MISE 1
1
1Ti hin ngi Yotam ati Ahas waɗ Ezekiyas, buy Zudahaya, Mise, mbur ngi ruwuy Moresete, Bumbulvuŋ a ɓaŋ ɓi. A pur ɓi ani ti kleŋ vur walahay Samari ati Zeruzalem.
Bumbulvuŋ mimbiɗa hirnga da mizli naŋhay
2Kum mizli gar, cinam! Hirwuy ati mizli ngi raˀahay gar, jikaka slimiɗe.
Bumbulvuŋ, Buymisemuŋ a wuɗ a gi sedewo ar kum
zle ar hay naŋ mipala.
3Bumbulvuŋ n'ani ara bo tir hay naŋ.
A ra po sar, ara ru ar li miɗingir ɗingirey ngi si ruwuyo.
4Muwãhay ara luwuslam asi sar naŋ,
si virzi ngi sozohoy ara ndislam,
kaɓa tebeɗ a ciki vu,
kaɓa yam maɓul ar misirnene.
5Hana a gi gar na, vur dideˀ ngi Zakopoy mislikiɗam ɓi,
yo vur Israyeley migam mungra.
Slikiɗa ɓi ngi dideˀ ngi Zakopoy vuna i wanaka?
I walahay Samari takwa?
Li miɗingir ɗingir ngi Zudahay vuna i wanahay ka?
I walahay Zeruzalem takwa?
6Vurˀe, hirwuy Samari, i sa tiri di diŋ,
i sa tiri di hirwuy ngi hufa gudubun anga.
Ɗugur naŋhaya, i sa gidigila taŋ ng'ar hurjijiŋ,
virzi naŋ muɗuvaka na, i sa ŋhuko avra.
7Kuli naŋ miciɗa ti ciɗeye, i sa ngurfo taŋ cek avra,
gwat ngi lum naŋ gar na, i sa pa taŋ ng'ar vu.
I sa waha kuli naŋhaya meɗ meɗ,
asi a cikila gwat tayna gar na ti lum naŋ ngi madama,
a sa tiram lum ngi madama a muŋ ma.
Mendere masa luuma Zeruzalem
8Ya Mise, i sa kuɗuma tuwuy, yo i sa widi ti gidaŋ ya.
I sa ru manja tarak a sar, waɗ vu gulndiŋ kine.
I sa zlo kuɗma tuwuyo
kaɓa kiriɓuh.
I sa zli dimis ngi vagay kaɓa tuwuy ngi maduuli.
9Kay, waˀa ngi walahay Samari na, slalak naŋ anta mata.
A ra ndih sesẽŋ nga Zuda,
hã duk mizlingre ngi mizli ɗuwoy a Zeruzalem.
10Ki tilam mi ti ɓi nah asi ruwuy Gata ta,
ki tuwam ta.
Asi ruwuy Bet-Leˀafra na,
putukulom ar mereɓ.
11Kum mizli Safirey,
kilam
gulndiŋ kine jom ti mesem.
Mizli Saˀanaŋhay
anta sa bam mata.
Asi ruwuy Bet-Esele, i kuɗuma tuwuy.
Jiniˀis asi kum anta mata.
12Mizli Marotoyo,
a kam jiji madiɗa le ngi wãˀa.
Haˀaw, mendere Bumbulvuŋ mupulo di na,
a ndil le sesẽŋ a mizlingre walahay Zeruzalem.
13Mizli Lakisey,
luwaka mota ngi vurum kumoy avu piliseye,
asi mungra ngi Zeruzalemey na, a bo tivi ka,
yo mungra madiɗa ngi Israyeley na,
ki gaka le ya.
14Vurˀe, kum ati mizli Moreset-Gataya,
kisa wuɗkam.
Hay ngir walahay Akzipeye,
a sa tiram njaha hiri ngi pula gir ta,
avu buy Israyeleye.
15Mizli Maresahay,
ya Bumbulvuŋ, i sa so ti mbur ngi cifi bugawla ar kumo.
Buy hirnga ngi Israyeleye,
a sa ɗumom sesẽŋ ar butum a Adulam.
16Kum mizli Zeruzalemey, hicaka ngwic hirngahay avra,
vur ziri kumoy, kum mawuɗam taŋ haɗa na,
Slaka himac hirngahay avra, mbak taŋ ndohho ndohho kaɓa mogodokoy,
asi a jaka ziri kumoyo le ng'ar beke, kileŋ avu kum.
Currently Selected:
MISE 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
