Mateyo 20

Cikoshanyo ca basebenshi

1“Mukwiinga Bweene bwa kwiculu bulikoshenye amuntu wakafuma macuunsa, kuya mukwinjisha bantu beshikusebensa mumuunda wakwe wa minyansa. 2Ono ndibakasuminishanya abasebenshi ayi bafole lyaali lyomwi lyeelete pabushiku, wakabatuma mumuunda wakwe. 3Paciindi ca 9 koloko, muntu uyu wakaya kumushika akucana bamwi bakalinga kushiitebo. 4Wakabaambila ayi, ‘Amwebo kamuya kumuunda wangu mukasebense, ntoomufolesha maali eelete.’ 5Aboobo bakaya. Muntu uyu wakacita bweenka ubo paciindi lisuba ndilyakashika pakati kamutwi alimwi aciindi ca 3 koloko. 6Lisuba ndilyakashika paciindi cinjila ŋombe, wakaya alimwi, wacaana abamwi kabashiitebo. Mpeeke wakabeepusha ayi, ‘Ceebonshi mulishiitebo lisuba lyoonse ili?’ 7Abalo bakakumbula ayi, ‘Mukwiinga taaku muntu watwinjisha ncito.’ Lyalo wakabaambila ayi, ‘Anu amwebo kamuya mukasebense kumuunda wangu wa minyansa.’

8“Ndilyakaba macolesha, mwine muunda wakaambila mubanshi wakwe ayi, ‘Beete boonse basebenshi ubafoleshe. Utalikile kubaabo bacaalila kwisa, ndyeshi uboole kubaabo bataanguna.’#Bene Lefi 19:13; Duto 24:15 9Mpeeke abo bakatalika linjila ŋombe kusebensa, bakafola lyaali lyomwi lyomwi. 10Ono balya bakataanguna kusebensa ndibakashika, bakalinga kuyeeya ayi mpashi batoofola maali aanji. Sombi abalo bakafola lyaali lyomwi lyomwi. 11Ndibakamana kufola, bakatalika kutongookila mwine muunda, 12kabaamba ayi, ‘Aba bacaalila basebensabo ciindi ciniinibo, ono mwebo mwabafolesha maali eenka ngomwatupa aswebo netwasebensa akupya kulumwi lisuba lyoonse.’

13“Lyalo wakakumbulawo womwi ayi, ‘Ndaba, nshikwe kukubishisha, sobwe. Sa tatukwe kusumininshanya palyaali lyomwi? 14Bwesabo lyaali lyako unooya. Ndime nemwiine ndasala kupa wooyo wacaalila bweenka mbuli mbondakufolesha awebo. 15Sa nsheelete kucita mbuli mboonsuni pabuboni bwangu? Mpashi wamfwita munyono mukwiinga nshisalululi pakupa?’ ” 16Lyalo Jesu wakaamba ayi, “Bacaalishi balaakuba bataanshi, abalo bataanshi balaakuba bacaalishi.”#Mate 19:30; Maako 10:31; Luka 13:30

Jesu mbwaakaamba shalufu lwakwe lyatatu

(Maako 10:32-34; Luka 18:31-34)

17Ono Jesu ndyaakalinga kuya kuJelusalemu, wakatola bashikwiiya bakwe bali likumi abobilo palubasu akubaambila kabaaya bweenda ayi, 18“Tutooya kuJelusalemu uko MwanaaMuntu nkweshi bakamwaabe kubamatanjilili ba bapailishi abafundishi ba Milawo. Balaakumupingula ayi acaikwe 19akumwaaba kubaswamashi bakunsengwe. Balaakumuwela, kumukwiipa akumupopa pamucilingano. Sombi pabushiku bwatatu ulaakubushikwa kuswa kubafu!”

Muka Sebedi mbwaakasengela bana bakwe

(Maako 10:35-45)

20Mpomunyaawo muka Sebedi, abana bakwe basankwa bobilo, wakaya kuli Jesu, wafukama kunembo lyakwe ayi asenge cimwi cintu. 21Lyalo Jesu wakamwiipusha ayi, “Utooyandanshi?” Alakwe wakakumbula ayi, “Amushomeshe ayi bana bangu basankwa bobilo aba, bakekale umwi kululyo lwanu, aumwi kucipiko muBweene bwanu.” 22Sombi Jesu wakabaambila ayi, “Tamwishi ncemutoosenga. Sa inga mwanwita munkomeshi ya mapensho njeshi nkanwiteemo?” Abalo bakakumbula ayi, “Ee, inga twacikonsha.” 23Mpeeke Jesu wakabalwiita ayi, “Ncakwiila mulaakunwitaamo munkomeshi iyo, sombi nebo nshicite nkusu sha kusala wooyo eshi akekale kululyo lwangu nabi kucipiko. MbaTa beshi bakape misena iyi kubaabo mbobakabambila.”

24Ono bashikwiiya bamwi likumi, ndibakanyumfwa makani aya, bakakalalila bashikwiiya bamukowa bobilo balya. 25Mpomunyaawo Jesu wakabeeta bashikwiiya boonse akubalwiita ayi, “Mwebo mulishi ayi baami ba baswamashi bakunsengwe balabonesha bwaami pali mbabo, abalo beendeleshi babo mbweeke ubo. 26Sombi tabwishi mbocibete ubo pali ndimwe. Uyo woonse usuni kuba munene pali ndimwe, ulyeelete kuba musebenshi wanu.#Luka 22:25-26 27Ncakwiila uyo woonse usuni kuba mutanjilili pali ndimwe, ulyeelete kuba musha wanu.#Mate 23:11; Maako 9:35; Luka 22:26 28Amube bweenka mbuli MwanaaMuntu utakwe kwisa mukusebenselwa, sombi mukusebensela bamwi alimwi akwaaba buumi bwakwe kwaamba ayi alubule bantu baanji.”

Jesu mbwaakashilika basankwa boofu bobilo

(Maako 10:46-52; Luka 18:35-43)

29Jesu abashikwiiya bakwe ndibakalinga kuswa muJeliko, bantu baanji baanji bakamukonkela. 30Ono basankwa bobilo boofu bakalinga kushiite mweela nshila, ndibakanyumfwa ayi nguJesu utokwiinda, bakoolobesha ayi, “Nkambo, nobana babo baDefedi amutunyumfwileko nkumbu!” 31Bantu bakakalalila boofu balya akubaambila ayi boomune. Sombi balo bakeendilishaawo koolobesha ayi, “NoBana babo baDefedi! Nkambo amutunyumfwileko nkumbu!” 32Mpomunyaawo Jesu wakeemikana akubeeta. Wakabeepusha ayi, “Nciinshi ncemusuni ayi mucitile?” 33Abalo bakakumbula ayi, “Nkambo, tulisuni kwaamba ayi tutalike kubona.” 34Mpomunyaawo Jesu wakabafwita nkumbu akucata pameenso abo. Paciindi ceenka ico bakatalika kubona, akumukonkela.

Currently Selected:

Mateyo 20: BBBLI

Highlight

Copy