ROMAHAY 16

Pol mija haŋ da Romahay

1I ra gukum ambuh ambuh haɗi asi Febe, sukum ndra mongosoŋ. I ngwas mijini vu a wuzla Cikil ngi misikristu ngi ruwuy Kaŋkre. 2Tiɓakaŋ ti slimiɗ ngi Buymisemuŋ, ti jiviɗ naŋ kuy kuy kaɓa mitiɓihey. Gwat naŋ misi ti may naŋ ɓa ki jinakaŋ ara gar na, jinakaŋ. Asi mike na, naŋ vuna a jini mizli le haɗi, a jiniy ya vuna le ma.

3Jaka haŋ da Prisil ati Akilas, taŋ magam slra ngi Yesu Kristu jom ati ya na. 4A ndir mata ɓa a zizaka hirnga taŋ asi ya ɓa ngi lihiy. Maga taŋ sise, i ya pal ta. Cikil ngi misi kristu Yude tahay gar kwana, ara gaka taŋ di aya. 5Cikil ngi misikristuhoy makusom a hay taŋ na, jaka taŋ haŋ aya. Jaka haŋ da yeme ɗu Epaynet, mbur mitiɓa Kristu dumbuŋ angi hirwuy Azi, i naŋ. 6Jaka haŋ da Mariya micik vu ti slra haɗi vur kum na. 7Jaka haŋ da Andronikus ati Zuniyas, muy ɗuwoy, yo ndra bumoˀ ati taŋ zleˀe angi dangaya. Mislin ngi Kristuhoy a sinaka taŋ le kuy kuy, yo taŋ i misikristuhoy dumbuŋ angi ya.

8Jaka haŋ da Ampiliyatus, ngama ɗu muyummo tisi Bumbulvuŋ. 9Jaka haŋ da Urbeŋ, mbur migi slra ngi Kristu jom ati ndra, waɗ da yeme ɗu Istakis. 10Jaka haŋ da Apeles, ar naŋ mujom ati Kristu na, a biga naŋ mitiɓa Kristu na le. Jaka haŋ da mizli ngi hay Aristobuloy. 11Jaka haŋ da Herodiyoŋ, muy ɗu. Jaka haŋ da mizli ngi hay Narkis, matiɓaka Bumbulvuŋ na. 12Jaka haŋ da Trifen ati Trifosa, micikam vu haɗa ti slra ngi Bumbulvuŋ. Jaka haŋ da mular ɗu Persis, sukum ɗu mongoso micici zlak ti slra ngi Bumbulvuŋ. 13Jaka haŋ da Rufus, mbur miteŋteŋ angi slra ngi Bumbulvuŋ waɗ mumuŋ, migi ti ya kaɓa mangal naŋ. 14Jaka haŋ da Asiŋkrit ati Flegoŋ, Hermes ati Patrobas waɗ Hermas ati sukum ndra mekelemey misi ati taŋ gar. 15Jaka haŋ da Filologus ati Zuli waɗ Nere ati sukum naŋ mongosoŋ, waɗ Olimpas ati mitiɓihey, misi ati taŋ gar.

16Jam haŋ ar wala kumo ti ji vu kuɓuy kuɓuy ngi misikristuhoy. Cikil ngi misikristuhoy gar a jukum haŋ le.

Mi ngi kuti vu ngi dirba wãˀ

17Sukum ɗuwoy, ambuh ambuh kum, wam vu avu mizli maslikiɗam ɓi ngi wunkaˀay a wuzla kumo, ma gam gwat ngi bi sar da mizli, ti dubuna taŋ gwat mekelem wal avu ngi kum mulumaka misi zleˀe na. Kiraham kileŋ avu taŋ. 18Asi mizli tayna anta gam di i gwat ngi Buy ndra Kristu ta, amma a gam asi kwacay taŋ si. A ra gaka gilaw da mizli misi mevel taŋ ka ngi ziri, ti ɗuva taŋ hunum taˀ taˀ ti mingiɓi mideɗeke. 19Naŋ kine, ko amaka gar na, mizli gar a sinaka le, ki ra cinam mi da Bumbulvuŋ kuy kuy. Ya kwana, i ra mumul asi ɓi kum aya. Amma i wuɗ ɓa ki ndiram ti lesl ngi gi gwat mezleŋ, ki cam ar ɓi malambaˀa ta. 20Buymisemuŋ mavul zuyo, a sa njirsla Satana asi sar kumo gweˀe. Anja gimezle ngi Buy ndra Yesu a ndir ati kum.

21Timote, ndra magam slra cuwa, a jukum haŋ le, yo Lukiyus, Zasoŋ ati Sosipater, muy ɗuwoy, a jukum haŋ le ya.

22Ya Tertiyus, ya mutoho ɗerewol hana, i ra jukum haŋ ar ndra mujom ati Bumbulvuŋ.

23Masay ɗu Gayus, Cikil ngi misikristuhoy gar makusom a hay naŋ na, a jukum haŋ le. Eraste, mbur miji zlili ngir walahaya, a jukum haŋ le, waɗ sukum ndra Kartus ma. [ 24Anja gimezle ngi Buy ndra Yesu Kristu a ndir ati kum gar.]

Hunum ngi kiɗa mi naŋ

25Hunumukum Buymisemuŋ! Naŋ ti gidaŋ ngi cucukum zlak gidaŋ gidaŋ avu Ɓimezle ya matil di mi, ɓi ya mabigi di Yesu Kristu kaslsla, kaɓa sin ya mulumo di tivu ɓi muɗum ngi Buymisemuŋ zleˀe, misi zle ngadana ta. 26Amma wurenna, ɓi mijiviɗey mutohoko na, a njika le njak wãˀ. A ram ti ɓi naŋ le avu sukwi ngi mizli gar, a sinaka le, kaslsla kaɓa Buymisemuŋ ngi sete miɗiya ɓi naŋ ɓa a tiɓaka, yo ɓa a jaka a hirnga.

27Buymisemuŋ, misi sinmijileŋ i naŋ pal naŋ. I gakaŋ dudok hã ngi set tisi Yesu Kristu! Amin.

Currently Selected:

ROMAHAY 16: BEGDC

Highlight

Copy