Hebreos 6
6
1Ísï jimbo, ásteru jimajku k'uanhatsentani ja je enga Krístueri jurhengua uénatarakueka, ka ju je míakua jukarinia. Ka nóchi k'amanharhitskua jurajkukueri ambejku jurhentperani jarhani, ka Diósïni mintsikakueri ambejku, 2ka itsï atajtsïkueri ambejku, ka p'ájtsïkperakueri ambejku, ka uarhiricheri tsíntskueri ambejku ka jurhiata arhinharhikperakueri ambejku méntku úndani jurhentperani. 3Ísïchisï jámaakia engajtsïni jámberi Diósï tsípekua kuanetaaka.
4Jimbokaksï no úsïnga ima engaksï tsántsïmapkia, ima engaksï ts'émupkia néneski auandarhu anapu ambe ka engaksï Espiritu Sántuni p'itipkia.
5Ima engaksï Diósïri jimbanhe uandantskuani mítepkia, ka engaksï mítepkia juramukuani enga jurhani jaka, 6ka náuejkiksï jurhedipkia, ka útasïksï nósesi úkua ambe andarherani jarhani, imaksï nóteru úati Diósïni jinguni k'uanhatsentani, jimbokaksï ima ménderu uéntasïnga Diósï Uájpani krúsirhu cháparhatani ka indeni úni jámanksï ménderu uéntasïndi xérpeni enga ima teresmarhunhapka. 7Jimboka ixu echerirhu, enga méntku janini jarhajka ka ambakiti ambe jukani, eskaksï p'ikuntaaka ima engaksï jatsiataka, imani echerini Diósï újchakurasïndi. 8Ka jima ménderueni, enga ma ísï echeri tsurhumu ka akarheni ambejku jukajka, ima jurarkunhasïndi, ka ikimperata axuterku jakustia, ka k'amarhuni jámani kurhinhantaati. 9Enga úka, xénhchakatecha, náuejkiksïni xáni arhikia, jucha sánderu sési ambesïni erokorheni jaka ka imani ambe engaksïni p'ímutantaaka. 10Jimboka Diósï sési maiampentasïnga ka no mirikurhiati eska cha xáni ambe imeri jakangurhikuani jinguni xarhatakia, ka engajtsï xáni chéni anapuechani jarhuataaka. 11Uékaxakachi k'óru, eskajtsï táchani xarhatani jauaka xásï jarhojperata uarhikuarhu jamberi, eskaksïni ísï jámani sési janocheaka ima engajtsï mintsikani jaka, 12eskajtsï ísï jámani no xépiti úkorheaka, sánderu sáni ísï jáma je eskaksï ima engaksï aiatsperakuani jurajkumenhajka, jimbokaksï jakajkusïnga ka jimbokaksï nómeni jurarkusïnga jakajkuni jarhani.
13Jiájkani enga Diósï Abranini aiakupka, jandiójku tsïrimeraspti, jimboka Diósïni jinguni nóteru nema sánderu k'ériska 14ka arisï uandaspti: “Jo, jíkini kánekua kóndeaka ka káneracheakakini sïrukua.”#6.14 Gn 22.16-17. 15Abrani, ísï tekantatini, íntsïnhaspti enga aiamenhapka. 16Ka parhakpeni anapuechaksï, sánderu k'éri nemeri jakangurhikua jimbo uinhajtsïtasïndi, ka imani uandakua jimbo, ambe uéjki arhirperata sési péntasïndi. 17Májkueni, Diósï uékaparini sési iámu exeraani imechani engaksï intsïnhaaka, imani engaksï aiamenhatini jatsimenhaka, 18eska ísï jámani úkorheaka tsimani ambe enga jatsika eska ísïuaka, enga Diósï no úaka chkuándirani, ka eskachi jucha engachi mintsikani jaka sánderu uinhamu tsípeni jauaka mintsikaparini. 19Imani engajtsïni juchari álmani uinhamu p'íngucheni jaka ka enga auandarhu anapu sánderu pímbinhandekuarhu iauani jamberi inchajka, 20jima enga urheta Jesusi inchaka juchantsïni urhechepani, májkueni eska Melkisedeki, enga méntkisï táta k'érika.
Currently Selected:
Hebreos 6: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.