Luk 7

Yezu a ndalada beke ma bay ma sidzew me wey sidzew temere

(Mt 8.5-13; Zŋ 4.46-54)

1Andza Yezu ma ndəvada guma ŋga me tsey ba ka slam dey ma səkway na, ŋga ma fuləkwey a Kafarnawom. 2Bay ma sidzew temere ana daha, beke aŋga vaw a tsafa, a zawa həɗek həɗek kəɗey. A wuɗa beke ŋga na bəza kakay. 3Andza ŋga ma tsənada a tsam aha ka Yezu na, ŋga ma slərafərawa ndaw hay nekəɗey, da walaŋ ma ndaw ma fada ma zuif hay, ma kamar amboh a Yezu, ka sawa, ka da buwa beke ŋga. 4Andza ma husəmawa ba ka tsakay ma Yezu na, ndaw a hay ma kamar amboh a Yezu, kwa a mbəkamar bəzay kakay, ma ləvamar: «Akwa təɗe na kah ka dzəna, 5hərway a wuɗata ndaw ma dala lakwa hay bəza kakay, ma ndəradandar 'ay me ɗuley mey la na, ŋga.» 6Andza Yezu a dam aha dzaya, tsoy mazlambar aha Yezu a da husey a 'ay ana na, bay ma sidzew ana me kəley dzam aŋga hay ka ləvamar: «Bay’ərlam a ɗaw, ka yadərawa vaw zlay, zləna hərway yah ɗa ndaw aha ma kah ka fuləkwey a 'ay ɗaw dzay kakay, 7hərway i ma nəka vaw ɗaw na, tsəveɗ a ɗaw ma husaɓa kasl ka tsakay ɗek na dakay; ama tsey guma veɗ asləta tsana, aza gawla ma ’ay ɗaw ana, a da ndeley. 8Nəkafa yah ana na ndaw ma waya na daha; yah tey i wey sidzew hay. Kendzey i ləvar a naŋgar: ‹Daw› na, a daway. I ləvar a na mekelehe: ‹Sawa› na, a sawa. Arka a beke ɗaw: ‹Ka tek eɗey› na, a ka.» 9Andza Yezu ma tsənada andza ha na, a mbafa bəza kakay, me mbəɗey dey ka ndaw ma kusa hiya ma səpamar bəzay ana hay, ma ləvatar: «I ɓadakwar, kwa da Israyel tekeɗe na, i ka ndzefey ndaw me pey 'ar andza neney na dakay.» 10Me mey ta a mbaw na, maslaŋ ana hana hay a da ndzafama beke ana ŋga zoyzoy.

Yezu a mbəladərawa bəzey ma madakway ana daha da Nayiŋ

(Mt 11.2-6)

11Arka Yezu ma daway a wuraw ana daha a zəlamar Nayiŋ. Gawla ŋga hay a dawam aha dzaya ta ndaw ma kusa hiya haɗadzidzay. 12Andza Yezu a husey aha ka mezləŋgərey me mey ma zleɗ ma wuraw ana na, a zəgam aha vagay a tsəvay. Bəzey malay aha ma madakway ana daha. Ndaw ma wuraw ana hay ma kusaya haɗadzidzay a kəsadama ha ŋgwas ana. 13Andza Bay’ərlam Yezu ma nəkada maya ma vagay ana a tuway aha na, a kar da vaw kambəlaɓa. Ŋga ma ləvar: «Ka tuway sazlay.» 14Ŋga ma gurey, ma ləmar a tek me zəgey vagay ana, ndaw me zəgey vagay ana hay ma lətsadama aha. Arka Yezu me ləvey: «Bəzey gawla ɗey, i ma ləvaka, pərkey.» 15Arka vagay a hana me ndzey ta bəzay ŋga, ma zlar me tsey guma. Arka Yezu ma madara təŋga a maya ŋga na. 16Tobiya ta ha ma wasam, arka ma səmbərama Bay ma Bəla ta me ləvey aha: «Ndaw sek ɗuhwa ha ka lətsawa ba da walaŋ a lakwa. Bay ma Bəla ka sawa ba, ma da nəkəraɓa dey a səkway ŋga.» 17Guma a hana ma tsam ka Yezu ana na, me pey mey da dala ma Zudey, ha me tesey a diya ma dala sa na hay.

