3 Zaŋ 1
1
1Ndaw ma səka na, a Gaius, na i ma wuɗa haɗa na, na i ma wuɗa da waw me nəkey dey ma dərka na. 2Dzəma ɗaw i tsəhey na, ha ndzey mambay mambay aha da tek hay tabiyaha, haya na ndzey da zoy; ta mezek eɗek a dzay ka key andza ha satsa ka ndzey mambay aha zoy. Gaius ta ndaw ma dadama Mey Hayna Wayna na. 3Akwa na i ka ndzefey wuiya ba ɗuhwaha, hərway ma malam hay ma husəmawa ka sləna, ma ɓadama seydewe ma dərka na ma me wezley dey da mendzey ɗek: kah na ka daway aha da waw me nəkey dey ma dərka. 4Wuiya ɗaw ɗuhwaha na, na i ma tsənada wawa ɗaw hay a dawam aha da waw me nəkey dey ma dərka na. 5Dzəm a ɗaw key na andza ma ’ar eɗek me pey, da ma wafata vaw ka malam hay, kwa ta mbəlak hay dzay ana. 6Taya ka kam seydewe ana ba ka slam dey ma Egliz ma ma wuɗa vaw ɗek ana. Dzalafata ’ar ka ndaw ma dadama Mey Hayna Wayna na, ɗerre andza ma Bay ma Bəla me wuɗey ana. 7Hərway ma Mezəley ana ma zəgam tsəveɗ, mandzara ka təɓam tek da har ma ndaw Zuif ahiya kakay ana hay. 8Lakwa na tok na, hayna i ka dzənakwata ndaw aŋga na na hay, mala i ka da ɓadəkawa i zəgadakwa ha mber ma dərka.
Diyotrefes ta Demetriyus
9I ka windar ɗeriwel ba a Egliz. Ama Diyotrefes a wuɗey me key bay ta ha na, a wuɗey ma səradandar kakay. 10Arka andza i ka da daɓa ba tey na, i da ɓada tek aŋga me key ana, ŋga me tsey ka la da guma ŋga hayakakay ana hay; andza ma dar’ar kakay ana, ŋga na ta ’ar aŋga na a wuɗey ma ŋgəlata malam hay kakay, arka ndaw ma wuɗam ma ŋgələmata na hay na, a təkata ba; a harata ba da Egliz. 11Dzəma ɗaw, ka da tsey dey ka tek hayakakay ana zlay, ama tsey dey na ka tek hayna. Ndaw me key tek hayna na, ŋga ndaw ma Bay ma Bəla; ndaw me key tek hayakakay ana na a nəkada Bay ma Bəla kakay. 12Andza ma Demetriyus na, ndaw hay tabiyaha a kam seydewe aŋga ma tek hayna. Dərka ana ta ’ar aŋga na na a key seydewe aŋga na. Ama la na tiyatsa na, la kam seydewe aŋga na, ka sərada na seydewe la na na dərka na.
Me tsey guma a vaw madakwaydok ana
13Tek aɗaw haɗadzidzay i ma wuɗey ma windəkaɓa daha, amana i wuɗey ma windəka ɓa ta windey kakay; 14hərway i dzeley aha ma da daɓa da meney a neney hay, arka aza i da tsadama guma na ta huɗa mey la ma na. 15Zoyzoy ke ndzey ta kah! Dzam hay ka tsadəmkaɓa guma. Tsadatara guma a dzam hay tiyatsa, kwa way way na ma ŋga ma ŋga.
Currently Selected:
3 Zaŋ 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun