Bene Filipi 4
4
Milasho imwi
1Ono mwebo nobamakwesu, nomusunikwi alimwi ndamuyeeya abuumbi. Mwebo mulansangalasha. Paceebo ceeco ndatangala cankusu ceebo ca ndimwe. Anu ubo nobamakwesu mbomweelete kuyuma muMwaami.
2Ntoosenga Yuwodia aSintiki kwaamba ayi banoonyumfwana mukwiinga mbamukowa muMwaami. 3Ndakusenga alimwi webo omweensuma muncito kwaamba ayi ubacaafwe balutundu aba. Bakasebensa camaansa obilo anebo mukushimikila Makani Abotu, kubikaawo aKilementi abamwi boonse mbondakalinga kusebensaabo abo bacite meena alembetwe mulibuku lya buumi.
4Amusangalale muMwaami lyoonse alimwi ndaamba ayi, amusangalale!
5Amutondeshe buumi bwakulibombya kubantu boonse ceebo Mwaami Jesu uli pafwaafwi kwisa. 6Mutanoolisukama pacintu nabi comwi, sombi mumipailo yanu yoonse amusenge shintu shoonse nshemutacite kuli Lesa. Kamusenga amoyo wakulumba lyoonse. 7Aboobo luumuno lwakwe Lesa ulo lwiinda pabusongo bwa bantu boonse, lulaakulama myoyo yanu alimwi amiyeeyo yanu muli Klistu Jesu.
8Cakweelaako nobamakwesu, kamuyeeya shintu isho shibotu sheelete kulumbwa, mbuli shintu shalushinisho, shilemekwa, shiluleme, shitacite kampenda, shiboneka kabotu alimwi ashintu shoonse shabulemu. 9Kamucita shintu nshemwakeeya akutambula kuswa kuli ndime, kubikaawo anshemwakanyumfwa alimwi anshemwakabona kaancita. Lyalo Lesa upa luumuno ulaakuba amwebo.
Paulo mbwaakalumba shipo nshibaamupa
10Ndisangalete abuumbi muMwaami kwaamba ayi ciindi cilaamfu mbuli ceeci ceenda, mwatalika alimwi kutondesha ayi mulanjeeya. Nshintokwaamba ayi mwakalinga mwacileka kunjeeya, sombi mwebo mwakabulabo ciindi cakwaamba ayi muntondeshe. 11Nshintokwaamba boobo mukutongooka kwaamba ayi kuli ncendabula mukwiinga nebo ndakeeya ayi nkooncite nkaanji. 12Ndibwishi bukandu alimwi abubile, mushoonse ndakeeya cintu cishisitwe ciliimo, nkutatongooka mukukuta nabi kufwa nsala, mukuba ashiinji nabi kubula. 13Ndakonsha kucita shintu shoonse mukwiinga Klistu ngoompa nkusu.
14Nakubi boobo mwakabotesha kuncafwa mumapensho angu. 15Mwebo nobene Filipi, mulishi kabotu kwaamba ayi nebo ndindakaswa kuMakedoniya munshiku shitaanshi shakushimikila Makani Abotu, tepakalinga coonde nabi comwi cakancafwa pasheesho nshindakalinga kweelete kulipila akutambula. Ncakwiila ndimwebo nweenka. 16Ndindakalinga kuTesalonika, mwakantumina lucafwo loonse ndundakalinga kusuni paciindi aciindi.#Mili 17:1#2 Koli 11:9 17Teshi kwaamba ayi ndisuni kunootambulabo shipo, sombi ayi mpindu yanu ikomeneneeko. 18Ndakatambula shoonse nshimwakantumina, kwalo kwiine shafula. Ndicite shoonse shiyandika mukwiinga ndatambula kuswa kuli Epafuloditasi shoonse nshimwakantumina. Ishi shilibo anga ncipo cinunkila kabotu capekwa kuli Lesa, mulambu uyo utambulwa kuli nguwe alimwi ukondelesha.#Kulo 29:18 19Paceebo ceeco, Lesa wangu ulaakumupa shoonse nshemubula kwiinda mububile bwakwe buunji bwa muli Klistu Jesu. 20Kuli Lesa Ishiwesu akube bulemu lyoonse alyoonse. Ameni!
Kwaansha kwakweelaako
21Amubaanshe boonse bantu bakwe Lesa muli Klistu Jesu. Bamakwesu boonse bali anebo bamwaansha. 22Bantu bakwe Lesa boonse kuno bamwaansha, bunene bunene abo basebensa kuŋanda ya Muleli munene wa kuLoma. 23Luse lwa Mwaami Jesu Klistu lube amwebo noonse.
Currently Selected:
Bene Filipi 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.