San Mateo 17

Jesusi ménderueni jáxentasti

(Mc 9.2-13; Lc 9.28-36)

1Kuímu jurhiatekua jimbo, Jesusi juátarhu ma niraspti ka Pédruni ka Santiaguni ka erachi jémba Juánuni pájtaaspti. 2Ka jima imechani japarini ménderueni jáxentaspti, tata jurhiateni mereanharhintaspti, ka xukuparhakua t'íntskueni t'uput'upuxentaspti. 3Ka Moisesinksï ka Eliasïnksï exespti, engaksï Jesusini jinguni uandontskorheni jápka. 4Ka Pédru Jesusini arhispti: “Tata xáni engaksï sési jaka ixu, engari uéjka tanimu uapajtsïtakuechanchi úauaka, ma chétiuati ka máteru Moisesiri ka máteru Eliasïri.” 5Enga Pédru uandani jápkateru, janikua meremeresï ma andajtsïkueraspti ka janikuarhu uandakua ma kurhaakorhespti uandani jarhani: “I jindesti jucheti Uátsïti enga ji xáni uéjka, kurhajcha je.”

6Jesusiri jurhengorherichaksï íni ambe kurharini, kókuatsespti jimbokaksï kánekua chérakorhespka. 7Ka Jesusi andarheraaspti ka p'árheaparini arhiasti: “Jauara je, ásï jáma je chéni.” 8Engaksï jurhengorhericha eraapka, Jesusiniterkuksï exesptia.

9Ka engaksï juátarhu uératini kétsemantani jápka, Jesusi arhiaspti: “Ambe engajtsï exeka, ásï nemani aianguntsï je enga Acheti Uájpa nótki tsíntani jauaka.” 10Ka jurhengorherichaksï Jesusini kurhamarhespti: “¿Andiksïsï juramukua jurhentpiricha uandajki eska Eliasï urheta juuaka?” 11Ka Jesusi arhiantaaspti: “Ísïsti eska Eliasï urheta juuaka, ka eska ima iámendu ambe sési péntaaka. 12Ka jíksïni arhixaka eska Eliasï jurhaskia, ka nóksï mítentasti. Kántastiksï eskamenduksï na uékaka kántani. Májkuenksï Acheti Uájpani nósesi kántaati.”

13Ka jurhengorherichaksï jánhaskaspti eska Jesusi Juánu itsï atajtsïkpiririsï ambe arhiani jápka.

Jesusi tumbini ma nóambakitini petarhetantasti

(Mc 9.14-29; Lc 9.37-43)

14Engaksï k'uiripuni andarhentapka, acheti ma Jesusini andarheraspti ka tinguixurhikutini arhispti: 15“Tata, p'amojku jucheti uátsïtini, p'íntani jámsïndi, ka kánekua nósesi jarhasïndi, enga p'íntka chpírirhu uékajpesïndi o itsïrhu uékamesïndi. 16Chéti jurhengorherichani juákuaska ka nóksï ústi ambakerantani.” 17Ka Jesusi uandaspti: “¡Xáni enga no mintsikanhajka ka no kurhangunhani! ¿Andi na jatini jamberi chánksïni jinguni jauateru? ¿Na xánteruksïni tekaantaa? Axuentsï juáche je tumbini.” 18Jesusi xukaspti nóambakitini, ka nóambakiti tumbini uérhentaspti ka tumbi jimajku ambakentaspti.

19Ka jurhengorherichaksï Jesusini támu páspti ka sïpatekuarhkuksï kurhamarhespti: “¿Andisïni jucha no u petarhetantani?” 20Ka Jesusi arhiaspti: “Jimbokajtsï Diósïni no kánekua mintsikasïnga. Sési jimboksïni arhixaka, eskajtsï xántku mintsikapiringa eska mostaseri tskípu nájku k'énharhijka, andeni juátantsï arhipiringa: ‘Jiniani ni’ ka juáta mótseati, ka nómbe ma jauati engajtsï no úaka úni. 21[Íni jásï nósesi járhatichaksï kómakua ka karhinda japarintkusï petarhetpenhantajti.]”

Jesusi ménderu uandanukukorhentasti

(Mc 9.30-32; Lc 9.43-45)

22Engaksï Galilea jámani jápka, Jesusi arhiaspti: “Acheti Uájpanksï intsïnharhitpeati, 23ka uándikuatiksï, k'óru taminu jurhiatekua jimbo tsíntaati.” Jurhengorherichaksï ísï kurharini kánekua kómu p'ikuarheraspti.

Tiósïo anapu maiampekua

24Engaksï Jesusi ka imeri jurhengorhericha Kafarnaumi niárapka, Pédrunksï andarheraspti tiósïo anapu tumina tánantsticha ka kurhamarhesptiksï: “¿Chéti jurhentpiri tumina tiósïo úrakua íntspesïnki?” 25Ka Pédru: “Jo” Arhiaspti.

Engaksï k'umanchekuarhu inchantapka, Jesusi Pédruni uandajpaspti ka arhispti: “¿Nári eranguntasïnki? Parhakpeni anapu irechechaksï, ¿Néchani maiamperataraasïnki? ¿Imeri irechekuarhu anapuechani o uérakua anapuechani?” 26Ka Pédru arhispti: “Uérakua anapuechani.” Ka Jesusi arhispti: “Jiájkanksï irechekuarhu anapuecha nómbema íntspeati. 27Nóchi ikiatauaka, japundarhu ni ka kurucha p'ímatarakuani k'uanima ka p'ímaakari kuruchani ma, arhachaku ka taiakatari exentaaka. P'íchakuntsï ka imani jimborini maiampeche ka t'újtu maiampekorhe.”

Currently Selected:

San Mateo 17: DKPJ

Highlight

Copy