ǀGapiǁnaetsanas 4
4
Aorekhoeb
1Mâtikōses a îsa, ti ǀnamsase!
Sa mûra ge ǂnabura, ǀhāb ǃgâb ai ra ǂkhaira.
ǀÛn âs ge pirin, Gileadǃhommi tawa ra ǂgamǁgôaxan
khami ra ǂnā.
2Sa ǁgûdi ge ǀase go ǂkhomhe gū-i,
ǁāhetoa tsî ǃgoaxa-i khami ī.
Mâ-i hoa-i ǀgēna ūhâ;
tsî-i ǀgui-i tsîna ǀgôao tama.
3Sa amǁgaukha ge skarlakǀapa ǁapa-i,
ǃhoas kao kaise îsa-i khami ī.
Sa ams ge îsa tsî ǃgâbǀkhāba xu,
ǃkharese ǃgaohe hâ xranatǂûs khami ī.
4Sa ǃaos ge Davidi di ǂgō-ommi,
ǂgâǃnâgu ra ǀuidi ǀkha ǂnubisab
ǁîb ain ǀoadisi ǀgaisa khoegu di
ǁâtanina ra ǂgāmâiheb khami ī.
5Samra âs ge ǀgam ǁgûron
ǀgaes di ǀgēron, leliǃkhādi ǃnâ ra ǃûn khami ī.
6Tsēs nî ǃnâ tsî gu somga nî ǂgōs kōse
ta ge nî ǃgû miren di ǃhommi kōse
tsî ǃgâihamxūn di ǃnâus kōse.
7Sas ge hoaragase a îsa,
ǂnao-i xare-i ge sa ǃnâ a ǀkhai.
8Tita ǀkhas ge Libanonna xu nî hā, ti ǀnamsase
Libanonna xus ge tita ǀkha nî ǁgôaxa;
Amanaǃhommi di ǂaoba xu tita ǀkha ǁgôaxa;
Senirǃhommi tsî Hermonǃhommi di ǂaoba xu,
xamgu ǁanǃkhaide xu tsî ǀgarugu di ǀgapi ǁgoeǃkhaide xu.
9Ti ǂgaobas ge go ǃnari ti ǀnamsase
ti ǂgaobas ge ǀgui ǃnās di kōs ǀkha go ǃnari, ti ǀnamsase;
sa ǃaos ai hâ ǁgāxūb di ǀgui khedeb ǀkha.
10Mâtikōseb a îsa sa ǀnamma ti ǀnamsase, ae ti ǀnamsase!
Mâtikōseb a ǃgâi sa ǀnamma ǂauxûi-i ǃgâ-ai
tsî sa ǁamaba hoaraga ǃgâihamxūn ǃgâ-ai.
11Sa amǁgaukha xub ge daniba ra ǂnâ, ti ǀnamsase.
Danib tsî daib tsîkha sa nammi ǃnakaba xu;
tsî ǁamab sa anaxūn diba Libanonni dib khami.
12Ti ǃgâsas, ti ǀnamsas ge a ǁgâuǂnamisa ǃhana,
ǂganamsa ǀaus, ǂganamǁapoǁaposa ǀausa.
13Sas ge paradys ǃhanab,
xranatǂûn, narduba ra hamn khami ī.
14Nardub tsî safranǁnuib, kalmus-i tsî kanel-i
hoaraga ǃgâihamhaide mireb tsî aukoreb ǀkha
hoaraga ǃkharaga ǃgâihamxūn ǀkha.
15Sas ge ǀausa ǃhanagu ǃnâ
tsaus, ûitsama ǁgammi,
Libanonǃhomga xu ra dâuǁgôaxab disa.
Tarekhoes
16ǂKhai re, ǀApas ǂoatse
î hā re, ǃKhawagas ǂoatse
Ti ǃhanab ai ǃgom îb ǃgâihamxūn ǁamab âba dâuǂoa,
îb ti ǀnamsaba hā ǁîb ǃhanab ǃoa
tsî ǂû re ǃkharagaǃnâgu ǂûn âba.
Currently Selected:
ǀGapiǁnaetsanas 4: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.