Sefaniya 3
3
Kubisha kwa bene Jelusalemu ambobakalubulwa
1Mapensho kubene Jelusalemu
abo balyatilila babyaabo,
ee, kuJelusalemu ndabala yaashu itasalalite!
2Teenyumfwi maswi akwiicenjesha.
Teenyumfwi maswi akwiilulika.
Teecinkite manungo muMwaami Lesa
nabi kusenga lucafwo kuli nguwe.
3Bacinenenene ba njiyo bali anga ninkalamu shitoobuluma.
Boomboloshi ba njiyo bali anga mbaumpe balyabi
abo batashiyiiko cifuwa nabi comwi ayi bakalye ciilo.
4Balaluki ba njiyo mbeshikulisumpula,
mbantu batashomeki.
Bapailishi ba njiyo balabisha musena usalalite
Balasebensesha Milawo kwaamba ayi bacane mpindu.
5Sombi Mwaami Lesa ululeme ucili mundabala iyo.
Ulacita bululami, taaciti shilubo.
Uloombolosha cakutanyengelela bushiku abushiku.
Ciindi coonse taalilwi kucita boobo.
Sombi bataluleme balabisha cakubula nsoni.
6Mwaami Lesa waamba ayi,
“Ndanyonyoola mishobo imwi ya bantu.
Ndapwayoola shiyubilo shabo shiyumu.
Ndashiya mikwakwa yabo kaayumwitebo,
ee, taaku muntu nabi womwi wiindaamo.
Ndanyonyoola mandabala abo.
Taamu muntu nabi womwi wacaalaamo.
7Ndakaambila ndabala iyo ayi, ‘Ncakwiila ulaakunoonda
kushikila ukasumine kululamikwa!’
Mukucita boobo ndabala iyo teshi ikanyonyoolwe
alimwi teshi nkeepe mulandu weelete,
sombi balisuni kubisha muli shoonse isho nshebacita.”
8Mwaami Lesa waamba ayi,
“Amulindile bushiku mbweshi nkanyamuke kushinina mishobo.
Ntooyeeya kwaamba ayi mbunganye mishobo yoonse,
akuyobolola malelo oonse.
Ndaakutila bukali bwangu pali mbabo,
ee, bukali bwangu buyoosha.
Ncakwiila cishi coonse ca panshi cilaakushukuta
kubukali bwangu bunyaka anga ngumulilo.
9“Ono ndaakusandula bwikaalo bwa bantu ba mumishobo imwi
kwaamba ayi boonse bakanoopaila kuli ndime
akunoosebenselabo ndime neenka camoyo womwi.
10Ncakwiila nabi kwitala lya milonga ya kuKushi,
bantu banambila,
ee, bantu bangu bakapalanganina mucishi,
balaakwisa mukubenga milambu kuli ndime.
11Pabushiku bweenka ubo mwebo nobene Jelusalemu
teshi mukalenshekwe nsoni
pashintu isho nshemwakambishisha.
Nebo ndaakukusha beshikulisumpula boonse mundabala yanu.
Teshi mukambukilewo tubili pakalundu kangu kasalalite.
12Ndaakushiyamobo beshikulibombya abeshikuliceesha mundabala yanu,
ee, bantu abo bacinkite manungo muliina lyangu nebo neMwaami Lesa.
13Bene Isilaeli beshi bakacaaleewo teshi bakabisheewo.
Teshi bakaambewo shabubeshi
alimwi teshi bakeeleshewo kucenjeeka bamwi.
Balo balaakunooswitilila akwikala cakuliiba,
ncakwiila taaku muntu weshi akabaloondeshe.”#Ciyu 14:5
Lwiimbo lwakusangalala
14Koimba ondabala ya Siyoni!
Koolobesha webo oIsilaeli!
Kosangalala akusekelela amoyo wako woonse
webo ondabala ya Jelusalemu!
15Mwaami Lesa wakacileka kukupa mulandu.
Wakatandaanya balwani bako boonse.
Mwaami Lesa, Mwaami wa bene Isilaeli, uli awebo.
Teshi ukaloondewo tubili cibiibi cili coonse ceshi cikakupolele.
16Bushiku bweenka ubo balaakwaambila Jelusalemu ayi,
“Utaloondi webo ondabala ya Siyoni.
Utalefuki kuboowa.
17Mwaami Lesa, Lesa wako uli awebo.
Ulicite nkusu shakukufuna.
Ulaakukondwa abuumbi muli ndiwe.
Ulaakukuletela buumi bupya mulusuno lwakwe.
Ulaakusangalala pali ndiwe mukwiimba nyimbo
18bweenka mbobacita bantu pakusekelela.”
Mwaami Lesa waamba ayi,
“Ndaakukusha mapensho kuli ndiwe
Ncakwiila ndaakukusha musebaanyo wako.
19Paciindi ico ndaakupa mulandu abo bakalinga kukulyatilila.
Ndaakufuna balema boonse
akubunjika boonse bakapalanganishilwa mubusha.
Ndaakulengesha bantu kubalumbaisha akubalemeka
mushishi shoonse umo mobakasebaanishikwa.
20Paciindi ico ndaakubunjika bantu bako
akuboosha bantu bako bakapalanganishikwa kucishi cine mishaabo.
Ndaakulengesha bantu ba mucishi ca panshi coonse kukulemeka akukulumbaisha.
Ndaakukulengesha kuswitilila alimwi.
Nebo neMwaami Lesa ndaamba.”
Currently Selected:
Sefaniya 3: BBBLI
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.