Johaneb 9
9
ǃNaesa xu ǂgī khoebab ge Jesuba ra ǂuruǂuru
1Tsî ǃgûǃkharub ra hîab ge Jesuba ǃnaesa xu a ǂgī khoeba ge mû. 2O gu ge ǁkhāǁkhāsabega* ge dî bi: “ǁKhāǁkhā-aotse, tari-i di ǁoreba ge ǃaroma nē khoeb ge ǂgīse ǃnae ǃkhaisa? ǁÎb dina tamas ka io ǁgûra dina?”
3“ǁÎb ǁoren tamas ka io ǁîb îra din tsîn ge nēsa ǃaroma tama hâ” tib ge Jesuba ge ǃeream. “ǁÎb ge ǂgīse ge ǃnae, Elob ǀgaib ǁîb ǃnâ nî mûhe ǁkhāse. 4Sage hoage ge tita ge sîb xa da ge ǁgui-aihe sîsenga nî sîsenǂui. ǂKhari ǁaero-i ǀgui-i ge ǃgau hâ tsuxub, ǁîb ǃnâ da sîsen ǁoab nî hāǂam das aiǃâ. 5#Mat. 5:14; Jhn. 8:12Xawe ǃhūbaib ai ta hâs kōse ta ge a ǃhūbaib di ǃnâ.”
6Nēnab ge mîtoas khaoǃgâb ge Jesuba ǃhūb ai ǂāra tsî ǂgoaba ǂāba xu kuru tsî ǂgī khoeb di mûra ai ge ǂkhau. 7Tsîb ge Jesuba ǁîb ǃoa ge mî: “ǃGû, î Siloams (‘Sîǂuis’ ti ra ǂnûiǃkhunihes) di ǃgaus ǃnâ sī ǁānai!” Ob ge ǃgû tsî sī ǁānai tsî mû rase ge oahā!
8On ge ǁanǁare-aon tsî naun ǁîba ge ǂgī ǀkhope-aob ase ǀgui ǂan ina ǁîǃnābe ge dîgu: “Nēba kha ǀkhope gere tamaba?” 9ǀNîn ge “ǁÎb ge” tsî nauna “Hî-î, xawe ǁîb khami ī!” ti gere mî.
Ob ge ǀkhope-aoba ǀû tamase ǁîn ǃoa “Tita ǂûta ge!” ti gere mî.
10On ge ǁîba ge dî: “Tari-i xats go ǂuruǂuruhe? Tare-e go ī?”
11Ob ge ǁîna ge mîba: “Khoeb, Jesub ti ǀon hâb ge ǂgoa-e kuru tsî ǂkhaumû te tsî Siloams di ǃgaus ǃnâ sī ǁānai ti go mîba te. Tita ge ǃgû tsî sī go ǁānai tsî ta ge nēsi a mû ǁkhā!”
12“Nēsi mâpab hâ?” tin ge ge dî bi.
Ob ge “ǀŪ ta a” ti ge ǃeream.
Farisegu* ge ǂuruǂuruhe ge khoeba ra dîǃnâ
13On ge nē ǂgī go iba Farisegu tawa ge sī-ū. 14Tsî ǁnā tsēs Jesub ge ǂgoaba kuru tsî ǂgī khoeba ǂkhaumûs ge ge Sabbattsē i. 15O gu ge Farisega ǁkhawa khoeba mâtib go mû ǃkhaisa ge dîǂuiǃnâ. Ob ge ǁîba ǁîgu ǃoa ge mî: “ǁÎb ge ǂgoaba ti mûra ai go ǂkhau tsî ta go ǁî-e a ǁābē, o ta ge nēsi ra mû!”
16O gu ge ǀnîgu Farisegu diga ge mî: “Nē khoeb, Jesub, ge Eloba xu hâ tama hâ, ǁîb ra Sabbattsēs* ai sîsen xui-ao.” Xawe gu ge nauga ge mî: “Mâti i khoe-i hîa a ǁore-ao-e nēti ī saode a dī ǁkhā?” Tsî-i ge ǁnāpa ǀgora-e ǁîgu ǁaegu ge hā.
17O gu ge Farisega ǁkhawa ǂgī ge iba dîǃnâ tsî ge ǂgaoǀkhā: “Nē khoeb satsa ge mû kaib a tari tits ra mî?”
Ob ge khoeba ge ǃeream: “ǁÎb ge a kēbo-ao.”
18Jodeǁî ǂgaeǂgui-aogu ge ǂgīb ge i tsîb ra nēsi mû ǃkhaisa ǂgom tama i tsî ǁîb îra ge ǂgai. 19Tsî gu ge ǁîra ge dî: “Nēba saro ôab, ǂgīse ge ǃnaeba? Tsî ǁnās kao, mâtib ǁnâi nēsi ra mû?”
