Luk 5

Yesu mizila mizli ngi seˀe mudumbuŋhoy

(Yo pura Mat 4.18-22; Mark 1.16-20)

1Ngi pas mekelem ada na, Yesu a ro deŋ a mi yam madiɗa ngi Zenezaret, zigiduw ara ngislam vu, ɓa ngi cine ɓi ngi Buymisemuŋ. 2Yesu a pur palalamay cuw a mi yama. Miji kilifey a bam le, ara bunaka zuva taŋhaya. 3Palalam mekeleme, i ngi Simoŋ, Yesu a ci anga. Joˀ a ɓa Simoŋ ɓa a kirih di neˀ tivi mi buzugumo ng'ar yam. Yesu a cifi a hur palalam tuwa, dar a dubuna gwat da zigiduwo.

4Ti naŋ mikiɗa mi ngi ɓi naŋ na, a ɓa Simoŋ: «Kiraha palalama ng'ar yam mijileŋ, paka zuva kumoyo, ɓa ki jam kilifi.» 5Simoŋ a mbiɗaŋ di: «Buy, i hinam kap li daŋ daŋ, i giram le, ko i jam gwat ta. Amma asi mingiɓi ɗik na, i sa pa zuvahaya ɓula.» 6Joˀ a pa zuvahay tuwa ng'ar yama, a jam kilife haɗi, hã zuva taŋhay ara ngiram. 7Dar a vurkoko cil taŋhay ngir palalam mekeleme, ɓa a soko a jinaka taŋ. A soko, a nahaka palalamaya cuw taŋ, hã palalamay a wuɗ a cam ng'asi yam. 8Simoŋ Piyer mupura kanah na, a huruk huruk asi sar ngi Yesu, a ɓaŋ: «Buy, kirih kileŋ avu ya, asi yi mbur migi mungra.» 9Simoŋ ati mizli taŋ misi bummoˀhoy gar na, a zluwunam le haɗi, asi taŋ mupuraka a jam kilife le haɗi tuwa. 10Cil naŋhay, ti Zak ati Zaŋ, ziri ngi Zebedeheye, a zluwunam le ya. Amma Yesu a ɓa Simoŋ: «Ki zluwun ta, zle wurenna, kisa ji di i mizli.» 11Dar a kirohoko palalam taŋhaya nga ˀaydidik, a pulaka gwat taŋhaya gar, a ram asi Yesu.

Yesu miɗiya mbur misi kukula

(Yo pura Mat 8.1-4; Mark 1.40-45)

12Akẽh na, ti Yesu misi angi walahay mekelem ada na, mbur ada a diga, kukula a bo avu vu naŋ tisl gar. Ti naŋ mupura Yesu na, a dira dibiɗe durus a ruwuy, a tumbuloŋ, a ɓaŋ: «Buy, da ki ngum le na, ki ɗiyiy gu.» 13Yesu a tila haŋ, a wusaŋ, a ɓaŋ: «Yi ngum le, ɗiyi!» A haŋhaŋ si na, kukula a muɗ mi le ava. 14Dar Yesu a ɓaŋ ɗaˀ le: «Anja ki ɓa da mbur ta. Amma ara biga vu ɗik da masay, yo vula gwat ngi gi mikuli a mbuŋ Buymisemuŋ ngi ka miɗiyi na, kaɓa Moyis miɓa zleˀe ɗaˀ le na, ɓa mizli gar a sinaka, ki ɗiyi le.»

15Mizli ara ɓaka ɓi ngi Yesu haɗa haɗa, zigiduw haɗi a kuso nga cine ɓi ava, yo ɓa a mbulo taŋ tir jiji taŋhaya. 16Amma Yesu a bi silaŋ nga ɓuh, ara dir dibiɗ.

Yesu miɗiya mbur muhulɓaŋ

(Yo pura Mat 9.1-8; Mark 2.1-12)

