TIMOTE MUDUMBUŊ NAŊ 5
5
Gwat mizlir ngi gi ngi mizli miteŋteŋhey
1Anja ki buca mbur midigila ti buc ta, amma vulaŋ gidaŋ kaɓa i bunuku. Gi ti mizli ziri ziri na, kaɓa i sukum ɗikey. 2Ngwas micawwahaya, gi taŋ kaɓa i mumuŋ ɗikey, yo ngwas misi i ziri ziri aruŋ kwana, gi taŋ kaɓa i sukum ɗik mongosohoy tewle, manja ki ci ar dili.
3Ɗuva hirnga da ngwas wudigahay mupula fuk fukoy na. 4Amma da ngwas wudiga naŋ da ti ziri naŋhay, malla dideˀ naŋhay na, anja sey ziri tayna, a sirkaka gi slra ngi Buymisemuŋ a hay taŋhaya. Yo a zlir le ɓa a wurkaka gwat miyi taŋhay ati dideˀ taŋhay migaka taŋ di zleˀe na ya. Gwat macira hiri da Buymisemuŋ gisiŋ gisiŋ, i nah. 5Ngwas wudiga migisiŋ gisiŋ pal naŋ na, miki slimiɗ anga anta na, a njih hiri le njah ar Buymisemuŋ, ara hurdum ti dira dibiɗ waɗ ti tumbulo Buymisemuŋ, duvuɗ ti papas gar, ɓa a jinaŋ. 6Amma wudiga mawuluk nga naŋ sey gwat maciraŋ hiri na, ko vur naŋ misi ti siifa tekeɗe kwana, kite a muc le si. 7Sey ki ɓa ɓi hana da ngwas wudigahay gar, ɓa mbur a lum ɓi avu taŋ ngi mbiɗa taŋ hirnga ta. 8Da mbur anta ki slimiɗ ar muy naŋhaya ta, wãˀ naŋ anta ki slimiɗ ar mizli ngi hay naŋhaya ta na, kite a pula tiɓi le, a gi gwat mukuy ta le wãˀ, fineˀ mbur mitiɓi ɗaˀ ta.
9Ɓa ki toho slimiɗ ngi ngwasa nga wuzla wudigahay na, sey da a ndila le vi kukur merkeɗ far, a sliˀi ɗaˀ ta, yo a ngilakaŋ ɗaˀ ta. 10Anja mizli a sinaka le, i ngwas magi slra mezle, a gila ziri naŋhaya le kuy kuy, a tiɓi mulakay le a hay naŋ, a bun sar ngi mitiɓihey le. Mizli muroko ar bonoyo, a jina taŋ le, a gi sukwi ngi gwat mezlehey le gar. 11Amma ngwas wudigahay misi i ziri ziri aruŋ na, anja ki toho slimiɗ taŋ ta. Asi da may zil ara ja taŋ na, a sa mbiɗam duba avu Kristu, hã a zuɓam zil ma. 12Joˀ Buymisemuŋ a sa ga taŋ kiita asi taŋ mingilaka ɓi taŋ majuwaka mudumbuŋ zleˀe na. 13Yo ma na, slra taŋ misi anta tuwa na, a sirkam liˀi caŋ caŋ, vur hay vur hay. I nah tew ta ma, a gam mi haɗa, a cikislam ɓi, yo a puwam ɓi lambaˀ lambaˀa ma. 14Yi wuɗ na, anja wudiga ziri ziri aruŋ na, a zuɓam ziley a muŋ, a yam ziri, a jaka hay taŋhaya, ɓa mizli maziram ti ndra ta na, a lumam ɓi ngi cikisl a hirnga ndra ta. 15Asi ngwas wudiga mekelemey ada, a zizam le, ara sipam Satan. 16Amma da ngwas mitiɓi, muy naŋ wudigahay ada na, sey a ki slimiɗ ar taŋ, anja a pula mazuɓaka gir taŋ, i Cikil ngi misikristuhoy ta, ɓa a ga taŋ kefek ngi ki slimiɗ ar wudiga migisiŋ gisiheye.
17Mizli micawwahay maram ti Cikil ngi misikristuhoyo kuy kuy na, a ndilaka le ɓa a lumam migire makaw cuw, wãˀ naŋ na, mizli masam bonoy ti tila mi ti ɓi ngi Buymisemuŋ ati ngi dubuna gwat da mizli. 18Naŋ kine, Ɓimutoho a ɓi na: «Anja ki ca taɓak a mi sla maɗug daw a milaŋ ta.»
Yo ma na: «Mbur migi slra, a ndila le ɓa a wurkakaŋ#5.18 Pura Sluf c 25.4 ati 1Kor 9.9; Mat 10.10; Lk 10.7..»
19Da mburo kupa ɓi le da mbur micawwa na, anja ki tiɓa ta, sey da sedewohoy ada cuw malla makir far.
20Mizli magam mungra na, anja ki mbiɗa taŋ hirnga a mihiri ngi mizli gar, ɓa mekelemey a zluwunam ngi gi nah. 21I ra tumbuluw a mbuŋ Buymisemuŋ, yo a mbuŋ Yesu Kristu, waɗ a mbuŋ modro ngi Bumbulvuŋhoy: sipa ɓi ngi kuti hana, ki wunka mizli pal pal ta, ki jina mbur mekeleme mbak numuŋ le ta.
22Angi Cikil ngi misikristuhoyo, ko ki wus vu ngi buca haŋ da mbur a hirnga ta. Ki ci ar mungra ngi mizli magaka na ta. Ka vuna, jigina hirnga ɗik avu ɓi ngi dili.
23Anja ki si yam tewle ta. Si mbaazla neˀ ɓa a vuluw kefek da kwacaya, asi jiji masupuw ndrehhe na.
24Mungra ngi mizli mekelemeye, ko a gaka taŋ kiita t'aruŋ kwana, naŋ njak ar li babara si. Amma ngi mizli numuŋhoyo, a sa njikam ti naˀnaˀ aruŋ. 25Naŋ kanah ya, slra mezleheye, taŋ njak njak a mihiri ngi mizli. Ko da mekelemey anta njikam ta tekeɗe kwana, a ɗumom ta.
Currently Selected:
TIMOTE MUDUMBUŊ NAŊ 5: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.