2 Makabisi 7
7
Kucaikwa kwabasankwa bosanwe abobilo ba lifumo lyomwi
1Bakacata alimwi basankwa bosanwe abobilo bamulifumo lyomwi pantu pomwi abanyinawabo. Mwaami wakalinga kusuni kubakakatisha, akubooma misako antambo ayi balye nyama yankumba, iyo milawo yabo njebakasha. 2Womwi wambabo wakaamba pamusena waboonse, ayi, “Ino mutolindila kunyumfwa nshi pakutwiipusha ipusha? Swebo tulilibambite kufwa. Sombi shakutyola milawo yabashalibesu taaku.” 3Mwaami wakakalala wakaamba ayi abike cikaye a mupika pa mulilo. 4Antyokusi wakacita bwangu. Ono mwaami wakaamba ayi amutimbule mulaka uyo utekwaamba, cikanda camutwi wakwe ayi cifundwe, alimwi ayi atimbulwe maansaakwe ashimpanta shakwe, bamakwababo abanyina boonse kababweneeko. 5Ndyakamanisha boobo, mwaami wakaindilisha ayi bamutole kumulilo pacikaye kaacilasha. Bwiishi bwakalinga kuswa pacikaye bwakesula poonse. Ono banyina abamakwabo bakaamba ayi abalo bafwe kwakubula boowa. 6Bakaamba ayi, “Mwaami Lesa ulitubwene ono mwakutatosha utotunyumfwila nkumbu, mbuli bweenka Mose mbwaakaimba pa nyimbo yakwe yakutonta bantu batanyumfwi, iyo yaamba ayi, ‘Ulaakuba ankumbu kubasebenshi bakwe.’
7Mutaanshi wakafwa bweenka ubo, kwakesa wabili, alakwe bamupensha bweenka mbuli mukwabo. Beshi kupensha bamufunda cikanda ca kumutwi a misusu kailiiko, lyalo bamwiipusha ayi, “Sa utoosumina kulya nyama yankumba, na tukutimbule mushimpaansha mpaansha?” 8Lakwe wakakumbula mumulaka wabashali bakwe ayi, “Sobwe, nshili.” Ono alakwe bakamupensha mbuli mukwabo mutaanshi ulya. 9Ndyaakalinga pafwaafwi akufwa, lakwe wakalaba ayi, “Webo omubiibi, utootunyaya buumi buno, sombi Mwaami washilengwa shoonse, ulaakutubusha ayi atupe buumi utamaani, swebo sotutoocaikwa paceebo cakunyumfwila milasho yakwe.” 10Pesule bakapensha watatu. Beshikupensha bakamwaambila, mukutacelwa lakwe wakakusha mulaka wakwe, watandabika amaansaakwe pakutaloonda napaceyi. 11Wakaamba amoyo woonse ayi, “Ndaakupekwa maansa amwi kuli Lesa, ono nebo bulya milasho yeenka ncecintu cinene kwiinda shimpaansha shamubili wangu, alimwi ntooshoma ayi lakwe uyo mwiine ulakumbooshesha shimpaansha shamubili wangu.” 12Mwaami pantu pomwi abaabo mbaakalingaabo bakakankamana pakuyuma moyo kwamusankwa uyo, pakwiinga lakwe mapesho ayo taakwe kwayeeyaawo ayi ncintu.
13Ndyaakafwa uyo, bakapensha wane amapesho anene alakwe. 14Kaali pafwaafwi akufwa alakwe ayi, “Ulicite coolwe uyo ucayikwa abantu, kashoma Lesa ayi ulaakumubusha. Ano webo Antyokusi kubuka kubuumi butamaani teshi ukabubone sobwe.”
15Ono kwakesa wacisanu bakatalika kumupensha. Sombi lakwe bakamulangilisha mwaami, akwaamba ayi, 16“Webo nabi ulimuntubo ulicite nkusu shakwaambila bamwi, webo ulacita shoosuni omwiine, sombi utayeeyi ayi Lesa washiya mushobo wesu. 17Lindila, utoobona nkusu shakwe shinene isho nsheeshi akupeenshaasho, webo pantu pomwi a beshikulu bako.” 18Pesule lyakwe bakaleta wasanu awomwi. Kaali pafwaafwi akufwa lakwe wakaamba ayi, “Utalibeeci swebo tutoobona mapesho aya pakwiinga twakabishisha Lesa wesu, nceceeco shibiibi shamushobo uyu shatuwita. 19Ono webo utayeeyi ayi teshi ukapenshekwe a Lesa ici ncootoocita.”
