Filipeǁîn 1

1 # ǃNǃkh. 16:12 Paulub tsî Timoteub hâkha, Xristub Jesub di ǃgākha xu.

Hoaraga ǃanun Xristub Jesub din, Filipis ǃnâ ǂgaeǂgui-aon tsî ǃoaba-aon ǀkha hân ǃoa.

2Ab Elob sada ǁGûb tsî ǃKhūb Jesub Xristuba ǀkhommi tsî ǂkhîba mā du.

Paulub ge Filipeǁî ǂgomsabena ra ǀgoreba

3Ti Eloba ta ge sadu xa ta ra ǂâi ǃnās hoasa ra gangan. 4Sado ta ra ǀgoreba ǃnās hoasa ta ge ǁnāsa ǃgâiaǂgaob ǀkha ra dī. 5Sadu gere tita ǃGâiǂhôas ǃnâ ǂguro tsēsa xu nēsis kōse hui xui-ao. 6Tsî ta ge Elob sadu ǃnâ ge ǃgâi sîsenna tsoatsoab nî aiǃgû tsî ǁnāsa Xristub Jesub di Tsēs ai dīǀoaǀoa ǃkhaisa ǁaposase ra ǂgom. 7Tita i ge a ǂhanuba sadu hoadu xa ta nēti nî tsâ ǃkhaisa, sadu ǂgaob ǃnâ du tita ūhâ amaga. Mâ-i sadu di-i hoa-i tita ǀkha Elob xa ta ge māhe ǀkhommi, ǃkhōsis ǃnâ tsî ǁkhāti ǃGâiǂhôasa ta gere ǂnoaba tsî ǁapoǁapo ǁaeb ǃnâ, Elob ǀkhommi ǃnâ ra ǁhao xui-ao. 8Elob ge a ti ǀhûǀguitimî-ao, mâtikōse ta sado ti ǂgaob ǃnâ, Xristub Jesuba xu hâ ǀnammi ǀkha gere ǁkhore ǃkhaisa.

9Ti ǀgores ge sadu ǀnammi ga ǃaruǀîǀgui ǀomkhâi tsî ǂans tsî hōǃâs ǃnâ ǃnāǂamsa. 10Î du ǁîn a ǃgâi xūna ūǃoabasen, ǃanu tsî ǂnao-ose du Xristub di Tsēs ai nî ī 11tsî du ǂhanu-aisib di ǂûn ǀkha nî ǀoaǀoahese, Elob di ǂkhaisib tsî koasa ǃoa, Jesub Xristub ǃnâ-u.

Xristuba ǃoabas ǃnâ ǀguib ge ama ûiba hâ

12O ta ge sadu nî ǂan ǃkhaisa ra ǂgao, ti ǃgâsado, tita ǀkha ge ī xūn ge ǃGâiǂhôas di aiǃgûs ase ī ǃkhaisa. 13#ǃNǃkh. 28:30Tsî i ge nēs ǀkha hoaraga gao-ommi di ǃûi-aogu tsî naun hoan tawa tita Xristub ǃaroma a ǃkhōsabe ǃkhaisa ge ǃgāsa. 14Tsî tita ǃkhōsis ǃnâ hâs ge ǃnāsa ǂgomsabena ǁkhoaǂgaosiban ǃKhūb ǃnâ nî ūhâ ǃkhaisa ge mā, ǃao tamasen Elob ǃGâiǂhôasa nî aoǁnâse.

15ǀNîn ge hâ, Xristuba surib tsî ǂnoagusa xu ra aoǁnâna, xawen ge ǀnîna ǁnāsa ǃgâi ǂâibasens ǀkha ra dī. 16Nēsan ge ǁîna titan ūba hâ ǀnammi ǃaroma ra dī, ǃGâiǂhôas ǃaroma ta ǃkhōsis ǃnâ hâ ǃkhaisan a ǂan amaga. 17Xawen ge ǁnān surib tsî ǂnoagusa xu ra aoǁnâna Xristuba ǂhauǃnâse aoǁnâ tama hâ, xawe ǁnāsa titan ǃkhōsis ǃnâ nî ǃoaǃoase ra dī.

18Nēsa ǁnâi mâti a ǃgomsi ǁkhā? Tita ge mâ ǀgaus ǀguis, nēsis ga ama tamas ka io ǂhanu tama ǂâiǀgaugu ai hâs hoasa, Xristub ra aoǁnâhe ǃkhais xa ra ǃgâiaǂgao. Tsî ta ganupe nî ǃgâiaǂgao, 19ǂan ta a xui-ao, sadu ra ǀgoreba te tsîb Jesub Xristuba ǁîb Gagaba ra mā te tsî ta ǀams ai nî ǃnoraǃnorahe ǃkhaisa. 20ǃÂubasen tsî ta ge ra ǁkhore, tao tamase ta nēsi ǀoasa ǁkhoaǂgaosib, ǀnais khami ta nî ǃhoa ǃkhais diba nî ūhâsa. Tsîs ǁō ta kas, ûi ta kas hoasa, Xristub ǃgôasib ǃoa nî īsa. 21Tita xab ûiba a Xristu tsî ǁōba harebe xui-ao. 22Xawe soros ǃnâ ta ga ûi, o ta ge harebesa ūhâ sîsenna dī ǁkhā. Tsî ta ge mâ-e ta nî ǁhûisa a ǀū. 23ǀGam xūn ǁaegu ta ge mâ. Tita ge nē ûiba ǁnāxū tsî Xristub ǀkha hâsa ra tura, ǁîs hoan xa ǃgâi xui-ao. 24Xawe ûi ta nî ǃkhais ge sadu ǃaroma a ǂhâbasa. 25Nēsa ta ge ǂanǁapo hâ, tsî ta ge ǂan sadu ǀkha hâ tsî ta sadu hoado hui tsî du ǂgoms ǃnâ du ūhâ ǃgâiǂgaob ǃnâ nî ǀomkhâisa. 26Î du ǁkhawa ta ga sadu ǀkha hâo, tita xa ǃnāsa koasa sadu ǃgâsata a xui-ao, Xristub Jesuba mā.

27Xristub di ǃGâiǂhôasa anuba khami tanisen; nēsi ta ga hā tsî mû dus kas, tamas ka io ta ga ǀkhais hoasa, î ta ǀgui gagas ǃnâ, ǀguiǂâixase du ǃgâiǂhôas di ǂgoms ǃaroma ra ǀnûgusa ǁnâu. 28Sadu mâǃoa-aona du ǃao tamase ra mâǃoa ǃkhais ge ǁîn nî hîkākāhe, xawe du sado nî orehe ǃkhaisa nî ǁgau. Elob ge aitsama ǁîna ǁnāsa nî ǁgau. 29Elob ge sado ǁnā aiǂhanub Xristub ǃnâ ǂgoms dib ǀguiba tama i tsî ǁîb ǃaroma tsâs diba mā xui-ao. 30Sadu ge ǀnai ǂgomsa ta ra ǃkhambase ge mû te hâ i, tsî du ge ganupe ta ǁnāti ra dī ti ge ǁnâu, o ǂâis ǃnâ ūhâ re, sadu tsîn ǁkhā ǃkhams ǃnâ mâ ǃkhaisa.

Currently Selected:

Filipeǁîn 1: KKG20

Highlight

Copy