Yohanɛɛsɩ KAJALAƔ TƆM
KAJALAƔ TƆM
Paa pɩɩla ɛzɩma yɔ, Krɩstʋ ñɩma mbá Yohanɛɛsɩ ma-wɛ ɛ-Laŋhɛzɩyɛ Tɔm Takayaɣ yɔ, paawɛ Siiri ɛjaɖɛ taa, yaa Azii cikpeluu hɔɔlʋʋ ŋgʋ́ kɩpɩsɩ lɛɛlɛɛyɔ Turkii ɛjaɖɛ yɔ, kɩ-taa.
Yohanɛɛsɩ Laŋhɛzɩyɛ Tɔm Takayaɣ kanɛ, ka-taa hɔɔlɩŋ wɛ ndɩ nɛ Laŋhɛzɩyɛ Tɔm Takayɩsɩ lɛɛsɩ taa ñɩŋ. Tɔm ndʋ́ ɛkɛdɩɣ yɔ, tɩwɛ ndɩ. Tɔm pee wena ɛkɛdɩɣnɩ-tʋ yɔ, awɛ ndɩ ɖɔɖɔ. Takayaɣ kanɛ, kalɩzɩɣ Yesu aduwa nɛ ɛ-lakasɩ tɔbʋʋ.
Takayaɣ kanɛ, ka-kajalaɣ hɔɔlʋʋ kɛdɩɣ hama lakasɩ lʋbɛ nzɩ́ Yesu labɩ-sɩ nɛ pɩla ɛyáa piti yɔ sɩ-tɔm (kpaɣ ñʋʋ 1 nɛ pɩsɩɩnɩ ñʋʋ 12). Payaɣ lakasɩ ńzɩ́ se masɩ, mbʋ́ pʋyɔɔ yɔ, sɩwɩlɩɣ se Yesu kɛ Ɛsɔ pɩyalʋ. Hɔɔlʋʋ kʋnɛ kɩyɔɔdʋʋ ɖɔɖɔ ɛzɩma Yesu katɩ ɛyáa nabɛyɛ yɔ pʋ-tɔm: ɛzɩ ɛzɩma ɛkatɩ Yuda ñɩma cɔjɔ sɔsɔ nɔɔyʋ yɔ (ñʋʋ 3 ñɩŋgʋ), ɛzɩ ɛzɩma ɛkatɩ Samarɩɩ halʋ nɔɔyʋ yɔ (ñʋʋ 4 ñɩŋgʋ), nɛ ɛzɩ ɛzɩma ɛkatɩ kʋdɔndɩnaa yɔ (ñʋŋ 5 nɛ 9 ñɩŋ). Yesu wɩlaɣ ɛyáa tɔm lɛ, ɛtɔŋaɣ se ɛkɛ tindine nɖɩ́ ɖɩhaɣ wezuu yɔ, ɖiyiyu weyi ewokina ɛyáa Ɛsɔ Caabiyuu cɔlɔ yɔ, nɛ ñalɩmɩyɛ nɖɩ́ ɖɩtʋsʋʋ kedeŋa yɔɔ yɔ. Ḿbʋ́ Yesu wɩlɩnɩ ɛyáa tɩŋa weyi ɛkɛnaa yɔ.
Takayaɣ hɔɔlʋʋ naalɛ ñɩŋgʋ (kpaɣ ñʋʋ 13 ñɩŋgʋ nɛ pɩsɩɩnɩ ñʋʋ 21 ñɩŋgʋ) kɛdɩɣ alɩwaatʋ ndʋ́ pʋwɛɛ se Yesu ɛkʋyɩ kedeŋa yɔɔ nɛ ewolo ɛ-caa cɔlɔ yɔtɩ-tɔm. Yesu yɔɔdaɣnɩ e-tiyiyaa. Ɛsɩɣzaɣ-wɛ lɔŋ se yee wiɖiyi ɛfɛyɩ pɔ-cɔlɔ yɔ, papɩzɩ pala tʋmɩyɛ camɩyɛ (kpaɣ ñʋʋ 13 ñɩŋgʋ nɛ pɩsɩɩnɩ 16 ñɩŋgʋ). Pʋwayɩ lɛ, Yesu tɩmnɩ ɛ-caa Ɛsɔ nɛ eheyi-i se ehuuzi e-tiyiyaa yɔɔ (ñʋʋ 17 ñɩŋgʋ).
