Tʋma Labʋ 6
6
Palɩzɩ ɛyáa lʋbɛ se pasɩnɩ Yesu tiyiyaa
1Alɩwaatʋ ńdʋ́ tɩ-taa lɛ, Yesu wayɩ tɩŋɩyaa kɛwɛɛ pɛtɛzɩɣ ɖɔʋ nɛ pa-taa Yuda ñɩma mbá pɔyɔɔdʋʋ Grɛɛkɩ yɔ, pemidiɣni mbá paba ñɔyɔɔdʋʋ Ebree yɔ pe-liŋ tɛɛ. Mbʋ́ pʋyɔɔ yɔ, paatasɩɣ tayɩnaʋ pe-lelaa tɔɔnaɣ paa evemiye nɖɩ́. 2Peeɖe Yesu tiyiyaa ḿbá pe-hiu nɛ naalɛ pekpeɣli Yesu wayɩ tɩŋɩyaa tɩŋa payɩ nɛ peheyi-wɛ se: «Pɩtamʋnɩ se ɖiyele Ɛsɔtɔm susuu nɛ ɖɩnɩɣnɩ tɔɔnaɣ tɔm. 3Pʋ-yɔɔ lɛ, taabalaa! Ɩcɔna nɛ ɩlɩzɩ mɩ-taa abalaa kɩbama lɔŋsɩnɖaa lʋbɛ mbá Fezuu Kiɖeɖeu wɛ pɔ-yɔɔ yɔ nɛ ɖɩɖʋ-wɛ tʋmɩyɛ ńɖɩ́. 4Đa ɖɛwɛɣ Ɛsɔ sɛʋ yɔɔ nɛ ɖisusuu ɛ-tɔm.»
5Peeɖe tɔm ńdʋ́ tɩlabɩ patɩŋa leleŋ nɛ palɩzɩ pa-taa abalaa lʋbɛ ɛzɩ peheyuu-wɛ yɔ. Ḿbá yɔ: Etiyɛɛnɩ, abalʋ ɛnʋ, ɛwɛnɩ lidaʋ Ɛsɔ yɔɔ siŋŋ nɛ ɛ́lɛ́ Fezuu Kiɖeɖeu wɛɛ ɛ-yɔɔ nɛ Filiipu nɛ Prokɔɔrɩ nɛ Nikaanɔɔrɩ nɛ Tiimɔɔ nɛ Parmenaasɩ nɛ Antɩyɔɔsɩ tʋ Niikolaa weyi ɛsɛɣaɣ Ɛsɔ ɛzɩ Yuda ñɩma nɛ pʋcɔ ɛpɩsɩ Yesu wayɩ tɩŋɩyʋ yɔ. 6Pɛtɛm-wɛ lɩzʋʋ ḿbʋ́ lɛ, powoni-wɛ tiyiyaa ḿbá pɔ-cɔlɔ nɛ paba sɛɛ pɔ-yɔɔ Ɛsɔ nɛ patɩnɩ pɔ-yɔɔ nesi.
7Ɛsɔtɔm tɛzaɣ cɔʋ paa le nɛ Yesu wayɩ tɩŋɩyaa ñɛtɛzɩɣ ɖɔʋ Yeruusalɛm nɛ halɩ pɩkpɛndɩnɩ cɔjɔnaa sakɩyɛ nɛ pɛwɛnɩ ɖɔɖɔ lidaʋ Yesu yɔɔ.
Pakpa Etiyɛɛnɩ
8Ɛsɔ kawazɩ Etiyɛɛnɩ yɔɔ nɛ ɛha-ɩ ɖoŋ nɛ ɛwɩlɩɣnɩ kawɩlɩsɩ nɛ ɛlakɩ hama lakasɩ sɔsɔsɩ ɛyáa hɛkʋ taa. 9Peeɖe nabɛyɛ kʋyɩ ɛ-yɔɔ. Ḿbá yɔ: Yuda ñɩma Ɛsɔ ɖɩsɛyɛ nɖɩ́ payaɣ se Puholimwaa ñɩnɖɛ yɔ ɖɩ-taa ñɩma. Pa-taa lɛ: Yuda ñɩma mbá palɩnɩ Siirɛɛnɩ nɛ Alɛksandrii nɛ lɛlaa mbá paba ñalɩnɩ Siliisii nɛ Aazii egeetiye taa yɔ. Pa nɛ Etiyɛɛnɩ pɔhɔŋaɣnɩ ɖama tɔm. 10Ɛlɛ́, patapɩzɩɣ se palabɩ-ɩ pʋyʋ, mbʋ́ pʋyɔɔ yɔ, ɛyɔɔdaɣnɩ lɔŋsɩnɖɛ nɖɩ́ Fezuu Kiɖeɖeu ha-ɩ yɔ. 11Peeɖe pɛtɛɣ ɛyáa se pɛcɛtɩnɩ ɛ-taa se: «Đɩnɩ ɛyɔɔdaɣ ɛzaɣ́tʋ tɔm Mooyiizi nɛ Ɛsɔ pɔ-yɔɔ!» 12Ɛlɛ́, pasazɩ ɛyáa samaɣ nɛ pɩkpɛndɩnɩ ɛjaɖɛ taa sɔsaa nɛ paɣtʋ wɩlɩyaa se pakʋyɩ ɛ-yɔɔ. Pʋwayɩ lɛ, pakpa-ɩ nɛ ɖoŋ nɛ powoni tɔm hʋyaa sɔsaa cɔlɔ. 13Paakpɛndɩnɩ ɛyáa mbá pɛtɛɣ-wɛ se pɛcɛtɩnɩ ɛ-taa yɔ nɛ paba lɩzɩ aseɣɖe se: «Abalʋ ɛnɛ, ɛwɛɛ ɛyɔɔdʋʋ ɛzaɣ́tʋ tɔm ɖɛ-Ɛsɔ ɖɩɣa nɛ Mooyiizi paɣtʋ pɔ-yɔɔ! 14Đɩnɩ ɛyɔɔdaa se Nazarɛɛtɩ tʋ Yesu kɔŋ yɔkʋʋ ɖɩɣa ŋ́gá nɛ piyele ɛlɛɣzɩ sɔnzɩ nzɩ́ Mooyiizi ɖʋ-ɖʋ yɔ.»
15Mbá patɩŋa paawɛ tɔm ɖɩhʋyɛ peeɖe yɔ, paakpɛzɩ ɛsɛ nɛ pɔcɔŋnɩ Etiyɛɛnɩ, nɛ pana ɛ-ɛsɩndaa. Ɛ-ɛsɩndaa kɛwɛ ɛzɩ Ɛsɔ tiyiyu nɔɔyʋ ɛsɩndaa yɔ.
Currently Selected:
Tʋma Labʋ 6: KABI
Highlight
Share
Copy
Want to have your highlights saved across all your devices? Sign up or sign in
