San Mateo 26

Néna engaksï Jesusini jupikani uékempka

(Mc 14.1-2; Lc 22.1-2; Jn 11.45-53)

1Enga Jesusi k'amarapka íni ambe uandani, jurhengorherichani arhiaspti: 2“Eskajtsï na mítetini jakaia, tsimani jurhiatekua jimbo Páskueri k'uínchenhaati ka Acheti Uájpanksï jupikaati ka krúsirhuksï cháparhataati.”

3Ka tátecheri urhejtsïkuricha ka juramukua jurhentpirichaksï ka achamasï iretarhu anapuechaksï, Kaifasioksï tángorhentaspti enga táta k'éripka, 4ka eratsekuntasptiksï ka sésiksï úskuspti néna engaksï Jesusini jupikapiringa ka uándikunksï. 5Ka arhijperasptiksï: “K'uínchekuarhu nómbe, jimboka iretarhu méntku ísï jánhaaka.”

Uarhiti ma Jesusini p'untsumekua atarhesti

(Mc 14.3-9; Jn 12.1-8)

6Enga Jesusi Betania jápka, Simonio engaksï xúta jukarhekorheti arhimpka, 7uarhiti ma andarheraspti tsúntsu ma jinguni p'untsumekua ambakiti jatsiratini, ka Jesusini atajtsïkuspti, enga Jesusi t'ireni jápka uaxakatini. 8Íni ambeksï exerini, jurhengorherichaksï ikiaspti ka uandasptiksï: “¿Andisï ísï ambendarhenha? 9Inde úpirindi jukaparhakua jimbo antaranhantani ka tuminani kómu jándichani íntsaani.” 10Enga Jesusi kurhajchaapka, arhiaspti: “¿Andijtsïsï íni uarhitini xáni ambe arhiparhatani jaki? Inderini kánekua sési ambesï úcheti. 11Kómu jándichantsï méntku xéani jauaka, ka ji k'óruni no méntkisï chánksïni jinguni jauaka, 12inderini p'untsumekua atarhentaxati jimbokani ji jatsinhantaakia. 13Sési jimboksïni arhixaka eska náni uéjki ma parhakpeni enga i jimbanhe aiangperata arhijtsïkperanhaaka, i úkua uandanhantaati ka inde uarhiti míanhantaati.”

Júdasï Jesusini intsïnharhitpesti

(Mc 14.10-11; Lc 22.3-6)

14Ma enga témbeni tsimani jurhengorhericha jingunipka, enga Júdasï Iskariote arhinhempka, niraspti tátecheri urhejtsïkurichani uandaxekuani, 15ka arhiaspti: “¿Ambejtsïni íntskua, ka jíksïni Jesusini intsïnharhitaaka?” Ka imaksï ma ekuatse témbeni taiakata íntskuspti. 16Ka Júdasï jiáni uératini jirinhakuntaxapti na enga jatini sési japiringa Jesusini intsïnharhitaani.

Chúrekua anapu Acheri t'irekua

(Mc 14.12-25; Lc 22.7-23; Jn 13.21-30; 1~Co 11.23-26)

17Imani jurhiatekua jimbo enga k'urhinda no xarhipiti jukariri k'uínchekua uénakorhejka, jurhengorherichaksï Jesusini andarheraspti ka arhistiksï: “¿Naniri uékasïnki eskachi Páskueri t'irekua úntaaka?” 18Ka ima uandaspti: “Ni je iretarhu, ka achetintsï ma arhiaka, eska jurhentpiri uandaxaka eska jurhiatekua niáranchaskia; ka eska Páskua jimbo jurhengorhericha jinguni chénio nitamakorheaka.” 19Ka jurhengorherichaksï úspti ísï eska Jesusi na juramukuapka, ka jimaksï péraspti enga Páskueri anhapiringa.

