ZLI VIRZI 20

Abraham ati Sara a hay Abimelek

1Akẽh na, Abraham a slikiɗ, aru kini ng'ar li mazilaka Negev, ara cifi ar wala ngi Kades ati Sur, a dirba nah, a sa zik neˀ a Gerar. 2Abraham a ɓa mizli vur ngwas naŋ Sara na, i sukum naŋ. Joˀ Abimelek, buy madiɗa ngi Gerar, a slin ɓa a zuɓakaŋ Sara. 3Amma ngi duvuɗ nah na, Buymisemuŋ a biga vu da Abimeleke angi musuwun, a ɓaŋ: «Ani kisa mucu, asi ka muzuɓa ngwas hana na, naŋ ti zil.» 4Abimeleke, a gumbuˀ ng'ava zleˀe t'aruŋ, a ɓa Buymisemuŋ: «Bumbulvuŋ ɗu, ko da walahaya gar naŋ jeŋŋe kwana, ki zizaŋ cummo kwa?» 5Abraham ti hirnga naŋ a ɓiy le: «I sukum ɗu kini ta kwa?» Ngwasa kwana, a ɓi le njah: «I sukum ɗu.» Yi ga ti mevel mezleŋ, ko i gi malamba neˀ ta. 6Angi musuwun vuna ma na, Buymisemuŋ a mbiɗaŋ di: «Ya vuna kwana, i si na le, ki ga ti mevel mezleŋ, yo mutukuw ɓa ki gi mungra avu ya ta na, i ya vuna ma, ya mupuluw ɓa ki wusa ta na, vurˀe. 7Wurenna, mi ti ngwas hana da zil naŋ a muŋ, asi zil naŋ i mijiviɗi, a sa dir dibiɗ ar deɗe ɗike, ɓa ngi laha siifa ɗike. Amma da ki maŋ di ta na, si na sin le, kisa muc gisiŋ gisiŋ, ka ati mizli ɗikey gar.» 8Ngi miprik prik na, Abimelek a slikiɗ, a zilo gawla naŋhay gar, a slufa taŋ mingiɓi hana gar. A zluwunam haɗi teˀe. 9Dar Abimelek a zila Abrahama, a cufuɗaŋ: «Ki ga ndra hana i mike? Yi guw malambaˀ mi, ɓa hã ki ciy ng'ar mungra madiɗa jom ati zumabuy ɗu ka? Ki giy hana i gwat ngi gi da mbur ta.» 10Abimelek a ɓi ma: «Ki wuluk zleˀe mbri ɓa ki ga kahana ka?» 11Abraham a mbiɗaŋ di: «I ɓi ti kwacay ɗu zleˀe na: zluwun ti Buymisemuŋ anta neˀ asi ruwuy hana ta, ani a sa kiɗikiy asi ngwas ɗu kwani. 12Na zle i sukum ɗu gisiŋ, cine ndra jom, amma mumuŋ naŋ pal ɓula, naŋ mitiri ngwas ɗu na vurˀe. 13Ti Buymisemuŋ mubo ti ya wuk avu hay ngi baha na, i ɓa ngwas ɗu Sara: ‹Ar li ndra masa ram ara gar na, giy mezle, ɓi: Ki i sukum ɗu.›» 14Abimelek a ngic tumuŋhoy, ˀaway, slahay waɗ beke, mizile ati mongosohoy, a vula taŋ da Abrahama, a maŋ ti ngwas naŋ Sara a muŋ, 15a ɓaŋ: «Hirwuy ɗu n'ani a mbuŋ ɗike, ka cifi ar li mucuruw hiri le gar.» 16A ɓa Sara tuwa ya: «Pura, y'ani vula suloy gabal da sukum ɗike. I gwat masa biga da mizli kum mubummoˀhoy, ɓi hana a cuw ka ta.» 17Abraham a tumbulo Buymisemuŋ a mbulo Abimelek ati ngwas naŋ waɗ beke naŋ mongosohoyo, a yam a muŋ. 18Asi mike na, ngwas ngi hay Abimelekey gar na, Buymisemuŋ a cica taŋ le zleˀe, a yam ma ta, asi Sara ngwas ngi Abrahama.

Currently Selected:

ZLI VIRZI 20: BEGDC

Highlight

Copy