1 Kɔrɛntɩ 10
10
Mbʋ́ Izrɛɛlɩ ñɩma wezuu caɣʋ lakʋ taa wɩlɩɣ-ɖʋ yɔ
1Taabalaa, me-liu wɛɛ se ɩtɔzɩ mbʋ́ pɩɩlabɩ ɖɔ-cɔzɔnaa mbá nɛ Mooyiizi pɔɖɔŋaɣ yɔ pʋ-yɔɔ. Ɛsɔmɩnʋʋ#10.1 Ɛsɔmɩnʋʋ: ŋgʋ wɩlaɣnɩ se Ɛsɔ maɣmaɣ wɛ pɔ-cɔlɔ nɛ ehuuzuu pɔ-yɔɔ. kohuuzi patɩŋa payɩ pɔ-yɔɔ nɛ paɖʋ Teŋgu Kɩsɛmʋʋ nɛ palɩɩ patɩŋa payɩ pɛɖɛɛ. 2Pɩlabʋ ḿbʋ́ yɔ, pʋwɛ ɛzɩ palabɩ patɩŋa payɩ lɩm sɔʋ sɔnzɩ ɛsɔmɩnʋʋ tɛɛ nɛ Teŋgu Kɩsɛmʋʋ taa yɔ. Mbʋ́ pʋyɔɔ yɔ, pa nɛ Mooyiizi paakpɛndaa. 3Patɩŋa payɩ paatɔɔ tɔɔnaɣ ŋgá kalɩnɩ ɛsɔdaa yɔ 4nɛ pɔñɔɔ ɖɔɖɔ patɩŋa payɩ Ɛsɔ pɩyɛ nɖɩ́ ɖɩtɩŋaɣ pa-wayɩ yɔ ɖɩ-lɩm. Pɩyɛ ńɖɩ́ lɛ Krɩstʋ. 5Paa ḿbʋ́ yɔ, pa-taa ɛyáa sakɩyɛ taakɛdɩnɩ Ɛsɔ. Pʋ-yɔɔ pasɩbɩ lakʋ taa pɛɛbɛɛ.
6Ḿbʋ́ wɩlɩɣnɩ-ɖʋ se ɖɩtaasɔɔlɩ kɩdɛkɛdɩm labʋ ɛzɩ paasɔɔlʋʋ yɔ. 7Ɩtaanɩɩnɩ agɔlɩma kpɛyʋʋ ɛzɩ pa-taa lɛlaa yɔ. Pʋwɛ ɛzɩ pamaʋ Ɛsɔtɔm Takayaɣ taa se: «Ɛyáa caɣaɣ pɔtɔɔ nɛ pɔñɔɔ, pɛtɛma lɛ, pakʋyɩ pamayɩ amaya» yɔ. 8Pɩfɛyɩ se ɖɩla acɛyɛ ɛzɩ pa-taa lɛlaa kalabʋ yɔ. Mbʋ́ pʋyɔɔ yɔ, palabɩ ḿbʋ́ nɛ pa-taa ɛyáa kutokiŋ nɩɩlɛ nɛ naadozo tɔlɩ evemiye kʋɖʋmɖɩyɛ nɛ pasɩ. 9Ɖɩtaahɔ Kɩpaɣlʋ nɔɔ tam. Pɩfɛyɩ se ɖɩñɩnɩ nɛ ɖɩna tam ɛzɩma ɖɩpɩzɩɣ ɖɩla kɩwɛɛkɩm nɛ pʋcɔ ɛhɔ ɖa-nɩŋgbaŋʋʋ yɔ. Mbʋ́ pʋyɔɔ yɔ, ḿbʋ́ Izrɛɛlɩ ñɩma ḿbá pa-taa lɛlaa kalaba nɛ ɖʋmaa ñasɩ-wɛ nɛ pasɩ. 10Pɩfɛyɩ ɖɔɖɔ se imidi ɛzɩ pa-taa lɛlaa kemiduu nɛ sɩm tiyiyu kʋ-wɛ yɔ.
