ǂKhoamîdi 16
16
1Khoe-i ǂgaoǀkhādi ge ǁî-i ǂgaoba xu hâ, xawe ǀuniga mîs ge ǃKhūba xu ra hā.
2Khoe-i ge ǁî-i ra dī xū-i hoa-i a ǃgâi ti ǂâi ǁkhā, xawe ǃKhūb ge ǂâidi hoade ra ôaǃnâba.
3Sa ǂhansendi hoade ǃKhūb ai ǁgui, o di ge sa ǀapede nî ǃgâiǃgâ.
4 ǃKhūb ge kuru xū-i hoa-i ge ǁî-i ǃaromasa ūhâ; eloxoresa-i ge ǂōǂōsib tsēsa ǂâibahe hâ.
5ǀGapiǂâixa khoe-i ge ǃKhūb mûǁae a ui-uisa; ǁî-i ǁkharahe tamase hâ tidesa ǂanǁapo re.
6ǂGomǂgomsasib tsî amab tsîkha ǃnâ-us ge ǁoreb ra ǀûbahesa; ǃKhūba ǃaoǃgâs ge ǂkhababa xu ǂgōsa.
7Khoe-i daogu ga ǃKhūba ǃgâiba, ob ge ǁîba ǁî-i khākhoen tsîna ǁî-i ǀkha ra ǂkhîbagu kai.
8ǂHanu-aise ǂkhari hōǂgāsa ūhâs ge a ǃgâi, kai hōǂgāsa ǂhanuoǃnâ ǀgaub ai hōbasens xa.
9Khoe-i ge ǁî-i daoba ra ǀape, xawe ǃKhūb ge ǁî-i dāǃharode ra ǂgaeǂgui.
10Gao-aob ge Elob Gagab xa ǂgaeǂguihe hâse ra ǀgoraǃgâ, ǁîb ǀgoraǃgâdi ge a ǂhanu-ai.
11ǂHauǃnâ ǀguitikōsib tsî ǀnō-ūdas ge ǃKhūba xu hâ; ǀnō-ūǀuidi hoadi ge a ǁîb di sîsenai.
12Gao-aogu mûǁae ǂkhabadīs ge ui-uisa, trondi âgu ǂhanu-aisib ai a ǃgaoǃgaosa xui-ao.
13ǂHanu-ai khoe-i amǁgaukha ge gao-aob di ǃgâiaǂgao, ǁîb ge ǁnā-i, amaba ra ǃhoa-e a ǀnam.
14Gao-aob di ǁaib ge ǁōb sîsabeb khami ī, xawe gā-ai khoe-i ge ǁîb ǁaiba ra ǁgoea-ai kai.
15Gao-aob khoexasib ge ûiba ūhâ tsî ǁîb ǃgâixasib ge ǀnanusa ra ǀapi kai ǃâudi khami ī.
16Gā-aisiba ūhâs ge ǃhuniǀurib xa a ǃgâi; ǁnâuǃāba ūhâs ge ǀhaiǀuriba ūhâs xa a ǃgâi.
17ǂHanu-ai khoe-i daob ge ǂkhababa xu ra ūdabasen; ǁî-i daoba ra ǃûi khoe-i ge nî sâuhe.
18ǀGapiǂâixasib ge hîkākāsa ra aiǃgûba tsî aitsama ǀgapiǀgapisens ge ǁnāsa ra aiǃgûba.
19ǃGamǃgamsenxase ǀgâsa khoen ǁaegu hâs ge a ǃgâi, ǀgapiǂâixasib ǀkha ǁgâiǀāhe hân di xūna ǀgoragus xa.
20Gā-aisib ǀkha xū-e ra dī khoe-i ge nî ǃgâiǃgâ tsî ǃKhūba ga ǂgomǃgâ khoe-i ge nî ǀkhaehe.
21Gā-ai ǂgaoba ūhâ khoe-i ge a ǁnâuǃāxa, tsî ǃgâi mîs ge ra ǃhoadan.
22Gā-aisiba ūhâ khoe-i ge gā-aisib ǀaus khami ī, xawe gâresib di ǁkharab ge a gâresi.
23Gā-ai khoe-i ge ǁnâuǃāxase ra ǃhoa, tsî ǁî-i amǁgaukha ǃhoadans ǀgaiba ra mā.
24ǃGâi mîdi ge dani-i khami tsâ, ǁîdi ǀomsa ǂkhōn kai tsî sorosa ǂurusiba ra mā.
25 #
ǂKhm. 14:12
ǀNî ǁaeb aib ge ǂhau khami ī daoba hâ, xawe ǁōb ǃoa ra ǂgaeǂgui tsiba.
26Sîsenao-i ge ǂû-i ǃaroma ra sîsen; ǁî-i ge ǃâs xa ǁgarihe tsî ra sîsen.
27Eloxoresa khoe-i ge ǂkhababa ra ǃkhākhâi; ǁî-i ra ǃhoa xūn ge ǁhabu ra ǀaeb khami ra hîkākā.
28ǂKhabaxa khoe-i ge ǂgāǁaeb ǀguiba ra ǃaroma tsî ǀhoexa khoe-i ge ǀgū khoeǀhōsagun tsîna ra ǀgora.
29ǂKhabaxa khoe-i ge ǁî-i ǀhōsa-i tsîna ra ǂgaeǂhapu tsî ǂkhôaǂkhôasa daob ǃoa ra ǂgaeǂgui.
30Mûǂgami ra khoe-i ge ǂkhaba ǀapede ūhâ; ǁî-i amǁgaukha ra ǁkhamǀhao-i ge ra ǂkhabadī.
31ǀHaiǀûn ge ǂkhaisib di krons ase ī; ǂhanu-aise ra ûi khoe-i ǀgui-i ge ra ǀhaiadana.
32ǃHaese ǁaixa tama is ge ǃgâi, ǀgaiba ūhâs xa tsî ǁî-i ǁaiba ra ǁkhaesen khoe-i ge ǃāsa ra ǀhana khoe-i xa a ǃgâi.
33Khoen ge ǂnōgusa ra ao, xawe ǃKhūb ge ǀuni mîǁguisa ra ūba.
Currently Selected:
ǂKhoamîdi 16: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
