EZEKIYEL 4
4
A sa ndaha hirnga ngi Zeruzaleme ngi kiɗa vu
1Ka mburu, cin, zuɓ brik, ka ɓaˀ a mbuŋ ɗiki. Doho foto ngi walahay Zeruzalem araŋ. 2Ndih mesenehey gun a hirnga naŋ, li vigiɗ ngi ɗumo sojehey, yo kus hirwuy kos kos vriw a muŋ ngi jigina li, ɗuv walahay guɗukoy, yo cici mota ngi vurumoy gun gun hirnga naŋ. 3Zuɓ ɓiri mupuɗaˀa, ɗuvakaɓa mohol ar wala ɗik ati walahaya. Ɗuva hiri taˀ angaŋ. A sa gi kaɓa ki ndahaŋ le, asi ki tindih gwat le a mbuŋ naŋ. I gwat mabigi gwat da mizli Israyeley.
4Hin tup tir cakay vay gula, pa mungra ngi Israyeleye ti seˀe. Ti ka masa zik tup tir cakay vay gula tuwa na, kisa jijira mungra ngi Israyeleye. 5I tikuw ˀay ngi ti hiney weˀe avu vi ngi taŋ migam di mungra na: i hin skat skat makir ti kukur ngoltir, kisa jijira mungra ngi Israyeleye. 6Daka misa kiɗa mi gi hin tayna le na, kisa hin sar mucuw naŋ a muŋ ma, tir vay hazum, ɓa ki jijira mungra ngi Zudahay: i hin kukur mufaɗa. Vi gar na, i ɗuvuw hin purla vurˀe. 7Ki sa ɗuva hiri taˀ ar Zeruzalem mindaha tuwa, kisa ska haŋ ɗike ɓaˀ kine ng'araŋ, joˀ kisa gucoŋ mi ti slimiɗ ɗu. 8Ani, i sa juwuw ti zeweɗe, k'anta sa mbiɗa cakaya tir vay mekeleme gu ta, sey a ndila hin ka mikiɗa mi ngi ndaha hirnga ngi walahay na le.
9Wuɗ alkamari ati daw giziŋ, haɗiyuŋ mogomboro ati haɗiyuŋ memeɗe, magaya ati alkamari migidaŋ, pa taŋ sek ar magayak, kisa di taŋ ɗaf. Hin ka masa zik di tuppo tir cakay ɗik: hin skat skat makir ti kukur ngoltir na, kisa zum di i naŋ. 10Ɗaf ɗik ka masa zum i nah: reta kilo vur hin gar. Hin tayna gar na, kisa zum di i nah. 11Yam ngi si ɗik ada: vur hin gar na, litir purla. 12Ɗaf ɗik ka masa zuma, a sa bam vu ati maɗaf ngi daw giziŋ mutuso. Ki sa da a mihiri taŋ ar zay ngi mizli. 13Bumbulvuŋ a ɓi: «Israyeley ya masa zliɗa taŋ hirnga na, a sa zumam di i ɗaf misi dili kanah a wuzla sukwi ngi mizli.» 14Yi mbiɗaŋ di: «Bumbulvuŋ, Buymisemuŋ! Yi ci ar dili ɗaˀ ta wãˀ. Zle ti ya misi ti zuŋ, hã a ndilo dana na, gwat misãmi mumuca ti muc malla gwat mija ti ji na, i zum ɗaˀ ta wãˀ, yo useˀ ngi zum ta kwana, a ci ɗaˀ a balam ɗu ta wãˀ si.» 15A ɓiy na: «Da kine na, i vuluw zokotof ngi sla ar deɗe ngi zay ngi mizli so: ɓa ki da ɗaf ɗik ara.» 16A ɓiy ma: «Ka mburu, ɗaf muwam taŋ vu a Zeruzalem na, i sa susuyumo taŋ avra. Peŋ ngi zum taŋ a sa waka ti wi ti kilo, ti zluwuŋ haɗa, yo yam ngi si taŋ, a sa waka ti wi, ti jijiki. 17Asi mike na, ɗaf ati yam ngi si a sa so anta mata, mizli a sa zluwunam ar wala taŋ kirkir, a sa hĩhĩyãm asi mungra taŋ.
Currently Selected:
EZEKIYEL 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.