11Pɩlabɩ-wɛ ḿbʋ́ se ɖɩna nɛ ɖɩkpa ɖa-tɩ. Ńdʋ́ pamawa se pasɩɣzɩnɩ mbá ɖa ɖɩwɛ alɩwaatʋ ndʋ́ tɩwɩzɩ tɛm yɔ tɩ-taa yɔ lɔŋ. 12Pʋ-yɔɔ lɛ, weyi ɛmaɣzɩɣ se ɛsɩŋ ɛ-nasɩ taa yɔ, ɛkpa ɛ-tɩ nɛ ɛtaakɔɔ ɛtɔlɩ. 13Pɩtakɩɣ-mɩ takʋʋ mbʋ́ yɔ, pɩfɛyɩ ndɩ nɛ ɛyáa lɛlaa takʋʋ. Ɛsɔ tʋʋzaa. Ɛlakɩ mbʋ́ ɛɖʋwa yɔ. Eeyeki se pɩtakɩ-mɩ nɛ pɩɖɛɛ mi-ɖoŋ yɔɔ. Ɛlɛ́, alɩwaatʋ ndʋ́ pɩtakɩɣ-mɩ yɔ, ɛwɩlɩɣ-mɩ nʋmɔʋ ŋgʋ́ pʋwɛɛ se ɩtɩŋ nɛ ɩlɩɩ pɩ-taa yɔ.
Pɩfɛyɩ se Kɔrɛntɩ ñɩma ewolo latʋ
14Pʋ-yɔɔ lɛ, mɛ-ɛgbaɣdɩnaa, iyele agɔlɩma tɔm kpem. 15Mɔyɔɔdʋʋnɩ-mɩ ɛzɩ mbá pɛwɛ lɛɣtʋ yɔ. Mɩ-maɣmaɣ ɩmaɣzɩ ndʋ́ meheyiɣ-mɩ yɔ tɩ-yɔɔ nɛ ɩna. 16Kpɛndʋʋ caɖaɣ ŋgá ɖɩsɛɣ kɔ-yɔɔ Ɛsɔ yɔ, kaakpɛndɩɣ ɖa nɛ Krɩstʋ calɩm alɩwaatʋ ndʋ́ ɖɩñɔʋ-kɛ yɔ yaa we? Nɛ tindine nɖɩ́ ɖɩcɩyɩɣ yɔ, ɖɩɩkpɛndɩɣ ɖa nɛ Krɩstʋ tomnaɣ alɩwaatʋ ndʋ́ ɖɩtɔkɩ-ɖɩ yɔ yaa we? 17Ɛzɩma mbʋ́ tindine kʋɖʋmɖɩyɛ koŋ ɖɩtɔkɩ yɔ, ḿbʋ́ ɖɔɖɔ paa ɖɩɖɔwa yɔ, ɖɩkɛ tomnaɣ kʋɖʋmaɣ. Mbʋ́ pʋyɔɔ yɔ, ɖatɩŋa payɩ ɖɩtɔkɩ tindine kʋɖʋmɖɩyɛ ńɖɩ́.
18Ɩcɔnɩ Izrɛɛlɩ ñɩma nɛ ɩna: mbá pɔtɔkɩ mbʋ́ pala Ɛsɔ yɔ, pa nɛ kɩlaŋ ɖɩlayɛ pɛtɛkpɛndɩ pala kʋɖʋm naa we? 19Ndʋ́ mɔyɔɔdaa yɔ, tɩ-tɔbʋʋ se we? Tɩ-tɔbʋʋ se nandʋ ndʋ́ pala agɔlɩma yɔɔ yɔ, tɩkɛ pʋyʋ yaa we? Đɔɖɔ lɛ, agɔlɩma wena pala a-yɔɔ yɔ, akɛ pʋyʋ yaa we? 20Pa-taa nabʋyʋ tɛkɛ pʋyʋ. Ɛlɛ́, pʋ-tɔbʋʋ se mbʋ́ mbá paañaŋ Krɩstʋ yɔ palaɣ yɔ, aleewaa palaɣ-pʋ, pɩtɛkɛ Ɛsɔ. Ŋgʋ́, mɔntɔsɔɔlɩ se mɩ nɛ aleewaa ɩkpɛndɩ. 21Ɩɩpɩzɩɣ ɩñɔɔ Kɩpaɣlʋ sʋlʋm caɖaɣ nɛ ɩtɛ ɩñɔɔ aleewaa ñɩmbʋ caɖaɣ. Mɩ nɛ Kɩpaɣlʋ ɩɩpɩzɩɣ ɩkpɛndɩ ɩtɔɔ nɛ mɩ nɛ aleewaa ɩtɛ ɩkpɛndɩ ɩtɔɔ ɖɔɖɔ. 22Đɩcaɣ se ɖɩla ḿbʋ́ nɛ pukulusi Kɩpaɣlʋ sʋsɩ naa we? Ɛzɩ ɖakɩlɩnɩ-ɩ ɖoŋ naa we?
Mbʋ́ pʋwɛɛ se ɖɩla nɛ Ɛsɔ hɩɖɛ sɛɛ tam yɔ
23Toovenim lɛ: «Pɩha-ɖʋ waɖɛ se ɖɩla pɩtɩŋa.» Ɛlɛ́, pɩtɛkɛ pɩtɩŋa pʋwɛnɩ wazaɣ. «Pɩha-ɖʋ waɖɛ se ɖɩla pɩtɩŋa.» Ɛlɛ́, pɩtɛkɛ pɩtɩŋa piyekina se ɖɩpɩɩ Ɛsɔ nʋmɔʋ taa. 24Nɔɔyʋ ɛtaañɩnɩ ɛ-maɣmaɣ ɛ-kɛzɛɣa. Ɛlɛ́, ɛñɩnɩ lɛlaa ñɩŋga.
25Ɩpɩzɩɣ ɩtɔɔ mbʋ́ pɩtɩŋa payɩ pɛpɛdɩɣ kɩyakʋ taa yɔ. Ɩtaapɔzɩ mɩ-tɩ tɔm natʋyʋ pʋ-yɔɔ nɛ pʋkɔɔ piliɣti-mɩ. 26Mbʋ́ pʋyɔɔ yɔ, pʋwɛ ɛzɩ pamaʋ Ɛsɔtɔm Takayaɣ taa se: «Kɩpaɣlʋ tɩnɩ tɛtʋ nɛ mbʋ́ pɩtɩŋa payɩ pʋwɛ tɩ-yɔɔ yɔ.»
27Yee weyi ɛfɛyɩnɩ lidaʋ Krɩstʋ yɔɔ yɔ, ɛya-ŋ se ŋwolo ŋtɔɔ ɛ-tɛ nɛ ŋtalɩ yɔ, ŋpɩzɩɣ ŋtɔɔ mbʋ́ pɩtɩŋa pɔkɔŋnɩ-ŋ yɔ. Taapɔzɩ ña-tɩ tɔm natʋyʋ pʋ-yɔɔ nɛ pʋkɔɔ piliɣti-ŋ. 28Ɛlɛ́, yee nɔɔyʋ eheyi-mɩ se: «Nandʋ tʋnɛ tɩkɛ kɩlaʋ nandʋ» yɔ, weyi eheyi-mɩ ḿbʋ́ yɔ ɛ-yɔɔ lɛ, ɩtaatɔɔ. Pɩtɛkɛ ḿbʋ́, piliɣtiɣ-i. 29Pʋ-yɔɔ lɛ, pɩtɛkɛ ɛzɩma mbʋ́ piiliɣti-mɩ yɔ pʋ-yɔɔ mɔyɔɔdʋʋ cɩnɛ. Ɛlɛ́, ɛzɩma mbʋ́ piiliɣti lɛlʋ yɔ pʋ-yɔɔ mɔyɔɔdʋʋ.
Paa ḿbʋ́ yɔ, nɔɔyʋ lɩmaɣza ɛɛpɩzɩɣ pɩɖɩɣ nʋmɔʋ ŋgʋ́ pɩha-m se mala pʋyʋ yɔ. 30Yee manpɩzɩɣ se mansa Ɛsɔ mbʋ́ mɔntɔkɩ yɔ pʋ-yɔɔ lɛ, pɩlabɩ ɛzɩma ɛyáa kʋyʋʋ mɔ-yɔɔ mbʋ́ pʋ-yɔɔ mansaŋ-ɩ yɔ?
31Pʋ-yɔɔ lɛ, paa ɛbɛ ɩtɔkɩ yaa ɩñɔʋ yaa ɩlakɩ yɔ, ɩla pɩtɩŋa payɩ se Ɛsɔ hɩɖɛ ɛsɛɛ. 32Mi-wezuu caɣʋ taa lɛ, itaayele nɛ pɩtɩŋnɩ mɩ-yɔɔ nɛ Yuda ñɩma yaa mbá pɛtɛkɛ Yuda ñɩma yɔ yaa Ɛsɔ ñɩma pa-taa nɔɔyʋ tɔlɩ nʋmɔʋ ŋgʋ́ ɛɖɔŋ yɔ kɩ-taa. 33Ɩla ɖɔɖɔ ɛzɩ ma yɔ: mañakɩ pana se mɔn-tɔm ɛkɛdɩnɩ ɛyáa tɩŋa pɩtɩŋa pɩ-taa. Maañɩnɩɣ se piɖeni ma-maɣmaɣ. Ɛlɛ́, mañɩnɩɣ se piɖeni ɛyáa tɩŋa nɛ pɩya pa-ñʋʋ.
Currently Selected:
1 Kɔrɛntɩ 10: KABI
Highlight
Share
Copy
Want to have your highlights saved across all your devices? Sign up or sign in
