Nahum 1
1
1Nineves ǂama hâ ǂhôas. Elkosǁîb Nahummi ge mû ai-i di ǂkhanis.
ǃKhūb di ǁaib Nineves ǃoagu
2 ǃKhūb ge tauxa tsî ǀkhaoǂgaoxa Eloba;
ǃKhūb ge ǁkhara tsî ra ǀkhao.
ǁÎb ge khākhoen âba ra ǀkhao,
ǁîn ǃoagub ūhâ ǁaib ge ra hâhâ.
3 ǃKhūb ge a ǃnūǃnâxa, xawe kai ǀgaiba ūhâ.
ǁÎb ge ǀhapixa-e ǁkhara tamase ǁnāxū tide.
ǁÎb di ǃgûdaob ge ǁgaoǂoas ǃnâ hâ,
ǃâudi ge a ǁîb ǂaira di tsara.
4ǁÎb ge huriba ǀau tsî ǁîba ra ǂnâ kai,
ǁîb ge ǃāgu hoaga ra ǂnâ kai.
Basanni tsî Karmeli tsîkha ge ra ǂnâ
Libanonni di ǃkhādi ge ra ǃū.
5ǃHomgu ge ǁîb aiǃâ ra ǀkhū,
ǃnâugu ge ǁîb aiǃâ ra tsuni.
ǃHūbaib ge ǁîb aiǃâ hîkākāsase ǁgoe,
ǃhūbaib tsî ǁîb di ǁanǂgāsaben hoana.
6Tari-e ǁîb di ǁaib aiǃâ nî mâ ǁkhā?
Tari-e ǁîb di kai ǁaib aiǃâ nî mâ ǁkhā?
ǁÎb di ǁaib ge ǀaes khami ǁhōǂuihe hâ;
ǃgareǀuigu ge ǁîb aiǃâ ra khôaǃā.
7 ǃKhūb ge a ǃgâi;
ǁîb ge ǁhaiǁhâǃkhaise ī ǂōǂōsib ǁaeb ǃnâ.
ǁÎb ge ǁîb ǃoa ra ǁhaiǁhâna ra kōǃgâ,
8xaweb ge ǀgaisa ǁgamgu ǀkha hoana dâuǃkhū,
tsî ǁîb khākhoena hoaragase ra hîkākā.
ǁÎb di khākhoenab ge ǃkhaenab ǃnâ ra sauruǂgâ.
9Tare-i ǀgui-e du ga ǃKhūb ǃoagu ǀape,
xaweb ge ǁîba ǁî-e nî hîkākā.
ǂŌǂōsib ge ǀgamǁî ǃnāsa hā tide.
10ǁKhūn khamin ga ǂgapuǀhaosa,
ǂauxûib xan ga āǀhoro,
xawen ge ǂnâsa ǃhoroǃgaodi khami nî khauǃkhūhe.
11Ninevese sasa xub ge ǀguiba ge hā; ǂkhaba ǀapede ǃKhūb ǃoagu ra dīb, ǂkhaba ǂâisa ūhâba. 12Nētib ge ǃKhūba ra mî: “Mâtikōsen ga ǀgaisa tsî ǂgui, xawen ge hîkākāhe tsî nî bē. Tita ge sado ge ǃgamǃgam, xawe ta ge ǁkhawa ǃgamǃgam du tide. 13Tita ge ǁîb di ǃnaoba satsa xu nî khôaǁnâ tsî sats ǃgae-ūhe hâ khedega nî ǂgaeǃgao.”
14Sas Nineves ǂamab ge ǃKhūba ge mîmā: “Sas ge ǃaruǀî sa ǀonsa nî aiǃgû-ū suri-i xare-e ūhâ tide. Tita ge sa tempelgu ǃnâ hâ ǁgôa-elo-īga nî hîkākā. Tita ge sa ǀhobasa nî ǂhomi, ǃharaxūsats a amaga.”
15Mû ǁnāb ǃgâi ǂhôasa ra hā-ūb di ǂaira ǃhomgu ai; ǁnāb ǂkhîba hā ra ǂhôaba. Sadu ǁâudīga ǁâudī re, Judatse, î sadu mîmâide dīǀoaǀoa re. Eloxoresan ǃaruǀî sa ǃhūb ǃnâ ǂgâxa tide xuige, ǁîn hoaragase hîkākāhe hâ amaga.
Currently Selected:
Nahum 1: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
