Busongo Bwakwe Solomoni 17
17
Munshinshe waku Ijipiti alikumbi lyakalinga kubala
1Boomboloshi bwako mbwapalaale
alimwi tabupanduluki,
paceebo ceeco bantu bataiite balasoweka.
2Palya bantu batanyumfwi
bakayeeya ayi baanga bantu banu mubusha,
balo beene kabakondetwe amunshinshe
abangitwe muciindi cilaafu.
Bakalinga anga mbantu mbobakacalila muŋanda yabo abo batakalinga kucite
kulamwa kwamuyayaya kwakwe Lesa.
3Ndibakalinga kuyeeya kwaamba ayi shibiibi shabo,
abo mbobakabika patuba,
bakalinga kutashibikitwe
alimwi batebalukitwe,
anga shintu shicitikila mubushishi,
beene abo bakamwayikana paceebo
ca boowa buunji,
alimwi bakapenga pakubona bashikaswa.
4Nabi mucipinda umo bakacicila
tabakwe kucileka kuba aboowa,
pakwiinga ciyobeyobe cikankamika
cakalinga kunyumfwika koonse koonse.
Alimwi abashikaswa bayoosha bashiwa
shibiibi bakalinga kubabonekela.
5Mulilo tewakalinga kucite nkusu shakubamunikila,
nabi kubala kanyenyeenshi
kwakaala kubalisha mashiku ayo aloondesha.
6Ceenka cakalinga kubabonekela
ngumulilo uloondesha, wakalinga kubilima,
akwalo kuboneka kwanguwo
kwakalinga kumweka cakuyoosha,
ceebo caboowa bakalinga kuyeeya ayi
ishi shetutoobona nshintu shibiibi abuumbi.
7Bwanga bwabo bwakaalilwa,
kucenjela kwabo taaku mbobwakalinga
abo mbobakalinga kuyeeya bakababo ansoni.
8Balo bakaamba ayi balakuyumya
myooyo baloonda baboowa,
sombi balo mbobakaciswa aboowa bwiindilila.
9Nabi tekwakalinga kantu
kakubaloondesha sombi shinyama
shakalinga kweendaana ansoka
shakalinga kulilisha shakabaloondesha,
10lyalo bakalinga kuyuminabo aboowa,
bakalinga kuloonda akucalula
meenso abo nabi paniini,
cakalinga kwaala.
11Bantu babiibi liinjiliinji bomwa,
bukamboni bwabo bulabapikisha.
Muntu mubiibi, moyo wakwe ulamupensha
kukumya shitomupensha.
12Boowa teeshi kantu kamwi
sombi nkwaalilwa kutambula lucafwo luswita kubusongo.
13Alimwi kubula lucafwo
kulaakukomena akufusha boowa
bwabantu bateeshi caleta mapesho
14Balo balya baloonabo tulo
twamushobo womwi ciindi coonse
camunshinshe uyo uswita kucishi
ca paanshi cabantu bafwite,
liinjiliinji munshinshe uyu
tewakalinga kucite nkusu pali mbabo.
15Sombi balo ciindi bakalinga
kuyeeya ayi mbashikaswa bayoosha babatandaanya.
Cimwi ciindi mibili yabo yakalinga
kuyuma akubula nkusu,
ceebo caboowa butaambiki bwakabawita.
16Lyalo boonse bakalingaawo
bakalinga kuwa paanshi,
anga mbantu baangitwe
muntolongo itacite cisasa.
17Nabi mulimi ndabona mweembeshi,
cimwi ciindi muntu usebensa ncito yamulundu,
boonse abo shakabawiita,
tabakwe kushileyaawo,
pakwiinga boonse bakangwa
abunyololo bomwi bwamumunshinshe.
18Kupupa kwamuuwo,
kwiimba kubotu kwatuyuni
pamisampi inshikite,
kuwoota kwamaanshi atookunka cankusu,
19mpanshi ncoongo cinyumfwika
kulaale lya mabwe akomooka,
kucica kwabanyama basotoka
muumbu shitabwenekete,
kubuluma kwashinyama shiyoosha,
kunyumfwika liswi liboolela mumalundu,
shoonse isho shakabaletela boowa.
20Ciindi ceenka ico pano
pacishi capaanshi pakalinga
kubala cakusangalasha,
lyalo bantu bakalinga kusebensa
ncito yabo mwakutapenga.
21Babiibi bakalinga mumunshinshe
wakabaako pabushiku bumwi.
Sombi balo abo bakalilemesha kwiinda mumunshinshe uyo.
Currently Selected:
Busongo Bwakwe Solomoni 17: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.