔsɔm taa. Weyi ɛ́lɛ́ muluu cikpem taa yɔ, emuluu ɖɔɖɔ sɔsɔm taa. 11Yee ɩtalabɩnɩ kedeŋa yɔɔ cɩnɛ ñɩm mbʋ́ pʋpɔzʋʋ yɔ lɛ, acɛlɩɣ-mɩ ñɩm maɣmaɣ siŋŋ yɔ? 12Yee ɩtalabɩnɩ lɛlʋ ñɩm mbʋ́ pʋpɔzʋʋ yɔ lɛ, acɛlɩɣ-mɩ mɩ-ñɩmbʋ yɔ?

13Tʋmlaɖʋ nɔɔyʋ ɛɛpɩzɩɣ ɛla caanaa naalɛ tʋma. Yee ɛlakɩ ḿbʋ́ yɔ, ɛpaɖɩɣ lɛlʋ nɛ ɛsɔɔlɩ lɛlʋ. Yaa pʋtɔmaɣ yɔ, ɛnɩɣnɩ lɛlʋ nɛ eyele lɛlʋ. Ḿbʋ́ ɖɔɖɔ pʋwɛɛ: ɩɩpɩzɩɣ ɩsɔɔlɩ Ɛsɔ nɛ ɩtɛ ɩwɛɛ ñɩm laɣzaɣ.»

Yesu tɔm natʋyʋ

(Mat 11.12-13; 5.31-32; Mrk 10.11-12)

14Yesu yɔɔdaɣ ḿbʋ́ lɛ, Farɩsɩ ñɩma nɩɩ tɔm ńdʋ́ tɩtɩŋa. Peeɖe powoŋ-i, mbʋ́ pʋyɔɔ yɔ, pɛwɛ liidiye laɣzaɣ. 15Pʋ-yɔɔ Yesu heyi-wɛ se: «Ɩcaɣ se ɛyáa ɩna-mɩ se ɩkɛ kʋtʋʋzaa, ɛlɛ́, Ɛsɔ ñasɩm mɩ-lɩmaɣza tɩŋa. Mbʋ́ ɛyáa maɣzɩɣ se pɩkɩlɩ pɩtɩŋa payɩ yɔ, Ɛsɔ ɛɛcaɣ se ɛna-pʋ ɛ-ɛsɩndaa kpem.

16Paawɩlɩ Mooyiizi paɣtʋ nɛ náyaa takayɩsɩ taa tɔm nɛ pʋkɔɔ pɩtalɩ Lɩm Sɔʋ Sɔnzɩ Laɖʋ Yohanɛɛsɩ alɩwaatʋ. Đooo alɩwaatʋ ńdʋ́ʋ́ papazɩ Ɛsɔ Kewiyaɣ Laŋhɛzɩyɛ Tɔm susuu nɛ paa weyi ɛlʋkɩ se ɛsʋʋ ka-taa. 17Paa ḿbʋ́ yɔ, ɛsɔdaa nɛ tɛtʋ pa-mʋʋ́ʋ fɛyɩ kaɖɛ nɛ pɩtalɩ paɣtʋ ńdʋ́ tɩ-mayaɣ nakɛyɛ mʋʋ́ʋ.» 18Pʋwayɩ lɛ, Yesu tasɩ-wɛ heyuu se: «Yee nɔɔyʋ ɛɖɔɔnɩ ɛ-halʋ nɛ ɛkpaɣ kɩfalʋ yɔ, ɛlabɩ acɛyɛ. Đɔɖɔ lɛ, yee pekizi halʋ nɛ nɔɔyʋ kpaɣ-ɩ yɔ, pʋdʋ labɩ acɛyɛ.»