20Chúrekua, Jesusi témbeni tsimani jurhengorherichani jinguni uaxakaspti t'ireni. 21Ka engaksï t'ireni jápka arhiaspti: “Sési jimboksïni arhisïnga eskarini cha ma ísï intsïnharhitpeaka.” 22Ka jurhengorherichaksï kánekua kómu p'ikuarheraspti ka mándanksï uénaspti kurhamarheni: “¿Tata, ji?” 23Ka ima arhiantaspti: “Ima enga jíndeni jinguni urhanirhu atarhutani jaka, imarinisï intsïnharhitpeati. 24Sési jimbo Acheti Uájpa níntaati, ísï eskamendu imeri ambe na karakata jaka, k'óru ¡Áke ima enga Acheti Uájpani intsïnharhitpeaka! ¡Sánderu sésipirindi eska no andajpenupiringa!” 25Ka Júdasï, ima enga intsïnharhitpepiringa arhispti: “¿Jurhentpiri jíxamueua?” Ka Jesusi arhispti: “T'úri ísï uandaska.” 26Ka engaksï t'ireni jápka, Jesusi p'íkuspti kurhindani ka újchakuraspti ka jurhengorheri jémbechani arhustakuaspti arhiaparini: “Jupika je ka a je, i jucheti k'uiripekuesti.” 27Ka itsïmatarakua p'íkutini, diósïmaimukua arhispti ka íntsaaspti arhiaparini: “Iámenduecha marhuata je, 28jimboka i jucheti iurhiriska, jimbanhe pakatperakueri enga uánekuechani jimbo tsîncheaka k'amanharhintskua p'uantsperantskua jimbo. 29Sési jimboksïni arhixaka eska íni jásï úbasïri itsïrhukuani nóteruni auaka, ima jurhia jamberi engani na ménderu cha jinguni, kauikua jimbanhe auaka jucheti Tateri irechekuarhu.” 30Engaksï na k'amarapka Diósïri pirekuechani pireani, Olibusï juátarhuksï niraspti. 31Ka Jesusi jima arhiaspti: “Iámenduechajtsïni nóteru mintsikaaka, nóchka karakata jarhaski andi:

‘Karichi erangutini uándikuaka

ka karichichaksï etsajkamaati.’

32Ka tsíntatini, Galileaksïni urhechepaaka.” 33Ka Pédru arhispti: “Náuejkiksïni iámenduecha jurajkuni, jíkini nómeni jurajkuaka.” 34Ka Jesusi arhispti: “Sési jimbokini arhixaka eska iásï chúrekua, enga t'arhechu nótki uerani jauaka, tanimu xanharirini no míteni uadaakia.” 35Ka Pédru arhispti: “Nómenikini no míteni uandaaka, nájtukani t'úngeni jinguni uarhiaka” ka máteru jurhengorherichaksï májkueni arhisïrempti.

36Xásïksï Jesusi Getsemani niáraspti ka jima arhiaspti: “Ixu uaxaka je, engani jamberi ji niraska kómarhani.” 37Ka Pédruni ka Sebedeo uájpechantku pájtaaspti, ka kánekuamendu uénaspti kómu p'ikuarherani. 38Ka Jesusi arhiaspti: “Kánekua kómu p'ikuarhenhexaka, enajkirini uarhikua niárancheia; pámbejtsïni je ka ásï k'ui je.” 39Sántku xanharatini, tinguixurhispti tsérhukuani andaskueraspti ka kómarhaspti uandaparini: “Jucheti Táte, engari ambe újka, kénditacherini íni nósesi jámarhani; k'óru ásï ima úkorhe enga ji uéjka, úkorhe eskari t'u na uéjka.” 40Imeri jurhengorherichani andarhentaaspti ka imaksï kuíxapti ka Pédruni arhispti: “¿Andi nómendujtsïni úski sóndi jukambetani? 41Tsínharhitini ja je ka kómarhini ja je, ásïksïni nósesi jásï ande. Sési jimbo espiritu uékaxati, k'órujtsï cha no úsïnga p'íngukorheni.” 42Ménderu uéntaspti nirani kómarhani uandaparini: “Jucheti Táte, engari íni jásï ambe no újka kénditani, úkorhe eskamenduri t'u na uéjka.” 43Ka k'uanhatsentaspti ka jurhengorherichaksï k'uíxaptiteru, jimbokaksï uarhisïrempka k'uínhchani. 44Ka jima jurajkuaspti ka tanimu xanhari uéntaspti kómarhani. 45Ka xásï jurhengorherichani andarhentaaspti ka arhiaspti: “¿Andi k'uíxakiterujtsï, ka mintsikorheni jarhani? Iásïstia enga Acheti Uájpa k'amanharhintatichani intsïnharhitanhaaka. 46¡Jauara je, júia je! Exe je, janoxatiia ima engarini intsïnharhitpeaka.”

Jesusi jupinhasti

(Mc 14.43-50; Lc 22.47-53; Jn 18.2-11)

47Jesusi uandaxaptiteru enga Júdasï niárapka, ima enga témbeni tsimani jurhengorhericha jingunipka, ka uánekuechaksï ima jinguni jámaxapti, chkári ka atajpetarakuechanksï jupikatini, engaksï tátecheri urhejtsïkuricha ka achamasï iretarhu anapuecha axaapka. 48Ka Júdasï t'úini arhiarixaptia: “Néni engani ji putinharhikuaka, imesti, jupika je.” 49Ka Júdasï Jesusini andarheraspti ka arhini: “¡Jurhentpiri!” Ka mátirku putinharhikuspti. 50Ka Jesusi arhispti: “Pámpiri, ¿Amberisï úni juki?” Ka máruksï andarheraspti ka Jesusinksï jupikaspti. 51Ka ma enga Jesusi jinguni jámani jápka, atajpetarakua p'íjparhaspti, ka k'éri táteri jántspirini ma kachujpandikuspti. 52Ka Jesusi arhispti: “Inchaarhakorhentsï atajpetarakuani, jimbokaksï iámendu ima engaksï atajpetarakua úrajka, indeni jimboksï uarhiati. 53¿Andi nójtsï sáni eranhaskasïnki eskani ji úaka jucheti Táteni kómarhini? Ka ¿Andi imarini no ua témbeni tsimani míli ánjelichani axacheani? 54¿Ka néna úkorhea enga karakata arhijka eska k'uanisïnga ísï úkorheni?” 55Jima Jesusi arhijpespti: “¿Andijtsïnisï chkári ka atajpetarakuechani jinguni juki jupikani, enajkini ji sïpajkurha ambe? Mándani pauani jarhaska tiósïo jurhentpeni ka nójtsïni méni jupikaska. 56K'óru i ambe úkorhexati jimboka jatsiska ísï úkorheni, eskaksï Diósïri uandaricha na karaka.”

