Luka 4

Kusunkwa kwakwe Jesu

(Mate 4:1-11; Maako 1:12-13)

1Jesu wakaswaako kuMulonga wa Joodani kaaswite Mushimu Usalashi uyo wakamutanjilila kuya muluyanga. 2Umo muluyanga wakekalaamo nshiku makumi one kaasunkwa aMubiibi, sombi akaya mulomo. Lyalo nshiku makumi one ndishakamana wakafwa nsala. 3Lyalo Mubiibi uyo wakamwaambila ayi, “Na uli Mwanaakwe Lesa, ambila libwe ili lisanduke cakulya.” 4Sombi Jesu wakakumbula ayi, “Cililembetwe muMalembo akwe Lesa ayi, ‘Muntu taabi abuumi mukulyabo kweenka.’ ”#Duto 8:3

5Kuswawaawo Mubiibi uyo wakamutola peculu lya kalundu kalaamfu akumutondesha malelo oonse a mucishi ca panshi muciindi ciniinibo. 6Lyalo wakaambila Jesu ayi, “Buleelo boonse ubu ntookupa alimwi abubotu bwa mbubo, mukwiinga boonse bwakapekwa kuli ndime. Ndicite nkusu shakupa muntu oonse ngoonsuni. 7Nkokwaamba ayi na webo ufukame akunambila, boonse buleelo ubu butooba bwaako.” 8Sombi Jesu wakamukumbula ayi, “Cililembetwe muMalembo akwe Lesa ayi, ‘Ulyeelete kulambila Mwaami Lesa wako alimwi akusebenselabo nguwe.’ ”#Duto 6:13 9Kuswawaawo Mubiibi wakatola Jesu kuJelusalemu akumubika pakansunswa ka Ŋanda yakwe Lesa. Mpeeke wakaambila Jesu ayi, “Na uli Mwanaakwe Lesa liwaale panshi 10mukwiinga cililembetwe muMalembo akwe Lesa ayi, ‘Lesa ulaakutuma baanjelo bakwe kwaamba ayi bakakubaake,’ 11alimwi ayi, ‘Balaakukubaka kwaamba ayi utacisi cimpanta cako kulibwe.’ ”#Kulu 91:11-12 12Jesu wakamukumbula ayi, “Cililembetwe muMalembo akwe Lesa ayi, ‘Utasunki Mwaami Lesa, Lesa wako.’ ”#Duto 6:16

13Mubiibi uyo ndyaakamana kusunka Jesu munshila shoonse, wakamushiya akuyeeya kumusunka ciindi cimwi.

Jesu mbwaakatalika ncito yakwe muGalili

(Mate 4:12-17; Maako 1:14-15)

14Jesu wakaboolela kuGalili Mushimu Usalashi kauli anguwe. Wakaya mpuwo mucishi coonse cilya. 15Wakalinga kwiisha mushoonde sha baJuda akulumbwa kubantu boonse.

Jesu mbwaakakakwa kuNasaleti

(Mate 13:53-58; Maako 6:1-6)

16Jesu wakashika kuNasaleti uko nkwaakakulila. Mpeeke kweelana ambwaakalinga kushibite, pabushiku bwakookesha bwa Cibelu wakaya kucoonde ca baJuda. Wakanyamuka kwaamba ayi abelenge Malembo akwe Lesa kubantu. 17Mpeeke wakapekwa ayi abelenge maswi akwe Lesa akalemba Isaya mulaluki mukulukulu. Lyalo wakacalula pakalinga kulembetwe ayi,

18“Mushimu wa Mwaami Lesa uli pali ndime,

mukwiinga wansala kwaamba ayi nshimikile Makani Abotu kubakandu.

Wantuma kwaamba ayi ŋambilishe lwaanguluko kubaabo baangitwe

akucita kwaamba ayi boofu balashe

akulubula baabo bapenshekwa.

19Wantuma akwaambilisha ayi uno ngomwaaka

Lesa ngweshi akapulushisheemo bantu bakwe.”#Isa 61:1-2

20Mpomunyaawo wakacala libuku akulipa musebenshi wa mucoonde ca baJuda akwikala panshi. Mpeeke boonse bakalinga mucoonde bakamulangishisha. 21Lyalo wakabaambila ayi, “Sunu malembo aya acitika cancinencine kweelana ambomwaanyumfwa kaabelengwa.” 22Boonse bantu bakamusuminisha cakukondwa alimwi bakakankamana ambwaakaamba makani cabusongo. Balo bakatalika kwaamba ayi, “Sa te ngomwanaakwe Josefu uyu?”

