Saxaria 14
14
Jerusalems tsî ǁaedi
1Mû ǃKhūb di tsēs, ǁîs ais sa ǁkhâuǁnâsa sa ǁaegu nî ǀgoraǂuihes ge nî hā. 2Hoa ǁaede ta ge Jerusalems ǁga ǃkhams ǃaroma nî ǀhaoǀhao. Tsîs ge ǃāsa ūhe, omde ǃnariǂuiǃnâhe, tarekhoede ǀgaiǃkhōhe tsî ǃkhare ǃâb ǃās diba ǃkhōsis ǃnâ nî ǃgû-ūhe xawe ǃgau ra ǃâb ǁaes dib ge ǃāsa xu ǃgaoǁnâhe tide. 3Tsîb ge ǃKhūba ǃgûǂoa tsî ǁnā ǁaedi ǃoagu sī nî ǃkham, torob di tsēdi ǃnâb gere ǃkham khami. 4ǂAira âb ge ǁnātsē ǀKheraǃhommi, Jerusalems di aiǂoasǀkhāb ai hâb ai nî mâ, tsîb ge ǃhomma ǁaegub ǃnâ, aiǂoasa xu huriǂoas ǁga, kai ǃgoaǃnāb ase nî ǂkhapeǃāhe, tsîb ge ǃkhare ǃâb ǃhommi diba ǀapas ǀkhābǀî tsî nau ǃkhare ǃâba ǃkhawagas ǀkhābǀî nî ǂgō. 5O du ge ti ǃhomgu ǃnâ-u nî ǃkhoeni, ǃhomgu di ǃgoaǃnāb ra Asals kōse sī xui-ao. Tsî du ge ǃhūǂgubiba xu du gere Usiab, Judab gao-aob ǁaeb ǃnâ ǃkhoeni khami nî ǃkhoeni. Ob ge ǃKhūb ti Eloba nî hā, tsî ǃanun hoana ǁîb ǀkha.
6ǁNā tsēs ai i ge ǃnâ-i, ǃkhai-i tamas ka io ǃkhoa-e hâ tide, 7tsî ǁkhāti ǃkhaena-i xare-i tsîna. ǃKhae tsuxub ǃnâs tsînab ge tsēs ǃnâba hâ; ǁnās ge ǃKhūb tawa a ǂansa.
8ǁNā tsēs ais ge ûitsama ǁgamgu Jerusalemsa xu nî dâuǂoasa, ǃkhare ǃâba aiǂoas Mediteraneaǁîhurib ǁga tsî nau ǃkhare ǃâba huriǂoas hurib ǁga, ǁkhunaǁaeb ǃnâ tsî saob ǃnâ nî hâse. 9Ob ge ǃKhūba nî hoaraga ǃhūbaib di gao-ao kai. ǁNā tsēs aib ge ǃKhūba nî ǀgui tsîs ge ǀons âba nî ǀgui.
10Hoaraga ǃhūb ge Arabab khami Gebasa xu Rimons, Jerusalems ǃkhawagas dis kōse nî ǀkhara, tsî Jerusalems ge ǁîs ǂnamipe hâ ǃhūb ǂamai ǀgapiǀgapikhâihe tsî ǁîs di ǃkhais ai nî mâhâhâ, Benjaminni ǂgâ-amsa xu ǂguro ǂgâ-ams kōse, ǁHôaǂgâ-ams kōse tsî Hananeli di ǂGō-ommi kōse tsî gao-aob di ǀāǃnâǃkhaib kōse. 11Tsîn ge ǁîs ǃnâ nî ǁan, tsî-i ge hîkākā-i xare-e hâ tide tsîs ge Jerusalemsa ǁkhawa nî ǃnorasa.
12 ǃKhūb ge nē tsûtsû-ais ǀkha hoaraga ǁaedi Jerusalems ǃoagu ge ǃkhamde nî ǂnau. ǁÎn sorodeb ge noxopan ǂaira ai mâ hîa ǀō kai, mûra āra ǃnâ ra hâse ǀō kai tsî namma amǃnâs ǃnâ nî ǀō kai.
13ǁNā tsēs aib ge ǃKhūba ǂâidi âna nî ǀgaruǀgaru, mâ-i hoa-i ǁî-i ǀgūse hâ-e mâba ǃkhō tsî nî ǁnāǂams kōse. 14Judab on ge ǁnān Jerusalems ǃnâ hân ǃoagu nî ǃkham. Tsîb ge ǃkhūsib hoaraga ǁaedi diba nî ǀhaoǀhaohe, ǃhuniǀurib, ǀhaiǀurib, saran tsî ǁkhāsiba ūhâ xūn hoan diba.
15ǁKhā tsûtsû-ais, nēs khami īs ge hān, mulin, ǃnain, dâukin tsî hoaraga ǀgoan khākhoeb ǁîn ǀgūse hâna nî ǂnau.
16On ge hoaragan ǁaede xu ge ûiǃgaun, Jerusalems ǃoagu ge khâina kuriba xu kurib ǁga Gao-aob, ǃKhūb Hoaǀgaixaba nî sī ǀgoreǀîse tsî ǁHaodi ǁÂudība ǃkhōǀgaras ǃaroma nî ǃgûǃapa. 17Tsî i ge nî ī, mâ ǃhaos ǃhūbaib dis hoas ga Gao-aob, ǃKhūb Hoaǀgaixaba nî sī ǃoabase Jerusalems ǃoa ǃapa tama i, ob ge ǀnanuba ǁîn ai ǀapi tide. 18Egipteǁîn ga ǁHaodi ǁÂudība tsēdīsa ǂkhā, on ge ǁkhā tsûtsû-ais, ǃKhūb ra mâ ǁaes hîa ǁnāǀî ǃgûsa ra ǂkhās hoasa ǂnau-ūs ǀkha nî ǂnauhe. 19Nēb ge Egipteb ai nî ǁnā ǁkharaba, tsî ǁkhāti nau hoaraga ǃhaodi ai, ǁHaodi ǁÂudība di ga tsēdī tama io.
20ǁNā tsēs ai i ge hāgu di ǀurirodi ai “ǃKhūba khaibahe hâ” ti nî xoasa. Tsî sūdi ǃKhūb ommi ǃnâ mâdi ge ǀgapiǃoredi khami altars aiǃâ nî mâ. 21Tsîs ge mâ sūs Jerusalems ǃnâ tsî Judab ǃnâ hâs hoasa ǃKhūb Hoaǀgaixab di ǃanusib ǃoa nî hâ, tsî-i ge mâ-i hoa-i hîa ǁguibas ǃaroma ra hā-e nē sūdi xa ū tsî ǁîdi ǃnâ nî sâi. Tsî ǁnā tsēs ai i ge ǁamaxū-ao-i xare-e ǃKhūb Hoaǀgaixab di ommi ǃnâ hâ tide.
Currently Selected:
Saxaria 14: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