17Ngi pas mekelem ada na, Yesu ara dubun gwat da mizli. Farisahay ati buy ngi ɓimujuwahaya, t'ada joakẽh, a soko tir prok ngi Galile, ngi Yude waɗ tir walahay Zeruzalem gar. Yesu, naŋ da ti gidaŋ ngi Bumbulvuŋ ɓa ngi mbulo misi jijiheye. 18Mizli a zuɓoko mbur muhulɓa, ɓaˀ ar cacala, a puram li ngi ci di ɓa ara kaka a mbuŋ Yesu. 19A sinaka ɓa a cam di ti ka ta, asi mizli ngasl ngasl haɗi. A jiɗam nga hirnga viŋ, a ngwaˀam li njoŋ a hirnga viŋ, dar a pam di sar ti cacala naŋ tir li munjoŋ tuwa ti wuzla mizli nga mbuŋ Yesu. 20Yesu mupura tiɓi taŋ na, a ɓi: «Ngama ɗu, mungra ɗikey a puyam le avra.» 21Buy ngi ɓimujuwahay ati Farisahay a zlaka a wulkam a mevel taŋ, a ɓam: «I mbur wana hana maza Buymisemuŋ na ka? Mapuy mungra gu, i waka? Sey Buymisemuŋ pal naŋ takwa?» 22Amma Yesu a si na wuluk taŋ le, a mbiɗa taŋ di: «Ki wulkam kanah a mevel kumo vur mike? 23Mingiɓi mukutum i wanaka? Mungra ɗikey a puyam le avra» malla: «Slikiɗ, a ru» na kwa mbrike? 24Amma i wuɗ ki sinaka, Mangal ngi mburo, naŋ da ti gidaŋ ngi puya mungra ngi mizli a ruwuyo.» A ɓa mbur muhulɓa tuwa: «I ra ɓuw, slikiɗ, zuɓa cacala ɗike, aru ngi hay!» 25A haŋhaŋ si na, mbur tuwa a slikiɗ a mbuŋ mizli gar, a zuɓa gwat ngi hin naŋ, aru ngi hay naŋ bal ti ga dudok da Buymisemuŋ. 26Gwat nah a zuma taŋ hirnga le gar, a gaka dudok da Buymisemuŋ. Zluwun a ga taŋ le haɗi, a ɓam: «Dana na, i puram gwat, ndra mupuram ɗaˀ ta le!»

Yesu mizila Levi

(Yo pura Mat 9.9-13; Mark 2.13-17)

27A dirba nah, Yesu a bi, a pur mbur micikila buutu, a zilaka Levi, naŋ ar hay ngi wurka buutu. Yesu a zilaŋ, a ɓaŋ: «Sipiy.» 28Levi a slikiɗ, a pula gwat naŋhaya gar, dar a sipaŋ.

29Akẽh na, Levi tuwa, a gi gwat ngi zum da Yesu a hay naŋ. Micikila buutuhoy haɗi ati mizli mekelemey haɗa ara zumam bumoˀ. 30Amma Farisahay ati buy ngi ɓimujuwahay a dirɗaka mizli ngi si Yesuhoyo, a ɓaka taŋ: «Kum mazumam gwat, yo kum masam gwat jom ati micikila buutuhoy waɗ mizli migi mungrahay na, vur mike?» 31Yesu a sla taŋ di: «Mizli miwirwireye, t'anta ti may ngi doftoro ta, sey misi jijihey. 32Yi so zila mizli mijeŋŋehey ta, amma yi so zila mizli migi mungrahay, ɓa a mbiɗaka mevel taŋ.»

Yesu miɓa ɓi ngi gi dalyam

(Yo pura Mat 9.14-17; Mark 2.18-22)

33Mizli a ɓaka Yesu: «Mizli ngi si Zaŋhay ada gam dalyama ndrehhe, yo a diram dibiɗ, waɗ mizli ngi si Farisahaya kanah ma. Amma mizli ngi si kahaya, taŋ ara zumam, ara sam gwat si mbrike?» 34Yesu a ɓa taŋ: «Mizli mizilaka taŋ le ng'ar li vula ngwasa, da zile, naŋ da ati taŋ na, ki tikaka taŋ ˀay gu ɓa a gam dalyama kwa? 35Amma hin naŋ a sa ndilawa, a sa zuɓaka zile tir wala taŋ, dar a sa gam dalyama tapasa so.»

36Yesu a ɓa taŋ ɓi miweˀ ti wi ava ma, a ɓa taŋ: «Mbur anta ngir gabaga neˀ avu zana nawaya ɓa a ɗuv di zana magala ta. Da kanah na, naɓa gabaga nawaya a sa ngir. Yo gabaga nawaya tuwa anta sa jam haŋ ati magala mata ma. 37Mbur anta zlur mbaazla mideɗek ng'ar kwenekwene magalahaya ta. Da kanah na, mbaazla mideɗek masa nih na, a sa nduzo kwenekweneheye. Yo mbaazla a sa pi avra, kwenekwenehey kwana, a sa hiryam. 38Sey a zluroko mbaazla mideɗeke ng'ar kwenekwene nawayahay. 39Ko wa gar masi mbaazla minaha le na, anta hĩyã mbaazla mideɗeke mata, asi a sa ɓi: ‹Minaha a funa mideɗeke le.›»

Currently Selected:

Luk 5: BEGDC

Highlight

Copy