20O ra ge ǁgûra ge ǃeream: “ǂAnǃgâm ge ra ǁîb a sim di ôa tsîb ge ǂgīse ǃnae ǃkhaisa, 21xawem ge a ǀū mâtib nēsi ra mûs, tamas ka io tari-i xab go mû kaihe ǃkhaisa. ǁÎba dî re, kaiǂâub hâ xuige.” 22ǁÎra ge Jodeǁî ǂgaeǂgui-aoga ra gere ǃao amaga nēna ge mî, ǀnain ge Jodeǁîna, khoe-i Jesub a Xristu* ti ga mî-i nî sinagogeba* xu ǃhaeǂuihe ti a ǂanǂan xui-ao. 23ǁNā-amaga ra ge ǁîb îra “Kaiǂâub hâ xuige ǁîba dî re” ti ge mî.
24ǀGamǁî ǃnāsa gu ge ǂgī ge i khoeba ǂgai-oa tsî ge mîba: “Elob aiǃâ nū, î amaba ǃhoa, Jesub ǁore-ao ǃkhaisa ge a ǂan xuige.”
25“Tita ge ǁîb a ǁore-ao tamas ka io a ǁore-ao tama ǃkhaisa a ǀū. Xawe ta ǂans ge; ǂgī ta ge i tsî ta nēsi ra mû ǃkhaisa!” tib ge ge ǃeream.
26O gu ge ǃaruǀî ge dî bi: “Xawe tare-eb go dī? Mâtib go mû kai tsi?”
27“ǀNai ta ge go mîba go, xawe go kom ǃgâ tamao. Tare-i ǃaroma go ǁkhawa ra ǁnâu ǂgao? Sago tsîna ra ǁîb di ǁkhāǁkhāsabe kai ǂgao?” tib ge ge ǃeream.
28O gu ge ǁîba mîǁgaiǁgai tsî ge mî: “Sats ge ǁîb di ǁkhāǁkhāsabe, xawe sige ge Moseb di ǁkhāǁkhāsabe. 29Sige ge a ǂan Elob ge Moseb ǀkha ǃhoa ǃkhaisa, xawe ge ge nē khoeb ge mâpa xu ǀkhī ǃkhaisa a ǀū.”
30“Kaise a buruxaba te xū-i ge!” tib ge khoeba ge ǃeream. “ǁÎb mâpa xu hâsa go ge a ǀū, xaweb ge ti mûra go ǁkhowa-am! 31ǂAn da ge a Elob ra eloǃaoǃgâxan tsî ǁîb ǂâisa ra dīna ǃgâ, xawe ǁore-aona ǃgâ tama ǃkhaisa. 32ǃHūbaib di tsoatsoasa xu i ge khoe-i xare-e ge tātsē ǁnâuhe tama hâ-i, ǂgīse ǃnae hâ-i di mûra i ge ǁkhowa-am ǃkhaisa. 33Nē khoeb ga Eloba xu hâ tama io, ob kom ǁnāsa a dī ǁoao.”
34“Sats ge ǁoreb ǃnâ ge ǃnae! Sigets ra ǁkhāǁkhā ǂgao?” ti gu ge ǁîba dî tsî sinagogeba xu ge ǃhaeǂui.
Gagasi ǂgīsib
35Tsî Jesub ge ǁnâu taren go nē khoeb ǀkha ī ǃkhaisa, ob ge khoebab ge hō-o ǁîba ge dî: “Satsa Khoen Ôab ǃnâ ǂgomts ra?”
36Ob ge “Tariba kha ǃgôahesatse, î ta ǁîb ǃnâ ǂgom?” ti ge ǃeream.
37Ob ge Jesuba “ǁÎbats ge go mû tsî sats ǀkha ra ǃhoab ge a ǁî” ti ǁîb ǃoa ge mî.
38Ob ge khoeba “ǂGom ta ra, ǃKhūtse” ti mî tsî Jesuba ge ǀgoreǀî.
39Ob ge Jesuba ge mî: “ǀGoraǃgâ ta nîse ta ge nē ǃhūbaib ai ge hā, mû taman nî mû tsîn mû rana nî ǂgīse.”
40ǀNîgu Farisegu digu ǁnāpa ge mâ i gu ge Jesub ra mîna ǁnâu, o gu ge ge dî bi: “Sige a ǂgī tits ra mî?”
41Ob ge Jesuba ǁîga ge ǃeream: “ǂGī go ga hâ, o go ge ga ǀhapio hâ. Xawe go ge mû go ra ti ra mî, amaga go ge ǀhapixase nî hâhâ.”
Currently Selected:
Johaneb 9: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
