Galaatɩ 3
3
Pɔɔlɩ pɔzʋʋ tɔm Galaatɩ ñɩma
1Galaatɩ ñɩma kɩmɛlɛmɩŋ mɩ! Ahɔkɩ-mɩ fadɩŋ nɛ ɩwɛɛ ḿbʋ́? Ŋgʋ́, palɩzɩ-mɩ mbʋ́ pʋ-yɔɔ Yesu Krɩstʋ sɩbɩ kaamaŋkaɣ yɔɔ yɔ pʋ-tɔm taa kpayɩ kpayɩ. 2Tɔm kʋɖʋmtʋ koŋ mɔnpɔzʋʋ-mɩ, ńdʋ́ lɛ se: ɩɖɔŋ Yuda ñɩma paɣtʋ yɔɔ camɩyɛ yɔɔ Ɛsɔ ha-mɩ e-Fezuu Kiɖeɖeu yaa ɩnɩ Laŋhɛzɩyɛ Tɔm nɛ itisi-tʋ yɔɔ ɛha-mɩ-kʋ? Icosi-m nɛ manɩɩ. 3Pɩlabɩ ɛzɩma nɛ ɩwɛɛ kɩmɛlɛndʋ ḿbʋ́? Ɛsɔ ha-mɩ e-Fezuu Kiɖeɖeu nɛ ɩpazɩ lɛ, lɛɛlɛɛyɔ pɩlabɩ ɛzɩma nɛ ɩcaɣ se ɩtɛzɩnɩ mɩ-maɣmaɣ mi-ɖoŋ? 4Ɩmaɣzɩɣ se ɩtɔɔ kʋñɔmɩŋ ɩnʋ falaa yaa we? Pɩɩpɩzɩɣ pɩla ḿbʋ́. 5Ɩɖɔŋ paɣtʋ yɔɔ yɔɔ Ɛsɔ ha-mɩ e-Fezuu Kiɖeɖeu nɛ ɛlakɩ hama lakasɩ mɩ-hɛkʋ taa yaa we? Pɩtɛkɛ ḿbʋ́! Ɩnɩ Laŋhɛzɩyɛ Tɔm nɛ itisi-tʋ yɔɔ ɛha-mɩ-kʋ.
Paɣtʋ ɛɛpɩsɩɣ nɔɔyʋ kʋtʋʋzʋ
6Ḿbʋ́ ɖɔɖɔ Abraham laba. Pama ɛ-tɔm Ɛsɔtɔm Takayaɣ taa se: «Ɛwɛnɩ lidaʋ Ɛsɔ yɔɔ yɔɔ ɛ́lɛ́ kpaɣ-ɩ se ɛkɛ kʋtʋʋzʋ.» 7Pʋ-yɔɔ lɛ, pʋwɛɛ se ɩtɩlɩ se mbá pɛwɛnɩ lidaʋ Ɛsɔ yɔɔ yɔ, ḿbá kɛnɩnɩ Abraham sayɩnaa siŋŋ. 8Đɔɖɔ lɛ, pama Ɛsɔtɔm Takayaɣ taa ɖooo lɔŋ se mbá pɛtɛkɛ Yuda ñɩma yɔ, pɔkɔŋ wɛnaʋ lidaʋ Ɛsɔ yɔɔ se ɛ́lɛ́ ɛkpaɣ-wɛ se pɛkɛ kʋtʋʋzaa. Pʋ-yɔɔ Ɛsɔ kalayɩnɩ Abraham heyuu laŋhɛzɩyɛ tɔm. Ńdʋ́ lɛ se: «Ñɔ-yɔɔ lɛ, mɔnkɔŋ wazʋʋ kedeŋa kpeekpe ɛyáa yɔɔ.» 9Ɛzɩma mbʋ́ Abraham wɛnɩ lidaʋ Ɛsɔ yɔɔ nɛ Ɛsɔ ɛnʋ ɛwazɩ ɛ-yɔɔ yɔ, ḿbʋ́ ɖɔɖɔ ɛkɔŋ wazʋʋ mbá patɩŋa payɩ pɛwɛnɩ lidaʋ ɛ-yɔɔ yɔ pɔ-yɔɔ.