23Mpomunyaawo wakabaambila ayi, “Mulaakuŋambila kashimpi aka ayi, ‘Omushiliki lishilike omwiine,’ alimwi mulaakuŋambilaawo ayi, ‘Nshiwakacita kuKapenaumu nshitwakanyumfwa, shicite akwalo kuno kucishi cine mishaanu.’ ” 24Wakabaambila alimwi ayi, “Ncakwiila ntoomwaambila ayi taakuuwo mulaluki ulemekwa mucishi cine mishaabo.#Joni 4:44

25“Ono amunyumfwe, kwakalinga bamukalubinje banakashi baanji mulya muIsilaeli munshiku shakwe Elija mulaluki mukulukulu, ndikwakabula mfula myaaka yotatwe amyeenshi yosanwe awomwi, kwakaba nsala inene mucishi coonse.#1 Baami 17:1 26Elija taakwe kutumwa kumuntu uli woonse mucishi ca Isilaeli, sombibo kumukalubinje wa kuSaleputa mucishi ca Sidoni.#1 Baami 17:8-16 27Mbweeke ubo kwakalinga bakalinga kuciswa manata baanji muIsilaeli munshiku shakwe Elisha mulaluki mukulukulu. Ono sombi Naamani wa kuSilya eenkabo ngowakasalashikwa akuba kabotu.”#2 Baami 5:1-14

28Ingayi banyumfwe boobo, bantu boonse bakalinga mucoonde ca baJuda bakakalala. 29Mpeeke banyamuka akutaanya Jesu kumukusha mundabala ilya, kuswawaawo bakamutola peculu lya kalundu pakalinga kuyakitwe ndabala yabo, kabasuni kwaamba ayi bamuwaale panshi. 30Sombi lakwe wakeenda pakati ka bantu akunooya mwiine eenka.

Jesu mbwaakakusha shikaswa mumuntu kuKapenaumu

(Maako 1:21-28)

31Mpomunyaawo wakaya kuKapenaumu ndabala ya mucishi ca Galili. Uko wakalinga kwiisha bantu pabushiku bwakookesha bwa Cibelu. 32Boonse bakakankamana abuumbi ndibakanyumfwa kwiisha kwakwe, mukwiinga maswi akwe akalinga abulemu ankusu.#Mate 7:28-29 33Mucoonde ca baJuda mulya mwakalinga muntu wakalinga kucite shikaswa wakoolobesha aliswi linene ayi, 34“Anu twamucitanshi mwebo nobaJesu ba kuNasaleti? Sa mwesa mukutunyonyoola? Ndimwishi ndimwe wooyo Usalalite uswa kuli Lesa!” 35Lyalo Jesu wakakalalila shikaswa ayi, “Umuna swa muli nguwe!” Shikaswa wakamuwisha panshi pakati ka bantu akuswa muli nguwe cakutamucisaawo.

36Bantu boonse bakakankamana akwiipushanya ayi, “Anu ngomaswinshi aya? Ncakwiila lakwe ulaambila bashikaswa cankusu abalo balamunyumfwila baswaamo!” 37Aboobo mpuwo yakwe yakanyumfwika kumisena yoonse yakalinga kushingulukite cishi cilya.

Jesu mbwaakashilika bantu baanji

(Mate 8:14-17; Maako 1:29-34)

38Lyalo Jesu wakaswaamo mucoonde ca baJuda akuya kuŋanda yakwe Simoni. Bapongoshi bakwe Simoni banakashi bakalinga balwashi cimpwita. Mpeeke bantu bakasenga Jesu ayi abashilike. 39Mpomunyaawo wakaya weemikana kulubasu lwa bulo akwaambila cimpwita ayi ciswe. Ciindi ceenka ico cimpwita cakamana. Bapongoshi abo bakabuka akutalika kutabataba akubapa shakulya.

40Lisuba ndilyakalinga kwipila abo bakalinga kucite babyaabo bakalinga kuciswa malwashi apusenepusene, bakabaleta kuli Jesu. Wakabacata maansa boonse balwashi, mpeeke bakaba kabotu. 41Bashikaswa bakaswa mubantu baanji kaboolobesha ayi, “Ndiwe Mwanaakwe Lesa!” Sombi lakwe wakabakalalila akubakasha kwaamba mukwiinga balo bakalinga kumwishi ayi ngoUsalitwe wakwe Lesa.

Jesu mbwaakashimikila mucishi ca Judeya

(Maako 1:35-39)

42Ndibwakaca Jesu wakanyamuka waya kumusena kwatakalinga kwikala bantu. Bantu bakatalika kumuyandoola, ndibakamucana bakeelesha kumusenga camaansa obilo kwaamba ayi atayi kumwi. 43Sombi lakwe wakabakumbula ayi, “Ndyeelete kushimikila Makani Abotu a Bweene bwakwe Lesa kumandabala amwi akwalo mukwiinga ncendakeshita.” 44Aboobo wakaya bushimikila mushoonde sha baJuda sha muJudeya moonse.

Currently Selected:

Luka 4: BBBLI

Highlight

Copy