Joel 2
2
ǃKhūb tsēs di hās ra ǂanǂanhe
1Xâiǁnâsa Sions ǃnâ xâi re,
ti ǃanu ǃhommi#2:1 ǃAnu ǃhommi: Tamas ka io Sionǃhommi. ai ǃgarise ǃhao re.
An ǃhūb di ǁanǂgāsaben hoana ǀkhū re,
ǃKhūb tsēs di hās go ǀgūtoa xuige.
2Tsēs ǃkhaeb tsî ǃkhaenab dis,
tsēs ǃâudi tsî kai ǃkhaenab disa.
ǃKhaenab hîa ǃhomgu ai ra hāb,
khamis ge kai tsî ǀgaisa ǂnubisa ra hā.
ǁÎs khami īs ge aiǃâ ge ǀkhai i
tsî ǃgoaxaǁaeb ǃnâs tsîna ǁkhawa hâ tide.
3ǁÎn aisǀkhāb ais ge ǀaesa ra ǂhubi,
ǃgâbǀkhāb aib ge ǁhabuba ra khau.
ǁÎn aiǃâb ge ǃhūba Edenǃhanab khami ī,
xawe ǁîn ǃgâb aib ge ǃgaroǃhūb ǀguiba ǁgoe.
ǀGui xū-i tsî ge ǁîna xu ûiǂoa tama hâ.
4ǁÎn ge hān khami ra mûsen,
ǁîn ge ǃgapihān khami ra ǃkhoe.#ǂHai. 9:7-9
5ǁÎn ge torokunidi khami ra ǀōse,
ǃhomgu di ǂaogu ai ra uri;
ǂnâsa ǀgâna ra ǂhubi ǀaeǁhabub khami,
ǀgaisa toroǂnubis, ǃkhams ǃoa ǂhomisas khami.
6ǁÎn aiǃân ge hoa khoena ra ǀkhū,
hoan di aidi ge ra ǀhai.
7ǁĒ-aogu khamin ge ra ǁnāǂam;
toroǃkhamaogu khamin ge ǂnubiǂgoaga ra īǂam.
Hoatsaman ge ǃgangu ân ǃnâ ra ǃgûma
tsî ǃgangu âna xu ǁgôa tama hâ.
8ǁÎn ge ǁkhāti ǁîǃnābe ǂgâugu tama hâ,
mâ-i hoa-i ge ǁî-i daob ai ra ǃgû;
ǁâtani-i xare-i ge ǁîna a ǁkhae ǁoa.
9ǁÎn ge ǃāsa ra ǃkhoeǂnôa,
ǂnubiǂgoaga-ūn ge ra uri;
omdi ain ge ra ǂoa,
ǃnari-aon khamin ge mûǂuidaode-u ra ǃapaǂgâ.
10ǃHūbaib ge ǁîn aiǃâ ra ǂgubi,
ǀhommi ge ra ǀkhū.
Sores tsî ǁkhâb tsîra ge ra ǃkhae,
ǀgamirodi tsîn ge ra ǃnâǀû.#ǂHai. 8:12
11 ǃKhūb ge dommi âba
toroǂnubis âbǀî ra ǀō kai.
ǁÎb di toroǂnubis ge kaise a kai,
ǁnān, ǁîb mîmāsa ra dīn ge a ǀgaisa.
ǃKhūb di tsēs ge kai tsî kaise ǃaoǃaosa.
Tari-e ǁîsa nî ûiǃkharu ǁkhā?#ǂHai. 6:17
ǃHobasens ǃoa hâ ǂgais
12Nētib ge ǃKhūba ra mî:
“Xawe nēsi
sa ǂgaob hoab ǀkha tita ǃoa ǃhobasen,
ǂûtamahâs tsî ās tsî ǃgaes tsîn ǀkha,
13î sadu ǂgaoga ǀkhau, sadu sarana tama.”
ǃKhūb sadu Eloba ǃoa ǃhobasen.
ǁÎb ge ǃgâi tsî a ǀkhomxaǂgao;
ǁîb ge ǃnūǃnâxa tsî ǀnammi xa ǀoa hâ;
ǁîb ge ǀûbaǀnam tsî ǁkharab âba ra ǂgae-oa.
14Tari-e a ǂan, ǀnîsib ge ǂâis âba nî ǀkharaǀkhara
tsî ǀkhaeba nî ǁnāxūbada.
ǂÛǁguibas tsî ǂnâǁguibas tsîra
ǃKhūb sadu Elob ǃaroma.
15Xâiǁnâsa Sions ǃnâ xâi,
ǂûtama hâ-e ǂanǂan,
î ǀhaohâba ǂgaiǀhao.
16ǁAesa ǀhaoǀhao,
ǀhaohâba ǃanuǃanu,
kairana ǀhaoǀhao,
ǀgôarona ǀhaoǀhao
tsî ǁkhāti dai ran tsîna.
