Mark 2

Yezu na a slafa me sey yam ka meŋgəsey

(Mt 9.1-8; Lk 5.17-26)

1Meney nekəɗey a dəba na na, Yezu ma mawa a Kafarnawom. Andza ma ndaw hay ma tsənadama ba ŋga da mbaw na, 2ndaw hay ma kusəmawa haɗadzidzay, kwa ka mey mambaw tekeɗe na slam dakay. Arka ŋga ma taləkadatara mey ta Guma. 3Ndaw hay daha ma husəmawa, ndaw hay faɗ ma zəgəmawa ndaw ana daha, ma mbara vaw aha. 4Andza taya ba ma nəkam dey na, a slafama ma husadama kasl ka slam aŋga kakay, hərway ma ndaw hay ma kusa hiya kambəlaɓa na na, taya ma pukwam 'ar ma 'ay soŋ soŋ ka slam ma Yezu, ma ndza ha na; ma harɗadama ndaw a hana ma mbara vaw ana, ta merdek adzay, ka slam ma Yezu ana tok. 5Andza Yezu ma nəkada me pey 'ar ata na, ŋga ma ləvar a ndaw a hana ma mbara vaw ana: «Dem a ɗaw, meŋgəsey ɗek hay, ma sa yam ahiya ba.» 6Ndaw me sesəkey Mewey hay daha nekəɗey, ka slam ana, ma dzalam da 'ar ata: 7«Ɗagay ndaw a neney a tsey guma andza ha na, ka mey? A key na, a tseɗey Bay ma Bəla Ndaw ma slafa me sey yam ka meŋgəsey na, way? Sey Bay ma bəla ana asləta sana.» 8Andza Yezu ma sərada me dzeley 'ar a ta neney, da mevel aŋga na tsana, ŋga ma ləvatar: «Ɗagay ka dzalam tek a neney da mevel a kwar na ka mey? 9Ɗagay ta ger aha da huɗa na, na waray? Ma ləvar a ndaw a neney ma mbara vaw ana: ‹Meŋgəsey ɗek hay ma sa yam ahiya ba na tsukuɗu?›, dakay na me ləvey: ‹Lətsey, zəga merdek eɗek ana, heley ana ɗaw?› 10Ana təɗe, hayna sərafama, Bəzey ma Ndaw na, slam har aŋga daha, me sey yam ka meŋgəsey, ka dala.» Ŋga ma ləvar a ndaw a hana ma mbara vaw ana: 11«I ləvaka, lətsey, zəga merdek eɗek, daway a mbaw.» 12Ndaw ana me lətsey, ma zəga merdek aŋga tsana, ma bawa, ma daw təŋga a mbaw ma dey ma ndaw hay tabiyaha. Amana, a rəzlata ndaw hay kambəlaɓa, ma hasəkadəmara bəzay a Bay ma Bəla, ta me ləvey aha kava: «Ɗaɗa la ka nəkam tek andza neney dakay!»

Yezu a zəley Levi ndaw me tsekeley dzaŋgal

(Mt 9.9-13; Lk 5.27-32)

13Yezu me mey 'ar a mey ma bəlay satsa. Ndaw hay haɗadzidzay ma kusəmawa ka tsakay ŋga, arka ŋga ma tatəkadata. 14Andza a daw aha na, ŋga ma nəkada Levi, bəzey ma Alfey, ma ndzaha da biraw me tsekeley dzaŋgal. Yezu ma ləvar: «Səpaya bəzay.» Levi me lətsey, ma səpar bəzay. 15Andza Yezu a zəmam aha tek da 'ay ŋga na, ndaw me tsekeley dzaŋgal hay haɗadzidzay ta ndaw ma ŋgəsa na hay, taya ka masləta ahiya andza Yezu ta gawla ŋga hay, hərway ndaw taya haɗadzidzay a səpamar aha bəzay. 16Kwa Fariziyeŋ na me sesəkey Mewey ana hay ma nəkadama a zəmam aha tek, andza ndaw ma ŋgəsa na hay, ta ndaw me tsekeley dzaŋgal hay na, ma ləvəmatar a gawla ma Yezu ana hay: «Ɗagay miter a kwar ana a zəmam tek ka maslətaha andza ndaw me tsekeley dzaŋgal hay ta ndaw ma ŋgəsa na hay na, ka mey?» 17Andza Yezu ma tsənada guma neney na, ŋga ma ləvatar: «Me səpey ndaw ma sidem na, ndaw vaw ma tsafata na hay zləna, ndaw zozoy ana hay kakay. I sawa na, ma da zəley ndaw ma ŋgəsa na hay zləna, ndaw dzerey ana hay, kakay.»

