Joni 4

Jesu amwanakashi wa kuSamaliya

1BaFalisi bakanyumfwa ayi Jesu utoosandula akubombeka bashikwiiya baanji kwiinda Joni. 2(Nakubi kwaamba ayi teshi Jesu mwiine wakalinga kubombeka, sombi mbashikwiiya bakwe.) 3Aboobo Jesu ndyaakanyumfwa ayi baFalisi bakanyumfwa makani aya, wakaswaako kuJudeya akuboolela alimwi kuGalili. 4Ono ndyaakalinga kuya, wakeenda mucishi ca Samaliya. 5Mpeeke wakashika mundabala ya muSamaliya iitwa ayi Saika, pafwaafwi amuunda Jakobo ngwaakapa Josefu mwanaakwe.#Mata 33:19; Joshu 24:32 6Uko nkokwakalinga amukalo wakwe Jakobo. Jesu wakalinga kulemete mukwiinga wa mushinso, aboobo wakekala kweela mukalo. Paciindi ico lisuba lyakalinga pakati ka mutwi.

7Mpomunyaawo kwakesa mwanakashi mwine Samaliya mukuteka maanshi. Mpeeke Jesu wakamwaambila ayi, “Mpewo maanshi akunwa.” 8(Paciindi ico, bashikwiiya bakwe bakalinga mundabala mukuula shakulya.)

9Mwanakashi wakakumbula ayi, “Mwebo muli baJuda, sombi nebo ndi mwanakashi muSamaliya, ino inga mwansenga buyani maanshi akunwa?” (Ceebo baJuda tebakalinga kunyumfwana abene Samaliya.)#Esila 4:1-5; Neye 4:1-2

10Jesu wakakumbula ayi, “Newalinga kwishi cipo Lesa ncaapa akwishiba wooyo utookusenga maanshi, naakwiinga wamusenga maanshi apa buumi alakwe naakwiinga wakupa.” 11Lyalo mwanakashi wakakumbula ayi, “Nkambo, tamucite ceela ca kutekesha alimwi mukalo uyu ngulaamfu. Ino maanshi ayo apa buumi mutokwaakusha kuli? 12Sa mwebo muleendaawo bulemu pali ishiwesu Jakobo? Lakwe wakatupa mukalo uyu ngwaakalinga kunwaamo mwiine, bana bakwe alimwi ashintu shoonse nshaakalinga kufubite.”

13Jesu wakamukumbula ayi, “Muntu woonse unwa maanshi aya ulaakufwa nyotwa alimwi. 14Sombi uyo woonse unwa maanshi ngoompa teshi akafwewo nyotwa alimwi. Ncakwiila maanshi ayo ngweshi nkamupe alaakuba anga nkantupu ako keshi kakanookusha maanshi apa buumi butamaani muli nguwe.” 15Mwanakashi uyo wakaamba ayi, “Nkambo, amumpe maanshi ayo kwaamba ayi ntakafwiiwo nyotwa alimwi nabi kunoosa kokuno mukuteka maanshi.”

16Jesu wakamwaambila ayi, “Koya ukeete ibayo, usaakwe kuno.” 17Lakwe wakakumbula ayi, “Nsheebetweewo.”

Jesu wakamwaambila ayi, “Waamba calushinisho ndiwaamba ayi tooebetwe. 18Ncakwiila webo walinga kweebetwe kubasankwa bali bosanwe, ono uyo ukweebete teshi ibayo, sobwe. Aya makani ngowakonka ngalushinisho.”

19Mwanakashi uyo wakaamba ayi, “Nkambo, ndeshiiba ono ayi muli balaluki. 20Bamashali besu bakalinga kulambila Lesa pakalundu aka, sombi mwebo nobaJuda mulaamba ayi nkotweelete kulambilila nkuJelusalemu kweenka.”

21Lyalo Jesu wakaamba ayi, “Nankashi, ncakwiila ciindi cilaakushikila ndyeshi mukabule kulambila baTa pakalundu aka nabi kuJelusalemu. 22Mwebo nobene Samaliya mulalambila ncemuteshi, sombi swebo tulalambila ncetwishi mukwiinga lupulusho lulaswa kubaJuda. 23Nakubi boobo ciindi cilaakushika alimwi cashika kale, abo beshikulambila baTa ndyeshi bakabalambile mumushimu amulushinisho mukwiinga bamushobo uyo mbobaabo baTa mbobasuni ayi kababalambila. 24Lesa ngumushimu, aboobo abo bamulambila balyeelete kulambila mumushimu alimwi amulushinisho.”

25Mwanakashi uyo wakaamba ayi, “Ndishi kwaamba ayi Usalitwe wakwe Lesa (wiitwa ayi Klistu) ulaakwisa. Na akese, ulaakutusansulwita shintu shoonse.” 26Jesu wakaamba ayi, “Nebo nentokwaamba awebo ndime wooyo ngootokwaamba.”

