Mark 16
16
Yesu mislikiɗ ti wuzla mumucahay
(Yo pura Mat 28.1-8; Luk 24.1-12; Zaŋ 20.1-10)
1A dirba hin ngi sabat mucuh na, Mariya ngi Magdala, Mariya mumuŋ ngi Zak waɗ Salome, a hiɗikam urdihey ɓa ra paka da vagay ngi Yesu. 2Dimas ngi miprik prik na, a ram nga mizivi, naɓa pas a jiɗo le si. 3A ɓam ar wala taŋ: «Masa gidigila ndra ɗuguro ti mi zivi, i waka?» 4Amma taŋ muzuɓaka hiri paɗ na, a puraka ɗugur a gidigil le ɓaˀ murvay. I ɗugur madiɗa ngbaŋ. 5Taŋ micam ng'ar zivi na, a puram mbur gawla, joˀ tir vay hazum, jibe babara ɓaˀ avu vu, didak a muɗa taŋ. 6Amma mbur gawla tuwa a ɓa taŋ: «Anja didak a mawuɗo kum ta, ki sipam di i Yesu, mbur Nazaret midiraka avu dum na, a slikiɗ le, naŋ anta aka ta. Puraka, li taŋ mikaka anga zleˀe. 7A ram, ɓaka ɓi nah da mizli ngi seˀehey, yo waɗ da Piyer: a sa ru dumbuŋ ar kum nga Galile. Ki sa purakaŋ a diga kaɓa naŋ muɓukum di zleˀe.» 8Dar ngwasay tuwa a bam, a kilam kileŋ tivi zivi, asi ara jijikam haɗi, a muɗa taŋ didak le. Ko a ɓaka ɓi nah da mbur ta, asi ara zluwunam.
Yesu mibiga vu da Mariya ngi Magdala
(Yo pura Mat 28.9-10; Zaŋ 20.11-18)
9Yesu a slikiɗ ti wuzla mumucahaya ngi dimas ngi miprik prik, a biga vu dumbuŋ da Mariya ngi Magdala, naŋ muɓul setenehey zleˀe tarnaˀ ti vaˀa na. 10Mariya, ara slufa ɓi nah da mizli taŋ mubumoˀhoy zleˀe ati Yesu. A ra likam, yo a roko tuwam zleˀe. 11Amma taŋ micinaka, naŋ miɓi: Yesu naŋ da, a pura le na, a tiɓaka ta.
Yesu mibiga vu da mizli ngi seˀehey cuw
(Yo pura Luk 24.13-35)
12A dirba nah na, Yesu a biga vu ti jiviɗ mekelem pal ma, da mizli cuw ngisi mislineye, ti taŋ maram ng'ar prok mekelem ada. 13Joˀ taŋ a moko, a slufaka da cil taŋ mekelemey, amma gar ti nah kwana, a tiɓaka mingiɓi taŋ ta na si.
Yesu mibiga vu da mizli ngi seˀehey kuruˀ ngaŋ kaˀ
(Yo pura Mat 28.16-20; Luk 24.36-49; Zaŋ 20.19-23; Slra 1.6-8)
14A dirba nah ma na, a biga vu da mizli mukuruˀ ngaŋ kahaya, ti taŋ muroko zumam ɗafa. Joˀ a mbiɗa taŋ hirnga asi taŋ mitiɓakaŋ ta, yo asi hirnga taŋ migidaŋ na. Asi mizli mupurakaŋ a slikiɗ le na kwana, a tiɓaka mingiɓi taŋ ta na si. 15Joˀ a ɓa taŋ: «A ram ng'ar duniya kurzluˀ gar, tilam mi ti Ɓimezle da mizli gar. 16Mbur masa tiɓi, yo masa ci ar yam na, a sa lih. Mbur masa tiɓi ta na, kiita a sa jaŋ. 17Puraka ɗi, mizli masa tiɓam na, a sa gam cekenehey ani: a sa ɓulam setenehey, a sa ɓam ti mi manawayaŋ, 18a sa jaka kawa ti haŋ, gwat makiɗ vu vagaya, da ko a saka le kwana, anta sa ga taŋ gwat ko neˀ ta, a sa bucaka haŋ angi misi jijihey, mizli tayna a sa mbulom.
Yesu mimi ng'avi Buymisemuŋ
(Yo pura Luk 24.50-53; Slra 1.9-11)
19A dirba Buy Yesu miɓa taŋ kahana na, a zuɓakaŋ nga muŋ, ara cifi tir vay hazum ngi Buymisemuŋ. 20Mizli ngi seˀehey a ram, a tilam mi ti Ɓimezle ko maka gar. Buy Yesu ara gi slra ati taŋ, yo ara biga mingiɓi taŋ matilam di mi na, naŋ jeŋŋe gisiŋ na, ti gi cekenehey cici.
Currently Selected:
Mark 16: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.