Takayaɣ kanɛ, ka-taa Yesu sɩm tɔm wɛ nabʋyʋ taa ɖɔɖɔ ɛzɩ Maatiyee, Maarkɩ nɛ Luka Laŋhɛzɩyɛ Tɔm Takayɩsɩ taa ñɩndʋ yɔ (ñʋŋ 18 nɛ 19 ñɩŋ).
Paska wiye lɛ, Yesu lɩwa nɛ e-tiyiyaa na-ɩ se ɛ nɛ ɛ-ɛsɛ (ñʋŋ 20 nɛ 21 ñɩŋ). Takayaɣ kanɛ ka-mayʋ yɔɔdʋʋ se, ɛnʋ ma ɛ-takayaɣ se mbá patana Yesu yɔ, pɛwɛnɩ lidaʋ ɛ-yɔɔ ɖɔɖɔ (20.29-31).
Yohanɛɛsɩ Laŋhɛzɩyɛ Tɔm Takayaɣ yɔɔdʋʋ tam tam Yuda ñɩma tɔm nɛ kɔtɔŋ se pɛwɛ ndɩ nɛ ɛyáa lɛlaa. Yesu koyindinaa tɔm pɔyɔɔdaɣ ḿbʋ́. Koyindinaa ḿbá pa-taa lɛ, layaa mbá pataatisiɣ ɛ-tɔm yɔ, ḿbá kaakɩlɩnɩ ɖɔʋ. Yesu maɣmaɣ kɛ Yuda tʋ. Ɛ-kajalaɣ tiyiyaa ɖɔɖɔ kaakɛ Yuda ñɩma. Yohanɛɛsɩ ɛyɔɔdʋʋ nɛ ɛyaɣ Yuda ñɩma hɩɖɛ yɔ, pɩtɛkɛ ɛjaɖɛ naɖɩyɛ taa ɛyáa ɛyaɣ ḿbʋ́. Kedeŋa yɔɔ ɛyáa mbá pɛfɛyɩnɩ lidaʋ Yesu Krɩstʋ yɔɔ yɔ, patɩŋa ɛyaɣ ḿbʋ́.
Yohanɛɛsɩ Laŋhɛzɩyɛ Tɔm Takayaɣ ɛɛyɔɔdʋʋ Yesu lʋlʋʋ tɔm. Kaayɔɔdʋʋ ɖɔɖɔ ɛ-tʋmɩyɛ pazʋʋ tɔm. Ɛlɛ́, ka-kajalaɣ tɔm yɔɔdʋʋ nɛ tɩtazɩɣ pɩ-taa camɩyɛ se Yesu Krɩstʋ kɛ Ɛsɔtɔm ndʋ́ tɩwɛ ɛ-cɔlɔ ɖooo kiɖe tɛɛ yɔ (1.1-18). Yesu weyi ɛkɛ Ɛsɔtɔm yɔ, ɛkɔma ɛcaɣ ɛyáa cɔlɔ se papɩsɩ Ɛsɔ piya. Yesu kɔm ɛjaɖɛ yɔɔ yɔ, ɛ nɛ Caa paakɛ kʋɖʋm. Ɛnʋ lɛ Caa tiyiyu kedeŋa yɔɔ. Mbá pɔsɔɔlɩ siŋŋ se patɩlɩ Ɛsɔ yɔ, pʋwɛɛ se patɩŋnɩ ɛ-yɔɔ.
Currently Selected:
Yohanɛɛsɩ KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in