Agayi 2
2
Bulemu bwa Ŋanda yakwe Lesa ipya
1Pabushiku bwamakumi obilo abomwi bwa mweenshi wasanu ayobilo wa mwaaka weenka uyo, Mwaami Lesa wakaamba kwiinda muli ndime neAgayi. Wakandwiita ayi, 2“Aambila Selubabelo mwanaakwe Sheyalutyelo, mweendeleshi wa cishi ca Juda, Joshuwa mwanaakwe Jeosadaki, mupailishi munene, alimwi abantu abo bakalinga bacaalaawo. Ubeepushe ayi, 3‘Ngani wacaala pakati kanu uyo wakabona bulemu bwa Ŋanda yakwe Lesa mbobwakalinga kalekale? Ino sunu itooboneka buyani? Sa teetooboneka anga taaku mboibete?#Esila 3:12 4Sombi yuma webo Selubabelo. Yuma awebo Joshuwa mwanaakwe Jeosadaki, mupailishi munene. Amuyume amwebo nobantu nobene cishi. Amusebense noonse ceebo nebo ndi amwebo. 5Mutaloondi mukwiinga Mushimu wangu uli andimwe bweenka mbondakamushomesha ndindakamukusha mucishi ca Ijipiti. Nebo neMwaami Lesa Shinkusu shoonse ndaamba.’#Kulo 29:45-46
6“Ono nebo neMwaami Lesa Shinkusu shoonse ndaamba ayi, ‘Paakwiinda ciindi ciniinibo ndaakutenkaanya liculu acishi ca panshi, lweenge anshi iyumu nta.#Ebulu 12:26 7Ndaakutenkaanya mishobo yoonse abuboni bwa njiyo bulaakuletwa kuno. Lyalo ndaakususha Ŋanda yangu abulemu. 8Silifa woonse ngwaangu agolodi woonse ngwaangu. 9Bulemu bwa Ŋanda yangu iyi bulaakwiinda bulemu bwa Ŋanda itaanshi. Lyalo mumusena uyu ndaakupa bantu bangu luumuno. Nebo neMwaami Lesa Shinkusu shoonse ndaamba.’ ”
Agayi mulaluki mbwaakeepusha bapailishi
10Pabushiku bwamakumi obilo abone mumweenshi wasanu ayone mumwaaka wabili wa bwaami bwakwe Dalyasi, Mwaami Lesa Shinkusu shoonse wakaamba alimwi kuli ndime neAgayi. 11Wakaamba ayi, “Ipusha bapailishi na mulawo ulaamba ayinshi? 12Aŋambe ayi umwi wabwesa nyama isalalite yakabengwa kuswa pacipaililo akwiiyumuna mumungaanjo wakwe. Ino na mungaanjo wakwe wakumya shinkwa uli woonse, shilyo shakatelekwa kale, waini, mafuta a olifi nabi shakulya shimwi shili shoonse, sa inga nyama iyo yalengesha shakulya isho kuba shisalalite?”
Mwiipusho ndiwakeepushikwa bapailishi bakakumbula ayi, “Sobwe.”
13Mpeeke anebo neAgayi ndakeepusha ayi, “Aŋambe ayi musankwa taasalalite mukwiinga wacata mutuntu. Ino na wacata shakulya isho, sa inga shaba shitasalalite?”
Abalo bapailishi bakakumbula ayi, “Ee.”#Shakube 19:11-22
14Lyalo nebo neAgayi ndakaamba ayi, “Mwaami Lesa waamba ayi mbocibete kubantu ba mishobo iyi. Shintu shoonse nshebacita ashintu shoonse nshebabenga kuli ndime pacipaililo tashisalaliteewo.”
Mwaami Lesa mwaakashomesha kupa coolwe bantu bakwe
15Mwaami Lesa wakaamba ayi, “Sa tamubwene shintu mboshacitika kuli ndimwe? Kamutana kutalika kuyakulula Ŋanda yangu, 16na umwi waya kumulwi wa shili anga ngamaila kaayeeya kucanaako makilogilamu ali 200, wakalinga kucanaakobo makilogilamu ali 100. Na umwi waya mukutekula waini kaayeeya kucanaako malita ali 100, wakalinga kucanaakobo malita ali 40. 17Ndakanyonyoola milimo yanu ndindakayumya shishango shanu mukutuma muuwo uyoosha amfuula ya mabwe, sombi mwebo tamukwe kusanduka kuswa kushibiibi shanu. 18Sunu bulya mbushiku bwamakumi obilo anshiiku shone mumweenshi wasanu ayone. Bushiku buno lwiimbi lwa Ŋanda yangu lwamana kuyakululwa. Ono amulindile mubone ceshi cicitike kuswa ciindi cino. 19Nakubi kwaamba ayi taaku shili anga ngamaila shacaalaako alimwi minyansa, nkuyu, mapomegilaneti amaolifi isho shitana kucata, kuswa kubushiku bwa sunu, nebo ndanoomupa coolwe.”
Mwaami Lesa mbwaakashomesha Selubabelo
20Pabushiku bweenka ubo bwamakumi obilo anshiiku shone bwa mweenshi, Mwaami Lesa wakaamba alimwi kuli ndime neAgayi ayi, 21“Lwiita Selubabelo mwaami wa bene Juda kwaamba ayi ndaakutenkaanya liculu acishi ca panshi. 22Ndaakunyonyoola bamaami amalelo a bakunsengwe akumanisha nkusu sha ngawo. Ndaakusandamuna shikoci shabo abaabo beshikusheensha. Maaki abo alaakumana kufwa abalo abeshikwaatanta balaakucayana beene abeene.”
23“Pabushiku ubo, ndaakukubwesa webo Selubabelo mwanaakwe Sheyalutyelo omusebenshi wangu. Ndaakukubika ayi ukanoolela muliina lyangu ceebo nebo ndime ndakusala. Nebo neMwaami Lesa Shinkusu shoonse ndaamba.”
Currently Selected:
Agayi 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
