San Lucas 17
17
Kamanharhintskua tandojchpesïndi
(Mt 18.6-7,21-22; Mc 9.42)
1Jesusi imeri jurhengorherichani arhiaspti: “No úati nósesi jásï ambe no jurhani, k'óru ¡Che ima enga ísï niátatarpejka! 2Sánderu sésipirindi eska tsakapu urhuratarakua ma jójchakunhapiringa ka k'éri japundarhu k'uanimanhani, eska íni ma isï sapini nósesi niátatarani. 3¡Xéparini je!”
“Eka chéti erachi k'amanharhintaska, xuka; ka enga imeri jángua mójtakuska, púakuntsï. 4Na uéjkikini ma jurhiatekua jimbojku iúmu tsimani xanhari nósesi ambe úcheni, ka iúmu tsimani xanharikini jurhani arhini: ‘Nóteruni ísï jámaakia; púakuntaakari.’ ”
Jakajkukua uinhapesti
5Uandakua párichaksï Achani arhispti:
–Sánderujtsïni jakajkutara.
6Acha arhiaspti:
–Mostaseri tskípuentku engajtsï úpiringa jakajkuni, úpiringajtsï p'ukurini ma arhini: Uétsentsï ka k'éri japundarhu mótse arhini, ka p'ukuriksïni kurhajchapirindi.
Jántspiriri úkua
7“Enga chári jántspirini ma, juátarhu junguarinia ka tarherinia ka karichichani ónhantaatinia, ¿Andi arhisïnijtsï incharantani sáni imani urheta t'irerani? 8Nómbe chájtsï arhisïnga: ‘Mórhekorhentsï kókuani ka jupajku ka úmachentsïrini, ka jatsiracherini ka itsïjturini jatsirache. Ka tátsekuari úakia t'u arhani.’ 9Ka nójtujtsï diósïmaiamukua arhintasïnga enga sési úka eskajtsï na juramukupka. 10Chájtujtsï ísï, engajtsï na iámu ambe úakia engaksïni Diósï úraka, uandaakajtsï: ‘Jántspiri nómbemarueskachi, jimbokachi imantkusï úka engachi úranhapka.’ ”
Jesusi témbeni xúta jukarichani ambakerantaasti
11Jerusaleni níntani jámani, Jesusi Samaria ka Galilea ísï parhiakuntaspti.
12Ka ireta sapichurhu ma niáraspti, ka jimaksï témbeni acheti xúta jukaricha uéakuspti kúmani, iauani jatinksï 13uinhachaparini arhispti:
–¡Jesusi, Jurhentpiri, p'amojkujtsïni!
14Enga Jesusi exeapka, arhiaspti:
–Tátechani jinguni ni je.
Tátecha jinguni nirani jámanksï ambakentaspti. 15Ka ima ma ísï enga exekorhepka eska ambakentaspka, k'uanhatsentaspti uinhachaparini Diósïni k'éri ambe arhiparini, 16ka Jesusini tinguixurhikuspti, kápatsentaspti diósïmaiamu arhintani. Ima acheti Samaria anapuespti. 17Jesusi uandaspti:
–¿Andi nóksï témbenispki engaksï ambakentaka? ¿Máteru iúmu t'ámuksï na úskia? 18¿Andisï uérakua iretijku k'uanhatsentsï Diósïni k'éri ambe arhini?
19Ka achetini arhispti:
–Jauara ka ni níntani chéti jakajkukuakini ambakerantasti.
Néna jánhaskorheski Diósïri irechekuarhu
(Mt 24.23-28,36-41)
20Fariseouechaksï Jesusini kurhamarhespti Diósïri irechekua na jatini janopirini, ka ima arhiaspti:
–Nónema mítetini jauati enga Diósïri irechekua janoaka. 21Nónema úati uandani: Ixu jarhasti o jimini jarhasti; jimboka Diósïri irechekua chánksïni jinguni jarhaska.
22Ka imeri jurhengorherichani arhiaspti:
–Niáraatiksï jurhiatecha engajtsï náuejki ma jurhiatekuajku acheti Uájpani uékaaka exeni, ka nójtsï exeaka. 23Máruksï uandaati: Ixu jarhasti, o jimini jarhasti; kóru ásï ni je, ka ásïjtu chúxapaa je. 24Jimboka jimajkani enga acheti Uájpa junguaaka, piritakueni junguaati, enga iámu t'íkjaxejka, 25k'óru acheti Uájpa urheta jatsisti nósesi ambe úkorhenchani ka eskaksï urheta íni jurhiatekua anapuecha no xénhchani kámaaka. 26Ísï eska na úkorhepka jimajkani enga Noe irekani jápka, májkuentu úkorheati enga acheti Uájpa junguaaka. 27Jukari t'irenhasïrempti, ka kauinhani ka tembuchanhani jiájkani jamberi enga Noe k'éri icharhutarhu jatapka, enga iurhentpepka ka iámu uarhimenhani. 28Májkueni úkorhespti jiájkani ísï enga Lóti irekapka: Jukari t'irenhasïrempti ka kauinhani, ka ambe ataranhantani ka ambe piánhani ka tarhenhani ka k'umanchekuecha únhani; 29ka enga Lóti Sodoma uéakupka, auandarhu uératini chpíri uekorhespti janhajanhajkuparini ka iámu uarhinhaspti. 30Ísï úkorheati enga acheti Uájpa xarharaaka.
31“Ima jurhiatekua, ne enga taiajtsïtakatarhu jámani jauaka ka imeri kángorhekua ambe k'umanchekuarhu incharini jatsini, ásï kétse ambe petakorheni; ka ásï nínte chénjembo ne enga juátarhu jámani jarhajka. 32Míantsï je Lótiri uarhitini.#17.32 Gn 19.26, No jámani k'uanhatsentani (v. 31). 33Ne enga jángorhentaska tsípekuani patsakorheni, sánderu sóntku tsîtaati, k'óru íoni sési jauati ne enga tsípekuani tsîtaaka. 34Aianguxakaksïni eska imani chúrekua, náuejki márku k'uínhani jarhani ma pánhantaati ka ma jurajkunhaati. 35Ka engaksï nanachicha márku urhuni jauaka, ma pánhantaati ka ma jurajkunhaati.”#17.35 Máruksï bersikulu 36 arisï kúndasïndi: Enga juátarhu tsimani jánhani janhaaka, ma pánhantaati ka ma pakatanhaati.
37Jimajkanksï kurhamarhespti:
–¿Acha, nani ísï úkorhea?
Ka ima arhiaspti:
–Náni enga uarhiri jándentaaka k'uákichaksï jima tángorheati.
Currently Selected:
San Lucas 17: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
