Luk 15

Ɓi ngi tumuŋ miziza, misa lumaka a muŋ

(Yo pura Mat 18.12-14)

1 Micikila buutuhoy ati mizli migi mungrahay gar a kirohoko ng'avu Yesu, ɓa a cinam mingiɓi ava. 2Joˀ Farisahay ati buy ngi ɓimujuwahay a dirɗakaŋ: «Mbur hana a tiɓa mizli migi mungraˀahaya kuy kuy, a zumam gwat bumoˀ.» 3Dar Yesu a wa taŋ ɓi ani: 4«Da mbur a wuzla kumo, naŋ da ti tumuŋ skat, purla a wuzla taŋ a zizi le na, a pula mizli ngir ngoltir nga ngoltir na mbak a pala, ɓa ara supo mipal mizizi na, sey da naŋ mulumo di le takwa? 5Da naŋ mulumo di le na, a mumul, a zuɓo di lap a gagalaˀay. 6Yo naŋ mumo le a haya na, a kuso ngama naŋhay ati midigwi naŋhaya, a ɓa taŋ: «Mumulukum bummoˀ, asi tumuŋ ɗu mizizi zleˀe tuwa, yi luuma le!» 7Naŋ kine ya, i ɓukum na: Da mbur migi mungra purla mimbiɗi le ng'avu Buymisemuŋ na, mumul a sa gi haɗi a muŋ vurˀe, fineˀ mizli mizli ngir ngoltir nga ngoltir mezlehey misi ti may ngi mbiɗi mevel ti mbiɗi ta na.

Ɓi ngi suloy miziza, misa lumaka a muŋ

8Malla ta ma na, da ngwasa, naŋ ti suloy kuruˀu, amma a zizi le pal asi taŋ na, a ji vu avu lampe, a fuca viŋ, a pura kuy kuy, sey da naŋ muluma le takwa? 9Yo da naŋ muluma le na, a cikilo ngama naŋhay ati midigwi naŋhaya, a ɓa taŋ: ‹Mumulukum bummoˀ, asi suloy ɗu mizizi zleˀe tuwa, yi luuma le a muŋ!› 10Naŋ kine ya, yi ɓukum na: Da mbur migi mungra purla mimbiɗi le ng'avu Buymisemuŋ na, modro ngi Buymisemuŋhoy a mumulom haɗa.»

Ɓi ngi mangal miziza, misa lumaka a muŋ

11Yo Yesu a ɓi ma: «Mbur ada, naŋ ti ziri cuw. 12Hiri meciɗek a ɓa cine naŋ na: ‹Baha, zlili ka masa pula ndra di na, vuliy mi nga ya.› Joˀ cine a wunka taŋ zlili naŋ. 13Hin neˀ a dirba nah na, mangal hiri meciɗek tuwa, a cikila zlili naŋ gar, aru suyom nga hirwuy mikileŋ. Joˀ ara gi sulome a diga, a hirya zlili naŋ lambaˀ. 14Ti naŋ mihirya zlili naŋ tuwa gar na, may a gi haɗi angi hirwuy nah tuwa, hã a tiri misi murga wãˀ. 15Aru nga ci slra avu mbur ngir walahay ngi hirwuy nah vuna, mbur a slinaŋ nga jigina fedemey a duba gala. 16A wuɗ zleˀe ɓa a mbi ti zigwi, fedemey mahumbuɗaka na, amma ko mbur mavulaŋ anta. 17Lesl a saŋ keŋ, a zla a ɓi ti kwacay naŋ: ‹Gawla ngi baha ɗuwoy gar, gwat ngi zum a ndir avu taŋ lambaˀ. Ani ya, may ara kiɗiy aka! 18I sa mi ng'avi baha, i sa ɓaŋ: Baha, yi gi mungra le avu Buymisemuŋ waɗ avu ka. 19Yi ndila ter ɓa ki ziliy mangal ɗike mata. Gi ti ya ka yi mbur ngi wuzla gawla ɗikey si.› 20A ra ru ng'avi cine tuwa. Ti naŋ mikileŋ aruŋ na, cine a pura bǝzǝw, a puraŋ ˀircece. Dar a kil ng'avaŋ, a jaŋ kuɓuy. 21Joˀ mangal a ɓaŋ: ‹Baha, yi gi mungra le avu Buymisemuŋ waɗ avu ka, yi ndila ter ɓa ki ziliy mangal ɗike mata.› 22Amma cine a ɓa gawla naŋhaya: ‹Wusam vu, zuɓoko zana hirnga, kakaŋ di, cakaŋ dangwa avu muzuŋ haŋ, yo cakaŋ tarak a sara. 23Joko zuŋ sla muzlumbra, slakaŋ, gukum muguzlum. 24Asi mangal ɗu hana, a muc le zleˀe, ani a mo le ti siifa. A zizi le zleˀe, amma yi luuma le a muŋ.›

Dar a zlaka muguzlumo so. 25Ti nah na, mangal modogom a ro zleˀe ar guva. Ti naŋ mamawa, a ndilo gweˀ avu hay na, a cin hurum ngi badak, ara ɓurgam. 26A zil mbur pal a wuzla gawlahaya, a cufuɗaŋ: ‹I mi migi ka?› 27Gawla a mbiɗaŋ di: ‹Sukum ɗik a ndilo le, bunuk a kiɗ zuŋ sla muzlumbra, asi a pura a ndilo le ti vu naŋ zuy zuy.› 28Dar mangal naŋ modogom tuwa a ji mevel, a ngum ci ngi haya mata. Cine a bawa, a tumbuloŋ ɓa a ci ngi haya. 29Amma a mbiɗa da cine: ‹Pura, a gi le wurenna vi mbeˀ mbeˀ, i ra guw slra, ɓi ka miɓiy di le gar, ɓa yi ga ta na anta. Amma ko zuŋ ˀaw tekeɗe, ki vuliy ɗaˀ ɓa i humbuɗaka ati ngama ɗuwoyo ta wãˀ. 30Amma mangal ɗik hana, mihirya zlili ɗik gar ati ngwasay, naŋ mindilo na, ki kiɗaŋ zuŋ sla muzlumbra ɓula.› 31Cine a ɓaŋ: ‹Mangal ɗu, ka, ka ndrehhe avu ya, yo gwat nga yahay gar na, i ngi ɗikey takwa? 32Na sukum ɗik hana, a muc le zleˀe, amma n'ani ti siifa, a zizi le zleˀe, yi sa luuma le a muŋ. A zlir le ɓa i gam muguzlum, i mumulom takwa?›»

Currently Selected:

Luk 15: BEGDC

Highlight

Copy