ǃGame-aoba ab ǃnā-oms âba xu ǂoaxa
tsî ǃgame-aosa ǁomǃnâ-oms âsa xu.
17A gu ǃKhūba ra ǃoaba pristerga
ai-ommi tsî altars tsîra ǁaegub ǃnâ
ā tsî mî re:
“ǃKhūtse, sa ǁaesa ǀkhomxa re.
Tā idi nau ǁaede ǃharaxū tsî ǃhō da
tsî ‘Mâpab ǁîn di Eloba hâ?’ ti mî re.”
ǃKhūb ge ǃhūba ǁkhawa nî ǂûtanixa kai
18 ǃKhūb ge ǃhūb âb ǂama nî tau;
ǁîb ge ǁaes âba nî ǀkhomxa.
19 ǃKhūb ge ǁaes âba ge ǃeream:
“Tita ge ǃhoro-i tsî ǂauxûi-i tsî ǀkhera-oli-i
tsîna nî sîba du,
ǁîna du ge ǂâu du nîs kōse nî ǃkhōǃoa.
Tita ge ǁkhawa nau ǁaedi ǃhōxūse dī du tide.
20Tita ge ǀapasǀkhāb khākhoeba sado xu nî ūbē.
ǁÎba ta ge ǂnâsa tsî ǃū-aisa ǃhūb ǃoa nî doeǁgābē.
ǁÎb di aisǀkhāb ge ǂŌxahurib ǃnâ nî ǂgâ
tsî ǁîb di ǃgâbǀkhāba Mediteraneahurib ǃnâ.
ǁÎb di ǀō hammi ge nî khâi,
kai xūnab ge dī xui-ao.
21“ǃHūtse tā ǃao re,
ǃgâiaǂgao î dâ re,
kai xūnab go ǃKhūba dī xuige.
22ǀGurun tsî xamarin tsîdo tā ǃao re,
ǃû-aidi go ǁhao xuige.
Haidi ge go ǂûtani
tsîn ge ǀnoman tsî draibena ǀoa hâ.
23“ǃGâiaǂgao re Sions dido,
dâ re ǃKhūb sadu Elob ǃnâ.
ǁÎb ge ǂhanu-aisib ǃaroma ǂguro ǀapiba go sîba du,
ǁîb ge ǂâu hâ ǀapiba go sîba du,
haiǃkharub tsî ǁhaoǁaeb ǃnâ, ǂguros khami.
24ǃHorodāǃnâǃkhaigu ge ǃhorob xa nî ǀoa,
ǀāǃnâxapagu ge ǂauxûib tsî olib xa nî ǀoaǃnā.
25Tita ge ǁnā kai ǂhoms di ǂhomn ge
sadu ǃgaosa hapu kurigu ǂama nî mādawa du,
tita ge ǁnā kai toroǂnubisa sadu ǃoagu sî xui-ao.
26Sadu ge ǃnāǂamsase nî ūhâ tsî nî ǂûǁâ.
Sadu ge ǃKhūb sadu Elob,
buruxana go dība duba nî koa.
Ti ǁaes ge ǁkhawa taotaohe tide.
27O du ge nî ǂan, tita Israels ǀkha hâsa
tsî tita ǃKhūta a sadu Elosa,
tsîb ǀnîb xareba hâ tamasa.
ǃKhūb di tsēs
28“ǁNās khaoǃgâ ta ge ti Gagaba
khoen hoan ai nî ǁhōǂui.
Sadu ôagu tsî sadu ôadi tsîn ge nî kēbo,
sadu di kairan ge ǁhapode nî ǁhapo
tsî sadu ǂkham khoen ge aide nî mû.#ǃNǃkh. 2:1-21
29ǁNā tsēdi ǃnâ ta ge ti Gagaba
ǃgāgu tsî ǃgādi ǂamas tsîna nî ǁhōǂui.
30“Tita ge buruxa saode nî mā,
ǀhommi ǃnâ tsî ǃhūbaib ai;
ǀaob tsî ǀaes tsî ǀanni tsîna.
31Sores ge nî ǃkhaeǃkhaehe
tsî ǁkhâb ge ǀaob khami nî ǀapa,
kai tsî ǃaoǃaosa tsēs ǃKhūb dis nî hās aiǃâ.#Mat. 24:29; Mrk. 13:24-25; Luk. 21:25; ǂHai. 6:12-13
32 #
Rom. 10:13
ǃKhūb ǀonsa ra ǂgaiǀî-i hoa-i ge nî sâuhe.
Sionǃhommi ai tsî Jerusalems ǃnâs ge oresa nî hâ.
ǃKhūb ge mî khami.
ǃGau gen ǃnân ge ǃKhūb xa ge ǂgaihena hâ.”
Currently Selected:
Joel 2: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.