Jesusi k'éri tángorhekuarhu pánhasti

(Mc 14.53-65; Lc 22.54-55,63-71; Jn 18.12-14,19-24)

57Ima engaksï Jesusini jupikapka, k'éri táta Kaifasinksï pákuspti, ka jimaksï tángorhentatixapti juramukua jurhentpiricha ka iretarhu anapu achamasïchajtu. 58Ka Pédru k'éri táto ekuarhu jamberi chúxapaspti. Inchaspti ka p'urhejkutichani jinguni uaxakaspti exeni ambe enga xáni úkorhepiringateru.

59K'éri tátecha ka k'éri tángorhentskua, nónaksï Jesusini uarhikua k'amanharhitantani, chkuádirechanksï máru jirinhaaspti eskaksï chkuándirakua ambe arhiparhatapiringa, 60ka nómbemaksï exekuntasïrempti, nájkikuraksï uánekua mámaru ambe arhiparhatani jarhempka eska ísïspka, ka tsimanderkuksï niáraspti, 61ka uandasptiksï: “Inde uandasti: ‘Ji úaka Acha Diósïri k'umanchekuani xerentani ka tanimu jurhiatekua jimbojku máteru úntani.’ ” 62K'éri táta jauajpatsespti ka kurhamarhespti: “¿Nóri mókukurhea? ¿Ambeksïnisï xáni arhiparhatani jáki?” 63Ka Jesusi no kurhakorhespti. Ka k'éri táta arhispti: “¿Diósïni jimbojtsïni arhi, t'úsï Krístue, t'úsï Diósï Uájpe?” 64Ka Jesusi arhispti: “T'úri uandaska. Ka ístuksïni arhixaka, eskajtsï iásï uératini exeaka Acheti Uájpani Diósïri uinhapekuarhu jurhijkani uaxakatini jarhani, ka auandarhu anapu xúmurhu ísï jurhani jarhani.” 65Ka k'éri táta xukuparhakuani karunhentaspti ka ikiatintku uandaspti: “¡Diósïni útakusti! ¿Ambeteruksï úni xánderu ambe arhiparhatani jaua? Kurhajchakorheskajtsïa 66¿Nájtsï exesïnki?” Ka imaksï arhispti: “¡Uandikukuesti!” Arhisïremptiksï.

67Ka t'uánharhikuspti ka ch'atarhuskanksï ka máteruksï páksandikuspti, 68arhiparinksï: “¿Krístu, arhijtsïni nékinisï ata?”

Pédru Jesusini no míteni uandasïndi

(Mc 14.66-72; Lc 22.56-62; Jn 18.15-18,25-27)

69Enga Pédru ekuarhu uaxanupka, uarhiti jántspiri ma andarheraspti ka arhini: T'újturi Jesusi, Galilea anapu jinguni jámaxapka. 70Ka ima iámenduecha japarini no jiókorhesïrempti uandaparini: “No míteska ambe engarini arhini jaka.” 71Uéntatini, máteru exespti ka arhiaspti imechani engaksï jima jápka: “Indejtu Jesusi, Nasareti anapu jinguni jarhaspti.” 72Ka ménderu Pédru no jiókorhesïrempti Diósïni ónharhiparini: “¡Ji indeni no míteska!” 73Ísï tátsekua andarherasptiksï máru engaksï jima jámani jápka, ka Pédrunksï arhispti: “Sési jimbo t'újturi imecha jinguniska, míchakukorheskari.” 74Jimakani Pédru uénaspti útantani ka Diósïni ónharhiparini uandani: “¡Ji indeni achetini no míteska!” Ka t'arhechu jimajku ueraspti.

75Ka Pédru míjpaaspti enga Jesusi arhipka: “T'arhechu nótki jamberi uerani jauati, ka t'úrini tanimu xanhari no míteni uandaakia”. Ka Pédru uéntatini, jurajkutakorhentaspti uerani.

Currently Selected:

San Mateo 26: DKPJ

Highlight

Copy