1 Zaŋ 3
3
1Nəkafama ka ma wuɗa vaw a neney ɗuhwa na, Baba ma vəlandukurawa na, na aza ka zələmandakwar bəzey ma Bay ma Bəla ahiya na, arka na, lakwa bəzey ŋga hay dərka na! Nəkafama, bəla a slafa ma səradakwar kakay na, ka vədiya, hərway ŋga ka ndzafa Bay ma Bəla kakay. 2Dzam a ɗaw hay, zla ekəɗey ana na, lakwa na bəzey ma Bay ma Bəla ahiya, amana, lakwa ma da tərakwama andza ha na na, ka sərey tsaray kakay. Ka səradakwa ha, aza ka da ɓawa vaw ba na, i da nəkakwama andza ŋga na, hərway i da nəkadakwa na andza ŋga na təŋga. 3Kwa way way me pey dey ka ŋga andza na ŋga na na, a da tərey na tsəzlakka, anza Yezu ana tsəzlakka na tey. 4Kwa way way me key meŋgəsey na, a key na dzerey aha kakay tiyatsa, hərway me key meŋgəsey na, me key dzerey kakay. 5Ama kuray ana na, ka səradama ha, ŋga na Yezu ana na, a bawa na ma da həlata meŋgəsey hay ba, meŋgəsey da ŋga na daha tikay. 6Kwa way way ma ndza ha da ŋga na, a ŋgəsey sakay, kwa way way me ŋgəsey na, ka nəkada kakay, ka sərada kakay. 7Dem a ɗaw hay kwa ndaw ka da zləgadakwar zlay, ndaw me key dzerey na, dzerey aha, andza ŋga na Yezu dzerey aha na. 8Ndaw me key meŋgəsey na, ŋga ndaw ma setene, a da səram na, ma vəday zla da mezley ana na, Sataŋ na ndaw ma ŋgəsa ha. Nəkafama, Bəzey ma Bay ma Bəla a da bawa na mavədiya, ma da davasadara mber ma Sataŋ ba. 9Kwa way way ma ya ha da Bay ma Bəla na, a key meŋgəsey sakay, hərway haləfaw aŋga ma ndza ha da ŋga, arka na a slafa me ŋgəsey sakay, mavəday ŋga ma ya ha da Bay ma Bəla. 10Bəzey ma Bay ma Bəla hay ta bəzey ma Sataŋ hay a da səram na, da tek a neney: kwa way way me key dzerey kakay na, ndaw ma Bay ma Bəla tikay, kwa ndaw ma wuɗa malam aŋga kakay ana na, andza ha atsa.
Ma wuɗa vaw andza na ma Bəzey ma Bay ma Bəla
11Hərway bəzay ma guma na kuray ma tsənadəmərawa zla da me zley ana na, andza neney: hayna wuɗakwama vaw ka 'ar vaw lakwa na hay. 12Zləna andza ma Kayieŋ kakay, Ndaw hayakakay ana ka war 'ar ba na, ma slar ɗay ba a malam aŋga. Arka ɗagay a slara ɗay ba na ka mey? Hərway tek aŋga me key na haya hiya kakay, ama tek ma malam aŋga me key na, dzerey ahiya. 13Ka da rəzlakwar zlay malam a ɗaw hay, kendzey andza bəla a ŋgəladakwar dey kakay na. 14Lakwa na ka səradakwa, lakwa na ka tasəkwawa na ta memətsey a Mesəfrey, kavəday ka wuɗəkwata malam alakwa hay. Ndaw me wuɗey ndaw kakay na, ma ndza ha na da memətsey. 15Kwa way way ma ŋgəlada dey ta malam aŋga kakay na, ŋga na ndaw me kəɗey ndaw vagay aha, ka səradama ha seŋgey, ɗaɗa ndaw me kəɗey ndaw vagay aha na, mendzey me ndəvey kakay ana, da vaw ŋga dakay. 16Zla ekəɗey ka səradakwa ma wuɗa vaw na ka neney: ŋga na Yezu ana na, ma vəlada mendzey ŋga hərway lakwa. Lakwa tiyatsa na, hayna lakwa ka vəladakwa mendzey lakwa, hərway ma malam a lakwa hay tey. 17Kendzey ndaw ana zleley ma bəla neney a rafa daha, arka a nəkada malam aŋga tek a hətsar na, arka na ŋga wuɗarada dey ba, mandzara ka kar da vaw na, na ŋga na na, ma wuɗa vaw ma Bay ma Bəla ana a da ndzey da vaw ŋga na teŋgey? 18Dem a ɗaw hay, ka da wuɗakwama ndaw ta guma, ta huɗa mey dada zlay, amana ta tek ana me key kava, ta dərka. 19Da tek a neney tok na, i da səradakwa lakwa da dərka tok, arka ka slam dey ŋga tok na, i da səfadakwa mevel alakwa. 20Haɗaw mevel alakwa a mandakwar malay na, Bay ma Bəla na a fəna mevel lakwa, a sasəkata tek hay tabiyaha. 21Dzam a ɗaw hay, haɗaw azlakwa mevel a lakwa a madandakwar malay kakay na, na ŋga na ka da ɗulakwar mey a Bay ma Bəla na ta mevel asləta. 22Arka kendzey i tsəhakwama mey mey na, i da ndzafakwa da har aŋga zləna, hərway i wafukwata ha vaw ka mey ma mewey ŋga hay, arka satsa na, i kakwa ha tek aŋga ma dar 'ar ana. 23Mey ma mewey ŋga na na, ŋga kəɗey: me tepey ta me pey 'ar aha ka Bəzey ŋga Yezu Kriste, arka na ma wuɗey vaw ka 'ar vaw lakwa na, andza na ma ŋga ma vəladandukurawa mey ma mewey ŋga na. 24Ndaw ma wafa vaw ka mey ma mewey ŋga na hay na, ma ndza ha da Bay ma Bəla, Bay ma Bəla tey ŋga da ŋga. andza ha tok na, i səradakwa ma ndza ha da lakwa, kuse ma Mesəfrey ŋga ma vəlandukurawa ma hayaha na tok.
Currently Selected:
1 Zaŋ 3: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
