Íseáia 21

Turnamh na Bablóine

1Fáistine i dtaobh an mhachaire cois na farraige.

Gairfean chugainn

ar nós séideáin ag scuabadh an deiscirt,

ag teacht isteach as an bhfásach,

isteach as tír an uafáis

2- is scáfar an fhís a fuair mé -

tá fear na creiche i mbun creiche,

tá an sladaí ag slad.

“Suas leat, a Éalám,

suas chun an léigir libh, a Mhéideacha!

Cuirfidh mise críoch leis an gcaoineadh.”

3Is uime sin atá mo chorróga

ar bhall amháin creatha;

fuair na freanga greim orm,

mar bheadh freanga mná seolta;

tá mé róbhuartha le cloisint,

róscanraithe le feiceáil.

4Tá mearbhall ar mo chroí;

tá scaoll orm de bharr an chreatha;

an clapsholas a raibh mé ag dréim leis,

is cúis chearthaí dom é.

5Tá an bord á chóiriú

agus á chlúdach le héadach;

táthar ag ithe agus ag ól...

Suas libh, a cheanna feadhna!

Smearaigí bhur sciath.

6Óir seo an rud a dúirt an Tiarna liom:

“Gabh agus cuir fear i mbun faire,

fógraíodh sé an méid atá le feiceáil aige.

7Feiceann sé marcshlua,

marcaigh ina mbeirt agus ina mbeirt,

marcaigh ar asail, marcaigh ar chamaill.

Tá sé ag airdeall, ag airdeall go haireach.”

8Scairt an fear faire ansin:

“Ar thúr na faire, a Thiarna,

tá mé i mo sheasamh an lá ar fad,

agus oíche in aghaidh na hoíche i mbun mo gharda.

9Féach, seo chugainn an marcshlua,

na marcaigh ina mbeirt agus ina mbeirt.”

Agus tháinig an freagra ar ais:

“Tá sí ar lár, tá an Bhablóin ar lár,

agus dealbha a cuid déithe uile

ina smionagar ar talamh.”

10A phobal liom atá do do bhualadh

i do choirce ar an láithreán buailte,

an ní a chuala mé ó Thiarna na Slua, ó Dhia Iosrael,

is é atá á fhógairt agam duit.

Freagra ar Mhuintir Eadóm

11Fáistine i dtaobh Eadóm.

Táthar ag glaoch orm as Saeír:

“A fhir fhaire, cá fada fós an oíche?

A fhir fhaire, cá fada fós an oíche?”

12Is é freagra an fhir fhaire:

“Chugainn an mhaidin,

agus an oíche arís ina diaidh.

Más gá daoibh fiafraí, bígí ag fiafraí;

ach iompú thart is gá daoibh, agus filleadh.

Fáistine do na hArabaigh

13Fáistine fá choinne an mhachaire.

A bhuíonta fáin na nDéadánach,

arb é scrobarnach an mhachaire is ceathrúin oíche daoibh,

14tugaigí uisce libh in airicis lucht an íota;

a mhuintir Théamá, amach libh le bia ar chionn na dteifeach.

15Óir is ón gclaíomh atá siad ag teitheadh,

ó fhaobhar an chlaímh,

ón mbogha agus é lúbtha,

agus ó bhroid an chatha.

I gCoinne Chéadár

16Is ea, labhair an Tiarna liom mar seo: “Bliain amháin eile, a háireamh mar a dhéanfadh fear aimsire, agus beidh críoch le glóir agus le neart Chéadár. 17De líon lucht na mboghanna, de ghaiscígh chlann Chéadár, is beag a bheidh fágtha, óir is é an Tiarna, Dia Iosrael, a dúirt é.”

Currently Selected:

Íseáia 21: ABN

Highlight

Copy