Ñɩm tʋ nɛ Lazaarɩ pɔ-tɔm

19Pʋwayɩ lɛ, Yesu tuu-wɛ eduuye se: «Abalʋ ñɩm tʋ nɔɔyʋ kɛwɛnɩ ḿbʋ́, esuu awiitokonaa ɖeu ñɩlɩ ñɩlɩ nɛ ɛtɔkɩ leleŋ leleŋ paa ɖooye. 20Kʋñɔndʋ nɔɔyʋ ñaawɛɛ, payaɣ-ɩ se Lazaarɩ. Ɛtɩŋa ɛ-yɔɔ nɛ heŋ tɔ tɔ nɛ ɛhɛnɩɣ ñɩm tʋ ɛnʋ ɛ-nɔnɔɔ taa. 21Ɛɛsɔɔlaa siŋŋ se ɛtɔzɩ mbʋ́ ñɩm tʋ ɛnʋ ɛtɔkɩ nɛ pʋtɔlʋʋ tataa yɔ nɛ ɛtɔɔ. Đɔɖɔ lɛ, hasɩ wokaɣ nɛ sineziɣ e-heŋ taa. 22Nakʋyʋ wiye lɛ, kʋñɔndʋ ɛnʋ ɛsɩ nɛ Ɛsɔ tiyiyaa kpaɣ-ɩ powoni-i lone kɩbanɖɛ taa Abraham cɔlɔ. Pʋwayɩ lɛ, ñɩm tʋ ɛnʋ ɛsɩ ɖɔɖɔ nɛ pebim-i 23nɛ ɛsʋʋ tɛtɛɛ ɖenɖe kʋñɔŋ maatɛŋ wɛɛ yɔ. Ɛwɛ peeɖe ḿbʋ́ lɛ, ɛkʋsɩ ɛ-ɛsɛ nɛ elosi Abraham poliŋ taa, Lazaarɩ wɛ ɛ-cɔlɔ. 24Peeɖe ɛmabɩ kubuka se: ‹Hayɩ mɔn-cɔzɔ Abraham! Na man-pʋtɔdɩyɛ nɛ ŋtiyi Lazaarɩ nɛ elii lɩm e-niye nɔɔ taa nɛ elizi me-liu tɛɛ nɛ piniɣdi-m. Mbʋ́ pʋyɔɔ yɔ, malakɩ kʋñɔŋ pɩŋŋ miŋ ɛnɛ ɛ-taa.› 25Ɛlɛ́, Abraham cosi-i se: ‹Man-sayɩ! Tɔzɩ se Lazaarɩ lakaɣ kʋñɔŋ kedeŋa yɔɔ lɛ, ñaawɛɛ ŋtɔkɩ leleŋ. Lɛɛlɛɛyɔ Lazaarɩ laŋɩyɛ ñɛhɛ cɩnɛ lɛ, ñalakɩ kʋñɔŋ. 26Đɔɖɔ lɛ, pɔʋ sɔsɔʋ nakʋyʋ wɛ ɖa nɛ mɩ ɖɛ-hɛkʋ taa se paa nɔɔyʋ ɛcaɣ se ɛtɛzɩ mɩ-cɔlɔ yɔ, ɛtaapɩzɩ. Kʋ-yɔɔ ɖɔɖɔ mɩ-cɔlɔ tʋ nɔɔyʋ ɛɛpɩzɩɣ ɛlɩɩ ɛtɛzɩ ɖɔ-cɔlɔ cɩnɛ.› 27Ɛlɛ́, abalʋ ɛnʋ ɛtasɩ-ɩ heyuu se: ‹Caa! Yee ḿbʋ́ mentendiɣ-ŋ se ŋtiyi Lazaarɩ man-caa ɖɩɣa taa. 28Mɛwɛnɩ newaa kagbaanzɩ. Ewolo ɛka pa-ñʋŋ taa ɖeu nɛ pataakɔɔ pasʋʋ kʋñɔŋ kʋnɛ kɩ-taa ɖɔɖɔ.› 29Abraham cosi-i se: ‹Ñe-newaa wɛnɩ Mooyiizi nɛ náyaa pa-takayɩsɩ. Pakalɩ-sɩ nɛ panɩɩ.› 30Peeɖe abalʋ ɛnʋ eheyi-i se: ‹Caa Abraham! Yee sɩɖaa taa nɔɔyʋ ɛpɩsɩna nɛ ɛmaɣnɩ-wɛ yɔ, pɛlɛɣzɩɣ wɛtʋ.› 31Ɛlɛ́, Abraham tasɩ-ɩ heyuu se: ‹Yee patanɩɩ Mooyiizi nɛ náyaa pa-takayɩsɩ taa tɔm yɔ, paa sɩɖaa taa nɔɔyʋ efema nɛ ewolo eheyi-wɛ yɔ, paatisiɣ ɛ-tɔm ɖɔɖɔ.› »

Currently Selected:

Luka 16: KABI

Highlight

Copy