Ebree 8
8
Yesu kɛ cɔjɔ sɔsɔ keekee
1Tɔm ndʋ́ meheyiɣ-mɩ yɔ, tɩ-taa ndʋ́ tɩkɩlɩ wazaɣ yɔ lɛ se: ɖɩwɛnɩ cɔjɔ sɔsɔ nɔɔyʋ. Ɛcaɣ Ɛsɔ Đoŋ Tɩŋa Tʋ kewiyaɣ kpelaɣ cɔlɔ lone kɩbanɖɛ taa ɛsɔdaa. 2Ɛnʋ lɛ cɔjɔ sɔsɔ weyi ɛlakɩ tʋmɩyɛ ɖenɖe Ɛsɔ wɛɛ yɔ. Lone ńɖɩ́, pɩtɛkɛ nɔɔyʋ labɩnɩ-ɖɩ ɛzɩ paasiɣu kɩɖanɖʋʋ Mooyiizi alɩwaatʋ taa yɔ. Ɛlɛ́, Kɩpaɣlʋ labɩnɩ-ɖɩ, ńɖɩ́ lɛ laŋaɣ siŋŋ.
3Paa cɔjɔ sɔsɔ weyi lɛ, pasɩ-ɩ se ewoni Ɛsɔ haɖɛ nɛ kpɩna wena palaɣ Ɛsɔ ɛnʋ yɔ. Pʋ-yɔɔ lɛ, pʋwɛɛ se ɖɔ-cɔjɔ sɔsɔ ɖɔɖɔ ehiɣ nabʋyʋ nɛ ewoni ɛha-ɩ. 4Ŋgʋ́, yee ɛɛwɛ kedeŋa yɔɔ yɔ, ɛtaatɩɩkɛʋ cɔjɔ maɣmaɣ nɛ pʋcɔ. Mbʋ́ pʋyɔɔ yɔ, cɔjɔnaa lɛlaa wɛɛ nɛ powokini Ɛsɔ haɖɛ ɛzɩ paɖʋʋ paɣtʋ taa yɔ. 5Tʋmɩyɛ nɖɩ́ cɔjɔnaa ḿbá palakɩ yɔ, ɖɩwɛ ɛzɩ mbʋ́ pʋwɛ ɛsɔdaa yɔ pɩ-kɩlɛmʋʋ yɔ. Palakaɣ ɛzɩ Ɛsɔ keheyuu Mooyiizi alɩwaatʋ ndʋ́ ɛcaɣaɣ se esiɣ-i kɩɖanɖʋʋ yɔ. Eeheyi-i se: «Cɔnɩ ŋna, la pɩtɩŋa payɩ ɛzɩ mawɩlʋʋ-ŋ pʋʋ yɔɔ yɔ.» 6Ɛlɛ́ lɛɛlɛɛyɔ, paɖʋ Krɩstʋ tʋmɩyɛ nɖɩ́ ɖɩkɩlɩ pa-ñɩna yɔ. Mbʋ́ pʋyɔɔ yɔ, ɛnʋ lɛ ceyiyu nɔɔ haʋ mbʋ́ pɩkɩlɩ ɖeu nɛ pʋwɛɛ Ɛsɔ nɛ ɛyáa pɛ-hɛkʋ taa yɔ pɩ-taa. Halɩ mbʋ́ Ɛsɔ ɖʋwa se ɛlakɩ nɔɔ haʋ ḿbʋ́ pɩ-taa yɔ, pɩkɩlɩ ɖeu.
Ɛsɔ tɔm se ɛ nɛ ɛyáa pɔkɔŋ ɖʋʋ ɛgbaɣdɩyɛ kɩfaɖɛ
7Toovenim lɛ, yee kajalaɣ nɔɔ haʋ ɛɛpɩzaɣ se pɩla pɩtɩŋa yɔ, pɩtaapɔzɩ se patasɩ ñɩnʋʋ naalɛ ñɩmbʋ nɛ pɛlɛɣzɩnɩ-pʋ. 8Alɩwaatʋ ndʋ́ Ɛsɔ kalaɣ ɛ-ñɩma yɔ ɛtɔm se:
«Ma Kɩpaɣlʋ, mɔntɔŋ se
kɩyakɩŋ nɩɩyɩ kaɣ kɔm.
Ɩ-taa lɛ, mahaɣ nɔɔ kɩfalaɣ
Izrɛɛlɩ ñɩma nɛ
Yuda ñɩma#8.8 Izrɛɛlɩ ñɩma nɛ Yuda ñɩma: alɩwaatʋ ndʋ lɛ, patayɩ Izrɛɛlɩ ɛjaɖɛ hɔɔlɩŋ naalɛ: Izrɛɛlɩ ñɩma hɔɔlʋʋ nɛ Yuda ñɩma ñɩŋgʋ..
9Pɩɩwɛɣ ɛzɩ ŋgá maaha
pɔ-cɔzɔnaa,
kɩyakʋ ŋgʋ́ mɔnɖɔkɩ pe-nesi taa nɛ
malɩzɩ-wɛ nɛ Ejiptɩ ɛjaɖɛ taa yɔ.
Kɩpaɣlʋ tasɩ yɔɔdʋʋ se:
Mbʋ́ pʋyɔɔ yɔ, pa-maɣmaɣ pɔtɔɖɔ mɔ-nɔɔ haʋ ḿbʋ́ pʋ-yɔɔ.
Pʋ-yɔɔ mantamaɣzɩ pɔ-yɔɔ.
10Kɩpaɣlʋ tasɩ yɔɔdʋʋ se:
Ɩɩnaɣ nɔɔ haʋ mbʋ́ mɔnkɔŋ ɖʋʋ ma
nɛ Izrɛɛlɩ ñɩma ɖɛ-hɛkʋ taa kɩyakɩŋ ɩnʋ ɩ-wayɩ yɔ.
Manɖʋʋ man-paɣtʋ pa-lɩmaɣza taa.
Mamaɣ-tʋ ɖɔɖɔ pa-laŋa taa.
Mɛnkɛɣ pɛ-Ɛsɔ nɛ
ḿbá kɛ ma-ñɩma.
11Pʋtɔpɔzɩ se pa-taa nɔɔyʋ ɛtasɩ wɩlʋʋ
weyi ɛwɛ ɛ-cɔlɔ yɔ yaa ɛ-taabalʋ.
Pɩfɛyɩ se patasɩ-ɩ heyuu se:
‹Ña, tɩlɩ Kɩpaɣlʋ!›
Toovenim lɛ, pasɩŋ-m patɩŋa payɩ,
kpaɣ piya cikpesi nɛ puwolo pɩsɩɩnɩ sɔsaa.
12Mbʋ́ pʋyɔɔ yɔ, mɔnkɔŋ-wɛ kpeɣu pa-kɩwɛɛkɩm.
Maatasɩɣ tɔzʋʋ pa-kɩwɛɛkɩm yɔɔ kaʋ.»
13Ɛsɔ yɔɔdʋʋ nɔɔ haʋ kɩfam tɔm ḿbʋ́ yɔ, pɩwɩlɩɣ se kajalaɣ ñɩmbʋ pɩnaa. Ŋgʋ́, mbʋ́ pɩpɩnaa nɛ pɩkpadɩyɩ yɔ, pɩwɩzɩ mʋʋ́ʋ.
Currently Selected:
Ebree 8: KABI
Highlight
Share
Copy
Want to have your highlights saved across all your devices? Sign up or sign in
