ǂKhoamîdi 13
13
1Gā-ai ǀgôa-i ge ǁî-i îb di ǂgōǀausa ra ǃkhōǃoa, xawe ǃhō-ao-i ge ǃkhâihe ǂgao tama hâ.
2ǃGâi khoe-i mîdi ge ǃgâi ûiba ǁî-e ra mādawa-am, xawe ǀhôagao khoe-i ge ǂkhabadība ra ǃaroma.
3ǃKhōnam ra khoe-i ge ǁî-i ûiba ra ǃûi; ǂhôaǃhoaxa khoe-i ge aitsama ra hîkākāsen.
4ǀOpesa khoe-i ǁkhoreb ge tātsē dīǀoaǀoahe tide, xawe ôasa khoe-i ǁkhoreb ge ǃkhū hâse nî dīǀoaǀoahe.
5ǂHanu-ai khoe-i ge ǂhumiba ǁkhan hâ, xawe eloxoresa khoe-i ge tao-oǃnâse tsî ǃgôaoǃnâse ra ûi.
6ǂHanu-aisib ge ǂhanu-ai khoe-i ûiba ra ǃûi, xawe ǁoreb ge eloxoresa-i ûiba ra ǃkhomǃnâ.
7ǀNî khoen ge ǃkhū taman hâ hîa, ǃkhūn hâse ra dīsen; xawen ge ǀnîna ǃkhūn hâ hîa, ǀgâsa khoen khami ra dīsen.
8ǃKhū hâ khoe-i ǃkhūsib ge a ǁî-i di xoremari, xawe ǀgâsa khoe-i ge ǁî-i nî ǃaoba xū-e ūhâ tama hâ.
9ǂHanu-ai khoen di ǃnâb ge ǃgāsase ra ǂkhai, xawe eloxoresan ǃamǀaes ge ra ǀari.
10ǁÎǁâsens ge ǂnoaguba ra ǃaroma, xawe ǃgamǃgamsens ge gā-aisiba ra ǃaroma.
11ǃHaese ra hōhe ǃkhūsib ge ǃhaese ra kā, xawe ǃgomse ra ǀhaoǀhaohe ǃkhūsib ge ra ǀaroǃnâsen.
12ǃKhomǃnâhe ra ǃâubasens ge ǂgaoba ra khôa, xawe dīǀoaǀoahe ra ǁkhoreb ge ûib di hais khami ī.
13Mîmāsa ga ǂhara khoe-i ge aitsama ra hîkākāsen, xawe mîmāsa ga ǁnâuǀnam-i ge nî mādawa-amhe.
14Gā-ain ǁkhāǁkhās ge ûib di ǀaus khami ī, nēs ge khoe-e ǁōb di ǃnuisa xu ra sâu.
15ǃGâi ǁnâuǃāb ge ǃgôasiba ra hā-ū, xawe ǂgomǃgâhe ǁoan di daob ge ǁîn di hîkākās ase ī.#13:15 ǀGui ǀoro ǂnûiǃkhunis ge daob ge ǁîn di hîkākās ase ī ti ūhâ tsî Hebregowab ge ǀamosib daob ti ūhâ.
16ǁNâuǃāxa khoe-i ge ǁî-i ǂansa ra sîsenū, xawe gâre khoe-i ge ǁî-i gâresiba ra ǁgauǂui.
17ǂGomǃgâhe ǁoa sîsabeb ge ǃgomsiba ra ǃaroma, xawe ǂgomǂgomsa sîsabeb ge ǂkhîba ra hā-ū.
18ǂGōǀausa ra mâǃoa-i ge ǀgâsib tsî taosib ǀkha ǀgui ra ǃgau, xawe ǂgōǀausa ra ǃkhōǃoa-i ge ǃgôasiba nî māhe.
19Dīǀoaǀoasa turab ge ǀomsa ǁkhoaba ra mā, xawe ǂkhababa xu ū-oasens ge gâre khoe-e ui-uisaba.
20Gā-ai khoen ǀkha ra hâ khoe-i ge ra gā-ai, xawe gâre khoen ǃgaeǀhaos ge ǂkhôab ǀguiba ra ǃaroma.
21ǂŌǂōsib ge ǁore-aona ra ǃgôaǃgon, xawe ǂhanu-ai khoen ge nî ǃgâiǃgâ.
22ǃGâi khoe-i ge ǁî-i ǁnuriǀgôana ǀumisa ra ǃgoroba, xawe ǁore-ao-i ǃkhūsib ge ǂhanu-ai khoena ra ǁguiribahe.
23Sîsenūhe tama ǃhanab ge ǃnāǂamsa ǂûna ǀgâsa khoena ǀkhī-ūba ǁkhā, xaweb ge ǁîba ǂhanuoǃnâ ǀgaub ai ǁîna ra ǀhanahe.
24ǁÎ-i ǀgôa-e ga ǂnau tama i khoe-i ge ǁî-e ǁkhan hâ, xawe ǁî-i ǀgôa-e ǀnam khoe-i ge ǁî-e ra ǂgōǀau.
25ǂHanu-ai khoe-i ge hoaǁae ǂâu hâ ǂûna ūhâ, xawe eloxoresa-i ge ǃâsase ǀgui ra hâ.
Currently Selected:
ǂKhoamîdi 13: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