20Banyina wabo mbobakakankamisha kwiinda boonse, lakwe ngoweelete kwibalukwa. Nabi wakalinga kubona banabakwe kabafwa bushiku bomwi, wakacata moyo pasheesho shoonse paceebo calushomo mu Mwaami Lesa. 21Wakabonesha boonse mumushobo wabashali bakwe. Ceebo camaano akwe wakayumya moyo wakwe wabwanakashi anga ngumusankwa. 22Wakalwiita banabakwe ayi, “Nebo nshishi nawakapangwa buyani mulifumo lyangu muuya abuumi teeshi ndime ndakamupa. Shimpaansha shamibili yanu, teeshi ndime ndakashilenga. 23Wakacita shoonse ishi ngu Cilenga washoonse, uyo wakabamba shakushalwa kwabantu akubamba matalikilo ashintu shoonse. Munkumbu shakwe ulaakumubooshesha buumi bwanu, paceebo ca kukonkela milawo yakwe.” 24Antyokusi wakalinga kuyeeya ayi nyina wesu ulya wamuubya, aboobo akamubicila maswi akwe. 25Sombi musankwa uyo taakwe akubikaako maano. Lyalo mwaami wakalwiita banyina ayi, bamulwiite mwanaabo maano akupulushishaamo buumi bwakwe. 26Mwaami uyo wakaamba akwe shiinji, anyina bakasumina shoonse. 27Ono ndyaakalindila mwanaakwe ulya, wakalengesha mwaami buluya kaamba mumushobo wabashali bakwe ayi, “Omwanaangu mbeeteko nkumbu. Nebo ndakakuyumuna mulifumo lyangu myeenshi yosanwe amyeenshi yone, alimwi ndakakuyamwisha shaaka shotatwe ndakakulela akukulisha kushikila caaka ceenka cino. 28Ndakukombelela amwanaangu, langa kwiculu acishi cino capaanshi. Ubone shoonse shikalaamo, ono wishibe ayi nguLesa wakashilenga uyo wakalenga shoonse. Tepakalinga nabi cintu cili coonse. Eenka uyo ngowakalenga mishobo yoonse yabantu. 29Utamuloondi muntu uyu ucaya bantu uyumye moyo mbuli bamakwanu, usumine kufwa, ayi munkumbu shakwe Lesa, webo pantu pomwi abamakwanu nkamucane. 30Banyina kabacaambabo, musankwa uyo wakaamba ayi, “Ino, nobantu mwebo, mutoolindilaanshi? Milawo yamwaami nshikwe kwinyumfwaawo, nebo ndanyumfwabo milawo yakatushiila Mose kubashalibesu.” 31Ono webo otooyeeya shibiibi shamishobo amishobo shakusampula bene Ebulu lyaansa lyakwe Lesa teeshi ukalileyeewo tau. 32Swebo tutoopenga paceebo cashibiibi shesu. 33Mwaami Lesa wabuumi ulatukalalila ciindi ciniini, ulatupensha akutululamika, sombi ulaakunyumfwana abasebenshi bakwe. 34Sombi mwebo ootanyumfwi owakashinganwa kubantu boonse utameeki cabobulya akushoma shitacite mutwi, ciindi ndyeemupesha banabakwe Lesa. 35Ncakwiila tookwe kupuluka kumilambu yakwe Lesa shinkusu Shoonse ubona shoonse. 36Bamakwabesu bakashibila kupenshekwa ciindi coonse, bakashika kubuumi butamaani ubo Lesa mbwaakabalasha. Sombi webo, Lesa ulaakukoombolosha lyalo ulaakupekwa lupesho lukweelete akulinyumfwa kwako. 37Nebo mbuli mbowacita bamakwesu, ntookupa ono mubili wangu abuumi bwangu, paceebo camilawo yabashalibesu. Ntoosenga Lesa ayi anyumfwile nkumbu bwangu mushobo wesu, ono webo akupenshe calunkutwe, kushikila ukasumine ayi uyu eenka ngo Lesa. 38Ntookusenga alimwi ayi palufu lwangu alwa bamakwesu, shinkusu shoonse abuleeke bukali ubo mbwaakalinga kweelete kucita kumushobo wesu woonse. 39Paceebo ceeco mwaami wakakalala abuumbi wakamupensha musankwa uyo kwiinda bamwi. 40Ono musankwa uyo wakafwa kasalalite kaabikite lushomo lwakwe mu Mwaami Lesa. 41Pakumanisha bakabacaya banyinawabo, banabakwe boonse bakacaikwa. 42Mbwaabete makani ayo bweenka ubo boonse baJuda mbobakalinga kubakakatisha kulya shakulya shitasalalite pa milambu yabo ashakupenshekwa kwabo.
Currently Selected:
2 Makabisi 7: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.