EZEKIYEL 1

Bumbulvuŋ mibiga vu da Ezekiyel

1Ngi hin zlum, ngi kiya mumufaɗ naŋ, ngi vi mizli ngir makir naŋ na, naɓa ya Ezekiyele, i ro a mi mizaw Kebar, a wuzla mizli mijahay misi a ruwuy mulaka. Akẽh na, muŋ a wucuh wucah, i pur gwat ngi Buymisemuŋhoy ti kleŋ. 2Naɓa i vi muzlum naŋ, zle ti taŋ mijaka buy Zoˀakiŋ nga ruwuy mulak. 3Naŋ kine, ya Ezekiyel, mangal ngi masay, Buzi, ya a mi mizaw Kebar, angi hirwuy ngi Babiloŋhoy, Bumbulvuŋ a ɓiy ɓi naŋ le da ya. Gidaŋ ngi Bumbulvuŋ a so angi ya a diga. 4I ra pur hiri: keɗ na, burkataŋ ara so tir li vay muŋ, gazlavay misi vu njilim njilim hindiˀille aseˀeŋ, li ciɗak ciɗak, gun hirnga ngi gazlavay tuwa. Gwat kaɓa vu matiɓi a wuzla, jiriy jiriy kaɓa ɓiri mawucuɗu. 5Keɗ ma na, gwat kaɓa gwat misi titirihey mufaɗ a wuzla ma, a bam vu ati mizli titrahay. 6Purla gar na, mihiri ava mufaɗ waɗ kirpasl mufaɗa. 7Sar taŋhaya cir cir. Sar taŋ ngi ɗuv taˀ taˀ a ruwuyo, taŋ kaɓa sar ngi zuŋ sla, a wucuɗam kaɓa ɓiri gaza mukuleɗ kuleɗe. 8Haŋ ngi mbur asi kirpaslaya purla purla mufaɗ taŋ. Haŋ tayna, pulaˀ pulaˀ ngir tisi gazlavay mufaɗ taŋ, kaɓa mihiri taŋhay ati kirpasl taŋhay vuna ya. 9Mi ngi kirpasl taŋhay ada zliram ar wala taŋ. Gwat misi titiri gar aru cir a mbuŋ naŋ si, manja a mbiɗi neˀ le. 10Mihiri taŋhaya, a bam vu ati ngi mbur titra. Gwat mumufaɗ tayna, purla gar na, tir vay hazumo, i mihiri ngi mobor, tir vay gula, i mihiri ngi gusoŋ, yo mufaɗ taŋ, taŋ ti mihiri ngi mulu. 11Mihiri taŋhaya taŋ kanah. Amma kirpaslaya, avu gwat misi titiri gar na, mucuwoyo binjar binjar ng'a muŋ, mi taŋhaya zlar arleˀe, yo mucuw mekelemeye kwana, a sirtam di dumvu taŋ. 12Ko wa gar na, aru cir a mbuŋ naŋ. A ram ng'ar li taŋ mawuɗam, manja a mbuɗam neˀ le. 13Gwat misi titiri tayna a bam vu ati zayvu mihilɓiɓ, gwat kaɓa daliivuhoy, a laˀam kwiŋ ti ka kwiŋ ti ka, ar wala ngi gwat tayna. Vu nah a gi hiri dirzliw haɗa, waɗ vuŋ a wucuɗo ti wuzla vu vuna pilngiɗ pilngiɗ. 14Dar gwat misi titiri tuwa, a mbiɗam ti ka ti ka, kuɗiɗiɗi kuɗiɗiɗi kaɓa wucuɗ ngi vuŋ.

15I ra pura gwat misi titiri tayna cum cum, keɗ a ruwuy a ciki taŋ na, sar ngi mota, mihiri gar na, naŋ ti sar ngi mota purla purla. 16Sar ngi mota tayna, kpak taŋ ati ɗiy t'anihĩ: a wucuɗam kaɓa ɗugur mupuɗaw mazilaka krisolit. Taŋ mufaɗ taŋ a bam vu, yo ɗiy taŋ, kaɓa sar purla gar na, kulaˀ ar cala kulaˀ ar cala. 17Da taŋ mira ram na, a ram cir cir ngir tisi gazlavay mufaɗ taŋ si, anta mbuɗam pulaˀ le ta. 18Sar ngi mota tayna, ligidaˀ taŋ, a gi zluwun, yo taŋ mufaɗ taŋ, hiri avu taŋ gun zlar, gun zlar. 19Da gwat misi titiri tayna ara ram na, sar ngi motahay a ram murciki taŋ ya, yo da taŋ mira slikiɗam ti ruwuyo na, saray a slikiɗam aya. 20A ram ng'ar li taŋ muwuɗam le gar, angi pas ngi slikiɗ taŋ sar ngi motahaya kwana a slikiɗam misi purla ati taŋ. Asi mike na, sar ngi motahay a gam gar asi wuɗ ngi gwat misi titirihey. 21Ti taŋ mira ram, taŋ mira cicam, yo taŋ mira slikiɗam ngi ru le gar na, sar ngi motahay tuwa, a gam kanah ya, asi mike na, sar ngi motahay a gam gar asi wuɗ ngi gwat misi titirihey.

22Birngiŋ misi kaɓa viŋ sirit a hirnga gwat misi titiriheye, a wucuɗ wulik wulik kaɓa ɗugur ɗoro. 23Tisi birngiŋ misi kaɓa viŋ nah tuwa na, gwat misi titiriheye, mbur gar na, kirpaslay cuw binjar ng'avi cala binjar ng'avi cala, amma kirpasl mucuw mekelemeye sirit dumvu naŋ. 24Da taŋ mira ram na, i cine hurum ngi kirpasl taŋhaya. Hurum taŋ kaɓa hurum ngi mubuliy, kaɓa ˀay ngi misi gidaŋ wãˀ malla hurum ngi zigiduw mihaɗa ar vurum. Da taŋ ɓi micicam le na, a suroko kirpasl taŋhaya. 25Ar birngiŋ misi kaɓa viŋ, misirit a hirnga taŋ tuwa ma na, ˀay ara cino ngbiɗiɗiɗi. 26Yo ti hirnga birngiŋ misi a hirnga taŋ tuwa na, gwat kaɓa ɗugur mupuɗaw ngil ngil, a bam vu ati janga ngi buy. Ar sukwi ngi janga ngi buy tuwa, a hirnga naŋ wãˀ na, gwat kaɓa mbur deŋ. 27Akẽh na, gwat misi kaɓa mbur tuwa, i pura na, a wucuɗ pilngiɗ pilngiɗ kaɓa ɓiri mawucuɗu, gwat kaɓa vu a gunoŋ gunno. Zle avu li juwa gwat duba, hã nga muŋ, yo zle avu li juwa gwat duba, hã nga ruwuy na, i pur gwat kaɓa vu, njazl a gunoŋ gunno. 28Li minjahha mugun hirnga naŋ tuwa, a bam vu ati kwalay mogodonok mubo le a muŋ tapas vuŋ mawuɗ a gi. Nah na, i wucuɗ mabiga dudok ngi Bumbulvuŋ. Ya mupura keɗ na, i diɗ, huruk a ruwuy. Dar i cin mbur maɓiy.

Currently Selected:

EZEKIYEL 1: BEGDC

Highlight

Copy