Busongo Bwakwe Solomoni 19
19
Kulweenge Lusalala
1Ono bantu batanyumfwili Lesa
balaakupengaabo bukali bwako
butacite nkumbu,
ceebo Lesa wakashibila limwi
shamicito yabo yakunembo.
2Wakalinga kwishi ayi nabi
bantu abo wakabasuminisha kuya,
cakufwambaana kunyamuka,
pesule balaakusanduka amiyeeyo
yeshi akabawiite.
3Nabi kabacili mubuumba amalilo
abantubabo bakafwa,
bakasumina miyeeyo umwi yabuluya.
Bakakonkela anga mbantu beshikuloboka
abo bakasenga ayi basweeko.
4Mamanino akalinga kweelete
kubakwela kwaamba ayi bacite
shintu isho shakubalubya shakacitika kale,
kwaamba ayi petala lyamapesho abo
amwi bakaliletela lipesho lyomwi lyakacaalaawo.
5Peenka apo wakaamba ayi bantu
bako batolelele mulweendo lwabo lukankamika,
balwani abo bacane lufu lutaambiki.
6Bukaalo bwashilengwa shoonse
bwakasanduka kuba bwonoono
pakukonkela mulawo wako,
kwaamba ayi banabako batakacani
mapesho ali oonse.
7Pakaboneka likumbi lyakafwekelesha misumba yabo,
apo pakalingabo maanshi eenka pakaba
nshila yakwiindaawo pakati kaLweenge Lusalala,
ayalo nshila iyumu iyo yakaba amaaba akali.
8Lyalo lyaansa lyako lyakabafuna
anga ngumukowa womwi,
bakeenda kabalangilisha shankamiko shako.
9Bakaba anga ngamaaki aya ceenda mumafulo,
bakalinga kusotooka sotooka anga
mbaana bambelele kabakulumbaisha webo
oMwaami Lesa oMupulushi wabo.
10Bakalinga kuyeeya nshintu
shakacitika kabali mucishi cabweensu,
ico cakalinga kucite banyama,
alimwi cakalinga kucite mansenya,
mulonga kootacite nswi sombi babombwe baanji.
11Pesule wakabona abayuni bamushobo wonoono,
paciindi nkosha yabo ndiyakabacata
bakutalika kusenga cakulya cibotu abuumbi.
12Peenka apo bakwale bakalinga kuswa
kuLweenge ayi banoobalya kabakuta.
Lupesho pabene Ijipiti
13Lyalo mapesho akabapolela bantu babiibi,
ndibakabacenjesha amapesho tulesa tubyata
bakabapenshekwa kweelana akubisha kwabo,
mukwiinga bakabonesha lupato kubeensu.
14Palya bantu bamwi bakalinga kukaka kutambula
beensu bakalinga kwisa kuli mbabo,
bakalinga kubalenga busha abo
beensu bakalinga kubacitila shibotu.
15Teshi peenka apo sobwe,
lyalo bataanshi abo kupensha
kwamushobo uyu kulakubawita
paceebo cakutambula beensu cibiibi.
16Sombi bantu bamwi aba
bakatambula beensu kabakondetwe,
akwaabana shibotu shebakalinga kucite,
kwamana kabapensha amilimo iyumu.
17Beshikubisha abo bakabapensha pakubapofoola,
bweenka mbuli babalya bataanshi,
abo bakalinga kwikala kabashingulukite
pamulyango wabaluleme.
Peenka apo munshinshe uyoosha wakabafwekelesha,
uli woonse kayandoola nshila yakumulyango
wakwe.
Maswi akwelaako
18Shilengwa shakashintana bwikaalo,
mbuli kulila kankobele,
mukumo uli woonse ulicite mbonyumfwika wiine,
sombi kwiimba kulishiyene.
Shoonse ishi shilaboneka
kabotu pakubona shakacitika.
19Banyama bamuluundu bakasanduka
baba bamumaanshi,
abo bakalinga kwikala mumaanshi bakaya muluundu.
20Mulilo wakabika nkusu shanguwo amumaanshi moonse,
lyalo maanshi akalubako nkusu shakushimya mulilo.
21Mpashi cibilibili camulilo
tecakalinga kutenta minyemfu
yatulongolo twakalinga kweenda pakati kanguwo,
taakwe kusungulula cilyo cibombu
cakwiculu cili anga ngamaanshi makaasa.
22Webo oMwaami Lesa,
wakapa mulemu kumushobo
wabantu bako pashoonse.
Tookwe kucileka kubacafwa nshiku
shoonse pamusena pali poonse.
Currently Selected:
Busongo Bwakwe Solomoni 19: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.