Matalikilo 13

Abulamu aLoti mbobakapansaana

1Abulamu wakaya kumatwa ndyaakaswa muIjipiti wakaya kucipansha ca kumalenge ca Kenani pantu pomwi amukaakwe alimwi ashintu shakwe shoonse. Loti alakwe wakayaakwe. 2Abulamu wakalinga mubile abuumbi mubanyama bafubwa alimwi asilifa agolodi. 3Mpeeke wakanyamuka apo, kaaya cituntulukabo musena amusena kuya kuBetelo. Wakashika kumusena uyo uli pakati ka Betelo aAyi apo pakalinga misumba yakwe kataanshi, 4alimwi apo mpwaakalinga wayaka cipaililo. Apo Abulamu wakalambila Mwaami Lesa.

5Loti alakwe wakalinga kucite mbelele, mpongo aŋombe, alimwi abamuŋanda yakwe kubikaawo abasebenshi. 6Aboobo tepakalinga musena unene wakwaamba ayi bekale bobilo pantu pomwi, ceebo bakalinga kufubite abuumbi. 7Alimwi kwaambana kwakatalika pakati ka beembeshi bakwe Abulamu abakwe Loti. Paciindi ico bene Kenani abene Pelisi abalo bakalinga kunoocikala mucishi ceenka ico.

8Aboobo Abulamu wakaambila Loti ayi, “Patabi kwaambana pakati kako anebo, nabi pakati ka beembeshi bako abaangu ceebo tuli bamukowa. 9Ono atupansaane. Usale musena uli woonse ngoosuni. Nkokwaamba ayi webo uye kulubasu lumwi anebo luumbi.”

10Loti wakalangalanga akubona kwaamba ayi cinyika coonse ca Joodani, kuyabo akuSowa, cakalinga kucite maanshi abuumbi, anga ngumuunda wa Mwaami Lesa nabi cishi ca Ijipiti. Ici cakalinga nciindi Mwaami Lesa kaatana kunyonyoola mandabala anene a Sodoma a Gomola.#Mata 2:10 11Mpeeke Loti wakasala cinyika ca Joodani akusenaako kwicwe. Ubo mbobakapansaana bobilo abo. 12Abulamu wakekala muKenani alakwe Loti wakekala pakati ka mandabala anene akalinga munyika ya Joodani. Misumba yakwe wakaiyakila pafwaafwi aSodoma 13umo mwakalinga bantu beshikubisha alimwi bakalinga kubisha abuumbi pameenso aMwaami Lesa.

Abulamu mbwaakaya kuEbuloni

14Loti ndyaakaya, Mwaami Lesa wakaambila Abulamu ayi, “Kuswawaawo mpoobete, langishisha kabotu kumatwa akumalenge, kwicwe akumbo. 15Cishi coonse ici ncewabona ntookupa abamulunyungu lwako, alimwi cilaakunoolibo caako muyayaya.#Mili 7:5 16Ndaakukupa baana baanji cakwaamba ayi taaku eshi akakonshe kubabelenga. Nkokwaamba ayi na muntu wakonsha kubelenga museese, inga wakonsha kubelenga abamulunyungu lwako. 17Ono koya ucishinguluke cishi coonse ici mukwiinga ntookupa coonse.” 18Mpeeke Abulamu wakalonga akuyaka misumba yakwe pafwaafwi amibanga ya kuMamule muEbuloni. Uko nkwaakayakila Mwaami Lesa cipaililo.

Currently Selected:

Matalikilo 13: BBBLI

Highlight

Copy