ZONAS 4
4
Buymisemuŋ mupura ircece da Ninive vur mike na, Zonas ara sinaŋ
1Zonas a cin ndum ta ndiɗaˀ wãˀ, a ji mevel. 2A tumbulo Bumbulvuŋ, a ɓaŋ: «Aw Bumbulvuŋ ɗu! Ti ya misi angi hirwuy ɗu na, i ɓi a kwacay ɗu zleˀe kahana vuna. Ya muwus vu ngi kil nga Tarsis na vurˀe. I si na le kuy kuy zleˀe si, ki Buymisemuŋ migi mezle, mapur ircece, maji mevel kutum ta, mawuɗ vu haɗa, yo da ka mujuwa ɓi le a mevel ngi gi malambaˀ da mburo na, ki pula teˀe. 3Wurenna so na, Bumbulvuŋ, ambuh ambuh ta kwa, ziziy hutuŋ, avu ya na, bonoy titiri, wuya ar vigiɗi!» 4Bumbulvuŋ a mbiɗaŋ di: «Ka miji mevel na, naŋ kasl sukwani?» 5Akẽh na, Zonas a bi tir walahaya, ara cifi kini tisi pas ngi miprik ngi walahaya. A ɗiyi mazlaɓ, a cifi aseˀe, ɓa a kutuko gwat masa gi ar walahaya. 6Dar Bumbulvuŋ, Buymisemuŋ a puso widis kaˀ a hirnga Zonasa, a gaŋ suɗuku, ɓa a pula ji mevele lambaˀ na. Zonas a mumul haɗa teˀ vur widis tuwa. 7Ngi miprik, li naŋ muwun na, Bumbulvuŋ a slino mumuyuŋ, a ci avu widis tuwa, a muˀul sok. 8Akẽh na, pas mujuɗo na, Buymisemuŋ a go himiɗ mawur vu tisi pas ngi miprike, dar pas a wura Zonas a hirnga. A ndir mata ngi ɓurslaŋ, joˀ Zonas a cufuɗ mucu, a ɓi: «Bonoy titiri, wuya ar vigiɗi.» 9Akẽh na, Buymisemuŋ a ɓa Zonasa: Ka miji mevel vur widis hana na, naŋ kasl sukwani?» Zonas a mbiɗaŋ di: «Hĩ! Ya miji mevel hã ngi cufuɗa muc na, naŋ kaslsla.» 10Bumbulvuŋ a mbiɗaŋ di: «Ka, ki ra pura ircece da widis hana, ka migir vu ɗik neˀ vurˀe ta, i ka migila ta, a gil ar duvuɗ purla, yo ngi duvuɗ naŋ mekelem si na, a mucu. 11Na, Niniv walahay madiɗaŋ, misi mizli anga fineˀ durmuk skat ti kukur cuw, a sinaka mezle ati malambaˀa ta, yo ginewey anga, a slufam ta, ki wuɗ ɓa i pura taŋ ircece ta mbri jak ka?»
Currently Selected:
ZONAS 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.