Filipieŋ 2

Me səpey me dzəmey vaw

1Haɗaw azlakwa mezəley ma Kriste daha, ma səma vaw da ma wuɗa vaw daha, ma dzəma mey ma Mesəfrey, ma ləɓa vaw ta ndaw me key da vaw daha na, 2arka na rəhadəmaya wuiya ɗaw, ta mendzey kwar ma dzəma mey ahiya haya hayaha. Ma wuɗa vaw kwar ka key na asləta, mevel a kwar ka key na asləta, səpam na, me dzəmey vaw. 3Ɗaɗa ka da kam tek ta səleŋ aha zlay, ta me ɓey ta vaw aha zlay, amana, ta ləfeɗeɗe ha, nəkafəmata ka sa ma ndaw hay na, andza a fənəmakwar. 4Kwa way way ka da nəkey dey na, ka vaw ŋga na tsa dada zlay, amana, ka sa ma ndaw hay tiyatsa.

Andza Yezu ma kawa

5Ndzam ka 'ar vaw kwar ana hay na andza neney, andza na ma kama da ma dzəma vaw da Yezu Kriste ana.

6Ŋga Bay ma Bəla ha, ŋga ka kəɗey vaw ma kada vaw ŋga andza me meley ta Bay ma Bəla kakay.

7Amana, ŋga ma mbəɗar mey a tek aŋga hay tabiya ha, ma tərada vaw ŋga gawla ma ’ay aha, me tərey andza ndaw aha da walaŋ ma ndaw hay.

8Ŋga ka mada vaw ŋga ba a gwadaw, ma tərada vaw ŋga me tsəney sləmay aha kasl a memətsey, ha memətsey ka 'ar ma tuwaw ma gazləla ha.

9Bay ma Bəla ma pada tsaŋ ka ’ar ma tek hay na hərwuiya. Arka ma vəlar Mezəley na, ma fənata sa mezəley hay tabiya ha na,

10ma da hasəkadara bəzay a mezəley ma Yezu na, magurmets hay tabiyaha ka gərtam, da 'ərlam, ka dala, da tsəvay,

11me ndzey ma mey hay tabiyaha ka ɓadama Bay’ərlam na Yezu Kriste, ma da hasəkadara bəzay a Bay ma Bəla Baba.

Mber ma ndaw ma Kretieŋ hay

12Dzəm a ɗaw hay, da ma ndzawa kwar na, ka tsənam sləmay bəza kakay ana na, ka da kam andza i daha dada tsa zlay, ama a fəna sa na, ekəɗey akwa na, kwa i dakay na, ta me wesey aha kwasl kwasl na, kadama mber ma me buwey kwar. 13Hərway me key mber da vaw kwar na Bay ma Bəla, ma aza kuray ka wuɗam, ha kama andza ma tek aŋga me dzeley hayna. 14Kam tek hay tabiyaha na, mandzara kuray ka gwaŋguɗam mey, mandzara me tərey vaw. 15mendzey andza bəzey ma Bay ma Bəla ahiya, mandzara luweɗ da walaŋ ma ndaw ma bəla neney ma ŋgəsaya na, ma bəraya na hay. Ka da nəkəmawa da huɗa na, andza 'ar yam ma waw me nəkey dey ma bəla ha. 16Kuray a neney ta guma ma mendzey da vaw ana hay: na ŋga na na, me wezley dey ɗaw ma pas ma Kriste, kavəday ma hwawa ɗaw ana ka bəla, ta ma yawa vaw ɗaw ana na, ka da key tedehe zlay. 17Kwa mambaz a ɗaw a da mbəɗawa me pesley ka kuley ta meslərey ma me pey 'ar a kwar na, na ŋga na na, a daya 'ar, i kakwama wuiya tsetse ka masləta ha. 18andza ha satsa na, kuray ana tey na, ka dakwar 'ar, kakwama wuiya andza yah ka masləta ha.

Meslərey mandza Timotey ta Epafrodit

19I ma dzala da mezəley ma Bay’ərlam Yezu na, mazlambar aha i da slərəkuraɓa Timotey, ma aza ka maya 'ərev ta tek ana wayna hay na i ma da ndzafawa da ’ay kwar ana tiyatsa. 20Ndaw mekelehe ka tsakay ɗaw a rafaya ma wanəkada me dzeley 'ar ka tek ana ma nəkafakwar dey ana hay na, dakay, 21tabiyaha kwa way way na, a dzeley 'ar na ka tek ata ma satar ana hay zləna, na ma Yezu Kriste kakay. 22Ama ŋga na, kuray ana ka səradama, ka ɓada ba ŋga ɗa ka vaw ŋga: kalkal andza bəzey ka tsakay ma baba ŋga na, ŋga me dzəmey a dey ɗaw, ma da key mesələrey ma Mey Wayna. 23I dzeley akwa ma da sləraɓa na ŋga, kendzey andza guma ma tek a ɗaw a neney ka weley ba na. 24Akwa yah ana na, i sərada ha da mezəley ma Bay’ərlam na, yah ana tiyatsa na, mazlambar aha i da daɓa. 25Ama i ma dzala ŋgama i slərəkuraɓa Epafrodit, malam a ɗaw, mandala ɗaw da ma kəɗada vaw da meslərey, na kuray ma sləradəmərawa ka tsakay ɗaw, ka da kaya meslərey, da har ana tek a hətsaya ha na. 26A sar aha nduk nduk ma nəkadakwar tabiyaha, ŋga ka zlewerey ba, hərway kuray ka sərafama ba vaw a tsafa seŋgey. 27Vaw na, ka tsafa ba dərka, a zarawa ketekuɗey na, a mətsey, amana, ŋga ka kar ba da vaw a Bay ma Bəla, ma kar da vaw na, ŋga dada tsa kakay, amana ta yah adzay tiyatsa, ma viya ɗaw ka da səkey adiya adiya zlay. 28I sləradukwaraɓa tsam tsam, ma aza ha nəkadama, ka dadakwar 'ar sa, arka aza yah tey na, mevel ka da tsaya kambəlaɓa sazlay. 29Haya da mezəley ma Bay’ərlam na, ŋgəlama har tsew tsew ta wuiya ha, ndaw andza na ŋga na na, wuɗama haya haya. 30Hərway me meslərey ma Kriste na, a zarawa ketekuɗey na, a mətsey. A zarawa ketekuɗey na, a zəɗada mendzey ŋga ba ma da ndzey a veɗ a kwar ma kaya meslərey, na kuray ma slafama ma kadəmaya kakay ana.

Currently Selected:

Filipieŋ 2: MOF

Highlight

Copy