Zaŋ-Batist a slərawa gawla ŋga hay ka slam ma Yezu

18Gawla ma Zaŋ hay ma təkəradəmara tek ma Yezu me key ana hay a miter ata. Arka ŋga ma zəlawa gawla ŋga hay tsew. 19Ŋga ma sləradata ka slam ma Bay’ərlam Yezu, ka da tsəhafəmərawa: «Kah na ‹Ndaw ma sawa› na tsukuɗu dakay na la ka hutam mekelehe ɗaw?» 20Andza ma husam ba ka tsakay ma Yezu na, ndaw a hana hay ma ləvamar: «Zaŋ Batist a sləradandərawa ka tsakay ɗek na ma da tsəhafaka ‹Kah na Ndaw ma sawa› tsukuɗu, dakay na la ka hutam mekelehe ɗaw?» 21Da har ana na, Yezu me ndeley ndaw dzedzey ana hay, ta ndaw ma təra na hay haɗadzidzay, me ɓəley fakalaw hay da vaw ma ndaw hay, ma wuradatara dey ma ndaw wulaf ana hay haɗadzidzay. 22Arka ŋga ma mbəɗatar kava a maslaŋ ma Zaŋ ana hay tok: «Dawam ɓadəmara a Zaŋ tek a kwar ma nəkadama, ta na ma tsənadama na hay: wulaf hay a nəkadama dey ka dəba, ndaw vədal ana hay a halam tseriye, malawa hay ma bazləma hiya ba, mandak hay a tsənadama sləmay, ndaw ma mətsa na hay a mbələmawa. A tələkadəmatara ha mey ta Mey Hayna Wayna a ndaw mbarga na hay, 23arka ndaw na guma ɗaw ka təɗadada ta dəba kakay ana na, ŋga da wuiya.»

Tek ma Yezu me dzeley ka Zaŋ Batist

(Mt 11.7-11)

24Andza maslaŋ ma Zaŋ hay ma dam tek ata na, Yezu ma tsatar ka Zaŋ a ndaw hay ma kusa hiya: «Ɗagay ka dam ka da nəkəmawa da palah ana na ka mey? Ka zeleŋ ana, ŋga na memeɗ ma ɓəlada na ɗaw? 25Azlakwa ka da nəkəmawa na ka mey tok? Ka ndaw ma kəla zana mambay ana ka vaw ana ɗaw? Ama ndaw na ta zana mambay ana hay ka vaw ana, ma ndza hiya da wuiya na hay na, taya da 'ay ma bay hay seŋgey. 26Azlakwa ka da nəkəmawa na ka mey tok? Ka ndaw sek ɗaw? Ayaw i ɓadakwar, ka fəna ndaw sek ba sa. 27Ŋga na ndaw aŋga na me windey ma ləvafa: nəkafa, i sləraɓa maslaŋ a ɗaw ka mey ɗek, a da ləmaka tsəveɗ. 28I ɓadakwar, ndaw da walaŋ ma ndaw ŋgwas ma yəmatərawa na hay na, kwa ndaw asləta ma fəna Zaŋ na dakay. Ama tok na, ndaw bəza ha da Slala ma Bay'ərlam na, a fəna Zaŋ sa.

Me ŋgəley mandza Zaŋ ta Yezu

(Mt 11.16-19)

29Ndaw ma səkway hay tabiyaha a pafama ha sləmay, kwa ndaw me tsekeley dzaŋgal hay tekeɗe na ka sərafama ba ka dzerey ma Bay ma Bay ma Bəla, ha ma dzuhəɓam a medzuhəɓey ma Zaŋ. 30Ama Fariziyeŋ hay ta ndaw me sesəkey Mewey hay na, a wuɗam ma tsənar sləmay a tek ma Bay ma Bəla me wuɗey me key hərway ta na kakay, arka na ka wuɗam medzuhəɓey ma Zaŋ kakay. 31I da maladata ndaw ma bəla neney hay na ta mey? A da malam na ta mey? 32Ma maladata na na ta bəza hay ma ndza hiya ka dala ma wasa. A zəlam vaw ka 'ar vaw ta na hay, ta me ləvey aha: «La kafam fagwam ba, amana ka wuɗam me gərvey kava kakay. La ka kələmaɓa walay vagay ba, amana, ka wuɗam ma tuway kakay.» 33Akwa, andza Zaŋ Batist ma sawa na, a zəmey peŋ kakay, a sey zom kakay. Ka ləvam ŋga na: ‹ar a mbəɗar.› 34Bəzey ma Ndaw ma sawa, ŋga na, a zəmey tek, a sey zom, ka ləvafama ma hwoɗ aha, a sey zom kambəlaɓa, dzam ma ndaw me tsekeley dzaŋgal hay ta ndaw ma ŋgəsa na hay. 35Amana ma səra ’ar a da səradama dzerey aha na, da wawa ŋga hay tabiyaha.»