10Mbá patɩŋa payɩ pamaɣzɩɣ se pehikiɣ ñʋʋ yabʋ se pɔɖɔŋ Yuda ñɩma paɣtʋ yɔɔ yɔ, Ɛsɔ wɩlɩɣ-wɛ kpalʋʋ. Pʋ-yɔɔ pama Ɛsɔtɔm Takayaɣ taa se: «Yee nɔɔyʋ ɛɛɖɔŋ mbʋ́ pɩwɛ paɣtʋ takayaɣ taa yɔ pɩtɩŋa payɩ pʋ-yɔɔ yɔ, Ɛsɔ ɛwɩlɩ pʋdʋ kpalʋʋ.» 11Toovenim lɛ, Ɛsɔ ɛɛpɩsɩɣ nɔɔyʋ kʋtʋʋzʋ se pʋdʋ ɖɔŋ paɣtʋ yɔɔ. Ḿbʋ́ pama ka-taa se: «Weyi ɛkɛ kʋtʋʋzʋ e-lidaʋ wɛnaʋ yɔɔ yɔ, ɛwɛɣ wezuu.» 12Piyele paɣtʋ tɔm taa lɛ, lidaʋ tɔm fɛyɩnɩ wazaɣ nakɛyɛ. Mbʋ́ pʋyɔɔ yɔ, pama tɩ-tɔm ɖɔɖɔ se: «Weyi ɛɖɔŋ paɣtʋ yɔɔ yɔ, pɩtɩŋɩɣnɩ tɩ-yɔɔ nɛ ɛcaɣ wezuu.» 13Pɩwɩlɩɣ se Ɛsɔ tɛm ɖɔ-tɔm kʋʋ. Ɛlɛ́, Krɩstʋ pɩsɩnɩ weyi Ɛsɔ wɩlɩ kpalʋʋ yɔ. Ɛlɛ́ɣzɩ ɖo-lone taa se ɛ́lɛ́ ɛtaatasɩ-ɖʋ-kʋ wɩlʋʋ. Ḿbʋ́ ɛlaba nɛ ɛya ɖa-ñʋʋ. Pʋwɛ ḿbʋ́, mbʋ́ pʋyɔɔ yɔ, pama ka-taa ɖɔɖɔ se: «Weyi popuzuu-i tɩʋ yɔɔ yɔ, ɛnʋ Ɛsɔ wɩlɩɣ kpalʋʋ.» 14Ɛsɔ labɩ ḿbʋ́ se pɩtɩŋnɩ Yesu Krɩstʋ yɔɔ nɛ ɛha ñɩm kɩbam mbʋ́ ɛɖʋwa se ɛhaɣ Abraham yɔ mbá pɛtɛkɛ Yuda ñɩma yɔ ɖɔɖɔ. Ḿbʋ́ ɛtɩŋnɩ lidaʋ ŋgʋ́ ɖɩwɛnɩ ɛ-yɔɔ yɔ kʋ-yɔɔ nɛ ɛha-ɖʋ e-Fezuu Kiɖeɖeu ŋgʋ́ ɛɖʋwa se ɛhaɣ-ɖʋ yɔ.
Mbʋ́ Ɛsɔ ɖʋwa se ɛlakɩ ɛyáa yɔ, ɛɛtɛm-pʋ ɖʋʋ pʋcɔ paɣtʋ kɔŋ
15Taabalaa! Đɩkpaɣ mbʋ́ ɛyáa lakɩ nɛ ɖɩkɛdɩnɩ mbʋ́ Ɛsɔ laba yɔ: yee nɔɔyʋ ɛɖʋ ɛzɩma mbʋ́ patayɩ ɛ-ñɩm ɛ-sɩm wayɩ nɛ ɛ-ñɩɣ niye yɔ, nɔɔyʋ ɛɛpɩzɩɣ ekizini-i yaa ɛɖʋ nɔɔ pɩ-taa. 16Ɛsɔ ñaɖʋwa ɖɔɖɔ se ɛlakɩ Abraham nɛ ɛ-sayɩ pʋyʋ. Ɛlɛ́, patama se: «Abraham nɛ ɛ-sayɩnaa.» Ɛlɛ́, pamawa se: «Abraham nɛ ɛ-sayɩ.» Pʋ-yɔɔ lɛ, pɩtɛkɛ ɛyáa sakɩyɛ tɔm pamawa, ɛlɛ́, kʋɖʋm koŋ tɔm pamawa. Ɛnʋ lɛ Krɩstʋ. 17Iwelesi nɛ ɩnɩɩ tɔm ndʋ́ mancaɣ-mɩ heyuu yɔ. Ńdʋ́ lɛ se: Ɛsɔ kaɖʋwa se ɛlakɩ Abraham pʋyʋ nɛ ɛñɩɣ niye. Pɩnzɩ nasɩnaza nɛ niidozo ɖɛwa lɛ, ɛɖʋ Yuda ñɩma paɣtʋ. Ɛlɛ́, tɩɩpɩzɩɣ tɩwɛɛkɩ mbʋ́ ɛɖʋwa se ɛlakɩ-ɩ yɔ. 18Yee pɩɩkɛ ḿbʋ́ yɔ, ɛɛlaba ɛyáa kʋjɔʋ se pɔɖɔŋ paɣtʋ yɔɔ. Pʋbʋ pɩɩwɩlaa se mbʋ́ ɛɖʋwa se ɛlakɩ Abraham yɔ, pɩtɛkɛ pʋ-yɔɔ ɛɖɔŋ. Ŋgʋ́, mbʋ́ ɛɖʋwa se ɛlakɩ-ɩ yɔ pʋ-yɔɔ ɛtɩŋnaa kpem nɛ ɛlabɩ-ɩ lootiye.