Yezu a mbəɗafa ka guma ma sumaya

(Mt 9.14-17; Lk 5.33-39)

18Gawla ma Zaŋ-Batist hay, ta Fariziyeŋ hay a kam aha sumaya. Arka ndaw hay ma səmawa ka tsakay ma Yezu, ma ləvamar: «Gawla ma Zaŋ hay, ta na ma Fariziyeŋ hay a kam aha sumaya tok na, na ŋgeɗek hay a kam tikay na, ka mey?» 19Arka Yezu ma ləvatar: «Kuray ma dzalama kendzey da magurlam me zəgey kokwa na, zel ma kokwa ŋga daha ka tsakay ta na, a kam sumaya ɗaw? Dey ta kava a'ay, zel ma kokwa ŋga daha na, a kam sumaya kakay. 20Har ana ka da slawa ba, ka da zəgafəmata zel ma kokwa na ba tok na, azambay a kam sumaya ta pas ana ŋga na tok. 21Kwa ndaw me tepey zana wayna, ka na gurma na na, dakay. Dakay na, na hana ma tapəmaɓa waya na na, a ndəɗa na gurma na na, arka na meŋgerɗey ana a səkey adiya. 22Ndaw a mbəɗey zom lelem aha a kəlom madzahway aha, kakay. Haɗaw ka mbəɗam ba na, kendzey andza zom a mbəsley na, a nɗuhwada kəlom ana hana madzahway ana ba, arka na, masaka ma ndza kəlom, ta zom adzay kakay ɗaw? Ama hayna, zom lelem na na, ka mbəɗadama a kəlom wayna təŋga.»

Yezu na, a fənar 'ar a mesley

(Mt 12.1-8; Lk 6.1-5)

23Arka, ta pas ma mesley ana daha na, Yezu me tezlerey ta ley daw. Gawla ŋga hay, ma sarɓam daw paɗ tsəveɗ. 24Arka Fariziyeŋ hay ma ləvamar: «Nəkafa tek ma gawla ɗek ana hay ma kam, ta pas ma mesley ana! Na mewey ma kafa say kava na.» 25Yezu ma mbəɗatar kava: «Ɗaɗa kuray ka dzaŋgama tek ma David ma kawa tikay ɗaw? Da har ma tek me zəmey ma rafa dakay na, may ma tsafa, ŋga na ta ndaw aŋga ma səpamar bəzay ana hay. 26Ɗagay na teŋgey, da har ma baba ɗuhwa na me key kuley ana Abiyatar, David me fuləkwey a 'Ay ma Bay ma Bəla, ŋga me zəmey peŋ ma 'ar kuley, akwa na ndaw a zəmey kakay, sey baba me key kuley hay dada. Amana ŋga ma vəlatar a ndaw na taya dzaya na hay tiyatsa.» 27Arka ŋga, ma ləvatar sa: «Mesley ma ka ha na, hərway ma ndaw hay zləna, a kəmərawa ndaw na, hərway ma mesley kakay. 28Nəkadama, kwa mesley tekeɗe na, Bəzey ma Ndaw a war 'ar na hərwuiya.»

Currently Selected:

Mark 2: MOF

Highlight

Copy