Yezu da 'ay Simoŋ ndaw Fariziyeŋ

36Ndaw Fariziyeŋ ana daha, ma wuna Yezu a 'ay ŋga ma da zəmawa tek. Ŋga me fuləkwey a 'ay ndaw Fariziyeŋ ana hana. Arka ma ndzam ka slam me zəmey tek. 37Ŋgwas ana daha da wuraw ana ma ŋgəsa ha; ŋga ma tsənada waya Yezu a zəmey aha tek da 'ay ndaw Fariziyeŋ ana daha na. Ŋga ma zəgawa kwalaba mambay aha ta wurdey aha, 38ŋga me ndzey ta dəba ma Yezu ka slam sek aŋga, ta matuway aha, ma pəradara sek ma Yezu ta yam dey; ma takaɗadara ta mbez 'ar aŋga, ma surma sek aŋga na, ma watsafata wurdey. 39Andza ŋga ma nəkada andza ha na, ndaw Fariziyeŋ a hana ma wunəraɓa Yezu ana, me ləvey ka 'ar vaw ŋga na: «Kendzey, ndaw a neney na ndaw sek na, akwatay ka sərada ba, ŋgwas a neney ma ləmar ana na ma ka ha na teŋgey, ma ŋgəsa ha» 40Yezu ma zlar me ləvey: «Simoŋ, guma ɗaw daha, ma da tsaka.» Simoŋ ma mbəɗar kava: «Tsərawa kwa, miter.» 41«Ndaw ana daha na sumkwo ŋga da har ma ndaw hay daha tsew. Naŋgar na gabal temere zlam. Naŋgar tey na gabal kokurow zlam. 42Andza tek a rafata ma wurəka dakay na, ŋga ma mbəkadatara gwedere na tsetsuwe ta hiya. Da walaŋ ata na tsew ana na ma da wuɗa ɗoh na, ndaw waray?.» 43simoŋ ma mbəɗar kava: «Andza kafaya na, ndaw na ma kar hahaya ta gwedere haɗadzidzay ana.» Yezu ma ləvar: «Kah ka dzalərawa ba kassla.» 44Ŋga pəla dey ka ŋgwas a hana na, ma ləvar a Simoŋ: «Ka nəkada ŋgwas a neney kakay ɗaw? I ma fuləkwawa 'ay ɗek na, kah ka pəradaya sek kakay, ama ŋga na, ŋga ka pəradaya sek a ɗaw hay ba ta yam dey ŋga, ma takaɗata ta mbez ’ar aŋga. 45Kah ka surmaya kakay, ama ŋga na zla ma fuləkwawa ŋga na, ka gərada ma surma sek a ɗaw kakay. 46Kah ka mbəɗafaya mal me zey hayna ka ’ar a ɗaw kakay, ama ŋga na ka mbəɗafaya wurdey ba, ka sek a ɗaw hay. 47Haɗaw i ɓadaka dərka na na, meŋgəsey ŋga hay haɗadzidzay ana, ka safəmata yam ba, kavəday ma mey na, ŋga ka ɓada ma wuɗa vaw ba haɗadzidzay. Ama ndaw ana ŋga na ma safama yam nekəɗey ana na, a ɓada ma wuɗa vaw na nekəɗey dada tey.» 48Ŋga ma ləvar a ŋgwas ana tok: «Meŋgəsey ɗek hay ma sa yam ahiya ba.» 49Ndaw na taya ma zəmam tek dzaya na hay, ma ləvam ka ’ar vaw ta na: «Neney na ndaw mey? Ha me husey kasl ka me sey yam ka meŋgəsey hay ana na?» 50Yezu ma ləvar a ŋgwas ana hana tok: «Me pey 'ar eɗek ka buwaka ba, daway da zoy.»

Currently Selected:

Luk 7: MOF

Highlight

Copy