Paɣtʋ wazɩɣ ɛyáa alɩwaatʋ pazɩ yem
19Yee ḿbʋ́ lɛ, ɛbɛ yɔɔ Ɛsɔ ɖʋ paɣtʋ yɔ? Ɛɖʋ-tʋ se pɩtɩŋnɩ tɩ-yɔɔ nɛ ɛyáa tɩlɩ mbʋ́ pɩkɛ kɩwɛɛkɩm yɔ. Ɛɖʋ-tʋ ɖɔɖɔ se tɩwɛɛ ḿbʋ́ nɛ pʋkɔɔ pɩsɩɩnɩ alɩwaatʋ ndʋ́ palʋlɩ Abraham sayɩ weyi Ɛsɔ kaɖʋwa se ɛlakɩ-ɩ pʋyʋ yɔ. Paɣtʋ ńdʋ́ ɛcɛlɩ e-tiyiyaa. Paba ñatɩŋnɩ Mooyiizi yɔɔ nɛ powoni-tʋ ɛyáa. 20Ɛyáa naalɛ hɛkʋ taa weyi patɩŋɩɣnɩ ɛ-yɔɔ yɔ ɛwɛɛ. Weyi patɩŋɩɣnɩ ɛ-yɔɔ yɔ, ɛfɛyɩ wazaɣ ɛyʋ kʋɖʋm tɔm taa. Ŋgʋ́, Ɛsɔ ñɛwɛ e-ɖeke.
21Pɩwɩlɩɣ se paɣtʋ kʋyʋʋ mbʋ́ Ɛsɔ ɖʋwa se ɛlakɩ yɔ pʋ-yɔɔ yaa we? Toovenim lɛ, pɩtɛkɛ ḿbʋ́! Yee paaɖʋ paɣtʋ natʋyʋ nɛ tɩhaɣ ɛyáa wezuu yɔ, tɩɩpɩzaa nɛ tɩpɩsɩ-wɛ kʋtʋʋzaa Ɛsɔ ɛsɩndaa. Ŋgʋ́, pataɖʋ natʋyʋ ḿbʋ́. 22Ɛlɛ́, Ɛsɔtɔm wɩlɩ kpayɩ se kedeŋa yɔɔ ɛyáa kpeekpe wɛ kɩwɛɛkɩm nesi taa se pɩtɩŋnɩ Yesu Krɩstʋ yɔɔ lidaʋ wɛnaʋ yɔɔ nɛ Ɛsɔ la mbá pɛwɛnɩ-kʋ yɔ mbʋ́ ɛɖʋwa se ɛlakɩ yɔ.
23Pʋcɔ ɖɩwɛnɩ-kʋ lɛ, pɩwɛ ɛzɩ ɖɩɩwɛ salaka taa nɛ paɣtʋ cɔŋnɩ ɖɔ-yɔɔ nɛ pʋkɔɔ pɩsɩɩnɩ alɩwaatʋ ndʋ́ Ɛsɔ wɩlɩ-ɖʋ kʋ-nʋmɔʋ yɔ. 24Ḿbʋ́ paɣtʋ kɔcɔnɩ ɖɔ-yɔɔ nɛ pʋkɔɔ pɩsɩɩnɩ alɩwaatʋ ndʋ́ Krɩstʋ kɔma yɔ. Ɛkɔm se pɩtɩŋnɩ ɖe-lidaʋ ŋgʋ́ ɖɩwɛnɩ ɛ-yɔɔ yɔ kʋ-yɔɔ nɛ ɖɩpɩsɩ kʋtʋʋzaa Ɛsɔ ɛsɩndaa. 25Lɛɛlɛɛyɔ, ɖɩwɛnɩ lidaʋ Krɩstʋ yɔɔ. Pʋ-yɔɔ lɛ, paɣtʋ ɛɛtasɩɣ ɖɔ-yɔɔ cɔnaʋ.
26Mɩtɩŋa payɩ ɩkɛ Ɛsɔ piya: ɩwɛnɩ lidaʋ Krɩstʋ Yesu yɔɔ. 27Mbá mɩ mɩtɩŋa payɩ palabɩ lɩm sɔʋ sɔnzɩ Krɩstʋ yɔɔ yɔ, mɩ nɛ ɩ ɩpɩsɩ kʋɖʋm. 28Tayʋʋ nabʋyʋ fɛyɩ Yuda ñɩma nɛ mbá pɛtɛkɛ Yuda ñɩma yɔ, yomaa nɛ mbá pɛtɛkɛ yomaa yɔ, nɛ halaa nɛ abalaa, pɛ-hɛkʋ taa. Mbʋ́ pʋyɔɔ yɔ, mɩtɩŋa payɩ ɩpɩsɩ kʋɖʋm, mɩ nɛ Krɩstʋ Yesu mɩ-kpɛndʋʋ taa. 29Yee ɩkɛ Krɩstʋ ñɩma yɔ, pɩwɩlɩɣ ɖɔɖɔ se ɩkɛ Abraham sayɩnaa. Pʋ-yɔɔ lɛ, Ɛsɔ haɣ-mɩ mbʋ́ ɛɖʋwa se ɛhaɣ Abraham nɛ e-liɖe taa ñɩma yɔ.
Currently Selected:
Galaatɩ 3: KABI
Highlight
Share
Copy
Want to have your highlights saved across all your devices? Sign up or sign in