27Mpomunyaawo bashikwiiya bakwe bakashika. Mpeeke bakakankamana kumucana kaabandika amwanakashi. Nakubi boobo taaku wakeepusha mwanakashi ayi, “Ulisuninshi?” nabi wakeepusha Jesu ayi, “Mutoobandikilanshi amwanakashi uyu?”

28Mpeeke mwanakashi uyo wakashiya nongo yakwe waya mundabala mukulwiita bantu ayi, 29“Kamwisa mubone muntu wandwiita shoonse nshendakacita. Sa inga kaali ngoUsalitwe wakwe Lesa?” 30Lyalo boonse bakayoboloka kuswa mundabala akuya kuli Jesu.

31Ico ciindi bashikwiiya bakwe bakalinga kukombelela Jesu ayi alye. 32Lakwe wakabaambila ayi, “Nebo ndicite cakulya ncemuteshi.”

33Mpomunyaawo bashikwiiya bakatalika kulyaamboosha beene ayi, “Sa kuli umwi wabaletela cakulya?” 34Sombi Jesu wakabaambila ayi, “Cakulya cangu nkucita sheesho shiyanda wooyo wakantuma akumanisha ncito yakwe. 35Te mulaamba ayi, ‘Kwacaala myeenshi yone kwaamba ayi tutalike kutebula.’ Sombi nebo ntoomulwiita ayi amulangishishe mumyuunda! Shakulya shapya kale shitolindilabo kutebulwa. 36Shikutebula utoofola alimwi utooshiyobolweta kubuumi butamaani. Aboobo shikushanga ashikutebula balaakusangalalila pantu pomwi. 37Kashimpi kakwaamba ayi, ‘Shikushanga ngumbi alakwe shikutebula ngumbi’, nkalushinisho. 38Ndamutuma kuya mukutebula nshemutakwe kulima. Bakalima mbambi, ono mwebo mwacaninaawo mpindu pancito yabo.”

39Bene Samaliya baanji mundabala ilya bakashoma Jesu ceebo mwanakashi uyo wakaamba ayi, “Wandwiita shoonse nshendakacita.” 40Aboobo ndibakaya kuli Jesu bakamusenga ayi atayi. Mpeeke wakekalaabo nshiku shobilo.

41Abamwi bantu baanji bakamushoma ceebo ca maswi ngaakalinga kwaamba. 42Mpeeke bakaambila mwanakashi uyo ayi, “Twashooma ono, kutaamba ayi mukwiinga watulwiita, sombi mukwiinga twalinyumfwila sobeene. Ono alimwi tweshiiba kwaamba ayi nguMupulushi wa bantu boonse ba mucishi ca panshi.”

Jesu mbwaakashilika mwaana wa musebenshi munene wa mwaami

43Ndipakeenda nshiku shobilo isho, Jesu wakaswaako akuya kuGalili. 44Mukwiinga Jesu mwiine wakaambaawo kale ayi, “Mulaluki taalemekwi kumishaabo.”#Mate 13:57; Maako 6:4; Luka 4:24 45Ndyaakashika muGalili bantu ba mucishi ici bakamutambula kabotu mukwiinga bakabonaawo kale nshaakacita kuJelusalemu, ndibakalinga mukusekelela bushiku bwa Pasika bwakwiibaluka kusotokela.#Joni 2:23 46Lyalo Jesu wakaboolela kuKana muGalili uko nkwaakasandula maanshi kuba waini. Uko kweenka kwakalinga wacinenenene, mubweendeleshi bwa cishi, wakalinga kucite mwaana mulwashi kuKapenaumu.#Joni 2:1-11 47Ndyaakanyumfwa ayi Jesu wakesa muGalili kuswa kuJudeya, wakaya kuli nguwe akumusenga ayi aye ashilike mwanaakwe, uyo wakalinga pafwaafwi akufwa. 48Jesu wakamwaambila ayi, “Na mwabula kubona shaankamiko ashitondesho sha nkusu sha kwiculu shimwi, tamushomiiwo tau.” 49Muntu uyo wakakumbula ayi, “Nkambo, katiya soonse mwanaangu kaatana kufwa.” 50Jesu wakamwaambila ayi, “Koyabo! Mwanaako waba kabotu.” Musankwa uyo wakashoma maswi akaamba Jesu, mpeeke wakaya. 51Ndyaakalinga kuya munshila, wakakumanya basebenshi bakwe abo bakamwaambila ayi, “Mwanaanu waba kabotu!” 52Wakabeepusha ciindi mwanaakwe ndyaakanyumfwa kabotu, abalo bakakumbula ayi, “Wakatalika kunyumfwa kabotu ciilo malumwi lisuba kalili pakati ka mutwi.” 53Lyalo ishi mwaana uyo wakeebaluka ayi nceciindi ceenka Jesu ncaakamwaambila ayi, “Mwanaako waba kabotu.” Mpeeke lakwe, abamuŋanda yakwe boonse bakashoma muli Jesu. 54Ici cakaba caankamiko cabili Jesu ncaakacita muGalili ndyaakaswa muJudeya.

Currently Selected:

Joni 4: BBBLI

Highlight

Copy